| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. အဝိဇ္ဇာပစ္စယသုတ္တဝဏ္ဏနာ
5. Avijjāpaccayasuttavaṇṇanā
၃၅. ဒေသနံ ဩသာပေသီတိ ယထာရဒ္ဓကထံ ဌပေသိ။ တတ္ထ နိသိန္နသ္သ ဒိဋ္ဌိဂတိကသ္သ လဒ္ဓိယာ ဘိန္ဒနဝသေန ဥပရိ ကထေတုကာမော။ ဗုဒ္ဓာနဉ္ဟိ ဒေသနာဝာရံ ပစ္ဆိန္ဒာပေတ္ဝာ ပုစ္ဆိတုံ သမတ္ထော နာမ ကောစိ နတ္ထိ။ တေနာဟ ‘‘ဒိဋ္ဌိဂတိကသ္သ ဩကာသဒာနတ္ထ’’န္တိ။ ဒုပ္ပဉ္ဟော ဧသော သတ္တူပလဒ္ဓိယာ ပုစ္ဆိတတ္တာ ။ သတ္တူပလဒ္ဓိဝာဒပဒေနာတိ ‘‘သတ္တော ဇီဝော ဥပလဗ္ဘတီ’’တိ ဧဝံ ပဝတ္တဒိဋ္ဌိဒီပကပဒဝသေန။ ဝဒန္တိ ဧတေနာတိ ဝာဒော။ ဒိဋ္ဌိ-သဒ္ဒော ပန ဒ္ဝယသင္ဂဟိတော, ဗ္ရဟ္မစရိယဝာသော ပန ပရမတ္ထတော အရိယမဂ္ဂဘာဝနာတိ အာဟ ‘‘အရိယမဂ္ဂဝာသော’’တိ။ အယံ ဒိဋ္ဌီတိ အနညေ သရီရဇီဝာတိ ဒိဋ္ဌိ။ ‘‘ဇီဝော’’တိ စ ဇီဝိတမေဝ ဝဒန္တိ။ ဝဋ္ဋန္တိ ဒုဝိဓံ ဝဋ္ဋံ။ နိရောဓေန္တောတိ အနုပ္ပတ္တိဓမ္မတံ အာပာဒေန္တော။ သမုစ္ဆိန္ဒန္တောတိ အပ္ပဝတ္တိယံ ပာပနေန ဥပစ္ဆိန္ဒန္တော။ တဒေတံ မဂ္ဂေန နိရောဓေတဗ္ဗံ ဝဋ္ဋံ နိရုဇ္ဈတီတိ ယောဇနာ။ ‘‘အယံ သတ္တော ဝိနာသံ အဘာဝံ ပတ္ဝာ သဗ္ဗသော ဥစ္ဆိဇ္ဇတီ’’တိ ဧဝံ ဥစ္ဆေဒဒိဋ္ဌိယာ ဂဟိတာကာရသ္သ သမ္ဘဝေ သစ္စဘာဝေ သတိ။ န ဟောတီတိ သာတ္ထကော န ဟောတိ။
35.Desanaṃ osāpesīti yathāraddhakathaṃ ṭhapesi. Tattha nisinnassa diṭṭhigatikassa laddhiyā bhindanavasena upari kathetukāmo. Buddhānañhi desanāvāraṃ pacchindāpetvā pucchituṃ samattho nāma koci natthi. Tenāha ‘‘diṭṭhigatikassa okāsadānattha’’nti. Duppañho eso sattūpaladdhiyā pucchitattā . Sattūpaladdhivādapadenāti ‘‘satto jīvo upalabbhatī’’ti evaṃ pavattadiṭṭhidīpakapadavasena. Vadanti etenāti vādo. Diṭṭhi-saddo pana dvayasaṅgahito, brahmacariyavāso pana paramatthato ariyamaggabhāvanāti āha ‘‘ariyamaggavāso’’ti. Ayaṃ diṭṭhīti anaññe sarīrajīvāti diṭṭhi. ‘‘Jīvo’’ti ca jīvitameva vadanti. Vaṭṭanti duvidhaṃ vaṭṭaṃ. Nirodhentoti anuppattidhammataṃ āpādento. Samucchindantoti appavattiyaṃ pāpanena upacchindanto. Tadetaṃ maggena nirodhetabbaṃ vaṭṭaṃ nirujjhatīti yojanā. ‘‘Ayaṃ satto vināsaṃ abhāvaṃ patvā sabbaso ucchijjatī’’ti evaṃ ucchedadiṭṭhiyā gahitākārassa sambhave saccabhāve sati. Na hotīti sātthako na hoti.
ဂစ္ဆတီတိ သရီရတော နိက္ခမိတ္ဝာ ဂစ္ဆတိ။ ဝိဝဋ္ဋေန္တောတိ အပ္ပဝတ္တိံ ကရောန္တောတိ အတ္ထော။ ဝိဝဋ္ဋေတုံ န သက္ကောတိ နိစ္စသ္သ အပ္ပဝတ္တိံ ပာပေတုံ အသက္ကုဏေယ္ယတ္တာ။ မိစ္ဆာဒိဋ္ဌိ သမ္မာဒိဋ္ဌိံ ဝိဇ္ဈတိ အသမာဟိတပုဂ္ဂလသေဝနဝသေန တထာ ပဝတ္တိတုံ အပ္ပဒာနဝသေန စ ပဇဟိတဗ္ဗာပဇဟနဝသေန သမ္မာဒိဋ္ဌိံ ဝိဇ္ဈတိ။ ဝိသူကမိဝာတိ ကဏ္ဍကော ဝိယ။ န ကေဝလံ အနနုဝတ္တကောဝ, အထ ခော ဝိရောဓောပိ ‘‘နိစ္စ’’န္တိအာဒိနာ ပဝတ္တနဓမ္မတာယ ဝိညာပနတော။ ဝိရူပံ ဗီဘစ္ဆံ ဖန္ဒိတံ ဝိပ္ဖန္ဒိတံ။ ပဏ္ဏပုပ္ဖဖလပလ္လဝာနံ အဝတ္ထုဘူတော တာလော ဧဝ တာလာဝတ္ထု ‘‘အသိဝေ သိဝာ’’တိ ဝောဟာရော ဝိယ။ ကေစိ ပန ‘‘တာလဝတ္ထုကတာနီ’’တိ ပဌန္တိ, အဝတ္ထုဘူတတာယ တာလော ဝိယ ကတာနီတိ အတ္ထော။ တေနာဟ ‘‘မတ္ထကစ္ဆိန္နတာလော ဝိယာ’’တိ။ အနုအဘာဝန္တိ ဝိနာသံ။
Gacchatīti sarīrato nikkhamitvā gacchati. Vivaṭṭentoti appavattiṃ karontoti attho. Vivaṭṭetuṃ na sakkoti niccassa appavattiṃ pāpetuṃ asakkuṇeyyattā. Micchādiṭṭhi sammādiṭṭhiṃ vijjhati asamāhitapuggalasevanavasena tathā pavattituṃ appadānavasena ca pajahitabbāpajahanavasena sammādiṭṭhiṃ vijjhati. Visūkamivāti kaṇḍako viya. Na kevalaṃ ananuvattakova, atha kho virodhopi ‘‘nicca’’ntiādinā pavattanadhammatāya viññāpanato. Virūpaṃ bībhacchaṃ phanditaṃ vipphanditaṃ. Paṇṇapupphaphalapallavānaṃ avatthubhūto tālo eva tālāvatthu ‘‘asive sivā’’ti vohāro viya. Keci pana ‘‘tālavatthukatānī’’ti paṭhanti, avatthubhūtatāya tālo viya katānīti attho. Tenāha ‘‘matthakacchinnatālo viyā’’ti. Anuabhāvanti vināsaṃ.
အဝိဇ္ဇာပစ္စယသုတ္တဝဏ္ဏနာ နိဋ္ဌိတာ။
Avijjāpaccayasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. အဝိဇ္ဇာပစ္စယသုတ္တံ • 5. Avijjāpaccayasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. အဝိဇ္ဇာပစ္စယသုတ္တဝဏ္ဏနာ • 5. Avijjāpaccayasuttavaṇṇanā
