| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
40. அவேப⁴ங்கி³யனித்³தே³ஸவண்ணனா
40. Avebhaṅgiyaniddesavaṇṇanā
322-4. ஆராமாராமவத்தூ²னீதி எத்த² (சூளவ॰ 321; சூளவ॰ அட்ட²॰ 321) ஆராமோ நாம புப்பா²ராமோ வா ப²லாராமோ வா. மஞ்சோ பீட²ங் பி⁴ஸி பி³ப்³போ³ஹனாதி³ஸயனாஸனங். லோஹகும்பீ⁴ஆத³யோ காளலோஹதம்ப³லோஹாதி³மயா. பா⁴ணகோ உத³கசாடி. பஞ்சேதே அவிபா⁴ஜியாதி பா⁴ஜெத்வா ந க³ஹேதப்³பா³, க³ஹிதாபி ஸங்க⁴ஸந்தகா ஏவாதி அத்தோ². எத்த² பன ஆராமோ ஆராமவத்தூ²தி பட²மங், விஹாரோ விஹாரவத்தூ²தி து³தியங், மஞ்சோ பீட²ங் பி⁴ஸி பி³ப்³போ³ஹனந்தி ததியங், லோஹகும்பீ⁴…பே॰… நிகா²த³னந்தி சதுத்த²ங், வல்லி…பே॰… தா³ருப⁴ண்ட³ங் மத்திகப⁴ண்ட³ந்தி பஞ்சமந்தி ஏவங் இமானி ராஸிவஸேன பஞ்ச ஹொந்தி, ஸருபவஸேன அனேகானி ஹொந்தி. ஹொந்தி செத்த² –
322-4.Ārāmārāmavatthūnīti ettha (cūḷava. 321; cūḷava. aṭṭha. 321) ārāmo nāma pupphārāmo vā phalārāmo vā. Mañco pīṭhaṃ bhisi bibbohanādisayanāsanaṃ. Lohakumbhīādayo kāḷalohatambalohādimayā. Bhāṇako udakacāṭi. Pañcete avibhājiyāti bhājetvā na gahetabbā, gahitāpi saṅghasantakā evāti attho. Ettha pana ārāmo ārāmavatthūti paṭhamaṃ, vihāro vihāravatthūti dutiyaṃ, mañco pīṭhaṃ bhisi bibbohananti tatiyaṃ, lohakumbhī…pe… nikhādananti catutthaṃ, valli…pe… dārubhaṇḍaṃ mattikabhaṇḍanti pañcamanti evaṃ imāni rāsivasena pañca honti, sarupavasena anekāni honti. Honti cettha –
‘‘த்³விஸங்க³ஹானி த்³வே ஹொந்தி, ததியங் சதுஸங்க³ஹங்;
‘‘Dvisaṅgahāni dve honti, tatiyaṃ catusaṅgahaṃ;
சதுத்த²ங் நவகொட்டா²ஸங், பஞ்சமங் அட்ட²பே⁴த³ன’’ந்தி. (சூளவ॰ அட்ட²॰ 321);
Catutthaṃ navakoṭṭhāsaṃ, pañcamaṃ aṭṭhabhedana’’nti. (cūḷava. aṭṭha. 321);
325. ‘‘பஞ்சிமானி, பி⁴க்க²வே, அவிஸ்ஸஜ்ஜியானி ந விஸ்ஸஜ்ஜேதப்³பா³னி ஸங்கே⁴ன வா க³ணேன வா புக்³க³லேன வா, விஸ்ஸஜ்ஜிதானிபி அவிஸ்ஸஜ்ஜிதானி ஹொந்தி. யோ விஸ்ஸஜ்ஜெய்ய, ஆபத்தி து²ல்லச்சயஸ்ஸா’’தி (சூளவ॰ 321) வுத்தத்தா ‘‘பா⁴ஜிதாபி அபா⁴ஜிதா’’தி வுத்தங். ஏதேதி வுத்தப்பகாரா பஞ்சபி ‘‘க³ருப⁴ண்டா³னீ’’தி ச ‘‘அவிஸ்ஸஜ்ஜியானீ’’தி ச ச-ஸத்³தே³ன ‘‘அவேப⁴ங்கி³யானீ’’தி ச வுச்சந்தீதி அத்தோ².
325. ‘‘Pañcimāni, bhikkhave, avissajjiyāni na vissajjetabbāni saṅghena vā gaṇena vā puggalena vā, vissajjitānipi avissajjitāni honti. Yo vissajjeyya, āpatti thullaccayassā’’ti (cūḷava. 321) vuttattā ‘‘bhājitāpi abhājitā’’ti vuttaṃ. Eteti vuttappakārā pañcapi ‘‘garubhaṇḍānī’’ti ca ‘‘avissajjiyānī’’ti ca ca-saddena ‘‘avebhaṅgiyānī’’ti ca vuccantīti attho.
326-8. இதா³னி புரிமேஸு தீஸு ராஸீஸு ஸப்³ப³ஸ்ஸ க³ருப⁴ண்ட³த்தா தே அனாமஸித்வா பச்சி²மேஸு த்³வீஸு ராஸீஸு ஏகச்சஸ்ஸ அக³ருப⁴ண்ட³ஸ்ஸாபி அத்தி²தாய தங் த³ஸ்ஸேதுங் ஆரப⁴ந்தோபி தேஸு த்³வீஸு ப³ஹுவிஸயங் பட²மங் த³ஸ்ஸேதுங் ‘‘வல்லிட்³ட⁴பா³ஹுமத்தாபீ’’திஆதி³மாஹாதி ஞாதப்³ப³ங். தஸ்ஸாயங் ஸங்கே²போ (சூளவ॰ அட்ட²॰ 321) – வல்லி அட்³ட⁴பா³ஹுமத்தாபி வேளு அட்ட²ங்கு³லாயதோபி திணாதி³ முட்டி²மத்தம்பீதி எத்த² ஆதி³-ஸத்³தே³ன முஞ்ஜபப்³ப³ஜங் ஸங்க³ண்ஹாதி, பண்ணங் ஏகம்பி மத்திகா பாகதா வா பஞ்சவண்ணா வா ஸுதா⁴கங்கு³ட்ட²ஆதி³காதி ஆதி³-ஸத்³தே³ன ஸஜ்ஜுலஸஜாதிஹிங்கு³லகாதி³ வா தாலபக்கப்பமாணாபி யேஹி கேஹிசி ஸங்க⁴ஸ்ஸ தி³ன்னா வா ஸங்கி⁴கே திணகெ²த்தாதி³ம்ஹி ஜாதா வா ரக்கி²தகோ³பிதபூ⁴மிபா⁴கே³ உப்பன்னா தத்த²ஜாதகா வா ஸங்கி⁴கா ரக்கி²தா ஏவ அபா⁴ஜியாதி அத்தோ².
326-8. Idāni purimesu tīsu rāsīsu sabbassa garubhaṇḍattā te anāmasitvā pacchimesu dvīsu rāsīsu ekaccassa agarubhaṇḍassāpi atthitāya taṃ dassetuṃ ārabhantopi tesu dvīsu bahuvisayaṃ paṭhamaṃ dassetuṃ ‘‘valliḍḍhabāhumattāpī’’tiādimāhāti ñātabbaṃ. Tassāyaṃ saṅkhepo (cūḷava. aṭṭha. 321) – valli aḍḍhabāhumattāpi veḷu aṭṭhaṅgulāyatopi tiṇādi muṭṭhimattampīti ettha ādi-saddena muñjapabbajaṃ saṅgaṇhāti, paṇṇaṃ ekampi mattikā pākatā vā pañcavaṇṇā vā sudhākaṅguṭṭhaādikāti ādi-saddena sajjulasajātihiṅgulakādi vā tālapakkappamāṇāpi yehi kehici saṅghassa dinnā vā saṅghike tiṇakhettādimhi jātā vā rakkhitagopitabhūmibhāge uppannā tatthajātakā vā saṅghikā rakkhitā eva abhājiyāti attho.
இதா³னி யே செத்த² பா⁴ஜிதப்³பா³, தே த³ஸ்ஸேதுங் ‘‘நிட்டி²தே’’திஆதி³மாஹ, ஸங்க⁴ஸ்ஸ வா சேதியஸ்ஸ வா கம்மே நிட்டி²தே பா⁴ஜியாதி அதி⁴ப்பாயோ. எத்த² பன யங் கிஞ்சி வல்லிவேளுதிணபண்ணமத்திகாதி³ ஸங்க⁴ஸ்ஸ தி³ன்னங் வா ஸங்கி⁴கே திணகெ²த்தாதி³ம்ஹி ஜாதகங் வா ரக்கி²தகோ³பிதங் க³ருப⁴ண்ட³ங், தங் ஸங்க⁴கம்மே ச சேதியகம்மே ச நிட்டி²தே அவஸேஸங் புக்³க³லிககம்மேபி தா³துங் வட்டதி, அக³ருப⁴ண்ட³த்தா பா⁴ஜிதும்பி லப்³ப⁴தி. ஸேனாஸனத்தா²ய ரக்கி²தகோ³பிதமேவ க³ருப⁴ண்ட³ங் ஹோதி, ந இதரங். ஸீஹளதீ³பே துமூலஸோமவிஹாரே ஸங்க⁴ஸ்ஸ பாகவத்தம்பி தாலபண்ணங் விக்கிணித்வா கரீயதி. கஸ்மா? ந ஹி தத்த² பண்ணேன அத்தோ² அத்தி², ஸப்³பே³பி இட்ட²கச்ச²ன்னா பாஸாதா³த³யோதி. ஏவங் அஞ்ஞத்தா²பி கரீயதி ஏவாதி வத³ந்தி.
Idāni ye cettha bhājitabbā, te dassetuṃ ‘‘niṭṭhite’’tiādimāha, saṅghassa vā cetiyassa vā kamme niṭṭhite bhājiyāti adhippāyo. Ettha pana yaṃ kiñci valliveḷutiṇapaṇṇamattikādi saṅghassa dinnaṃ vā saṅghike tiṇakhettādimhi jātakaṃ vā rakkhitagopitaṃ garubhaṇḍaṃ, taṃ saṅghakamme ca cetiyakamme ca niṭṭhite avasesaṃ puggalikakammepi dātuṃ vaṭṭati, agarubhaṇḍattā bhājitumpi labbhati. Senāsanatthāya rakkhitagopitameva garubhaṇḍaṃ hoti, na itaraṃ. Sīhaḷadīpe tumūlasomavihāre saṅghassa pākavattampi tālapaṇṇaṃ vikkiṇitvā karīyati. Kasmā? Na hi tattha paṇṇena attho atthi, sabbepi iṭṭhakacchannā pāsādādayoti. Evaṃ aññatthāpi karīyati evāti vadanti.
329. இதா³னி லோஹப⁴ண்டா³தீ³ஸு ஏகந்தபா⁴ஜேதப்³ப³ப⁴ண்ட³ங் த³ஸ்ஸேதுங் ‘‘பத்தாதீ³’’திஆதி³மாஹ. எத்த² (சூளவ॰ அட்ட²॰ 221) பன ஆதி³-ஸத்³தே³ன லோஹதா²லகதம்ப³ குண்டி³கா கடச்சு² ஸரக அஞ்ஜனி அஞ்ஜனிஸலாகாகண்ணமலஹரணீஸூசிஸண்டா³ஸகத்தரயட்டி²ஆதீ³னி க³ஹிதானேவ. ததா²தி பா⁴ஜியமேவாதி அத்தோ². விப்பகதஞ்ச அவிப்பகதஞ்ச. பாத³க³ண்ஹகந்தி மக³த⁴னாளியா பஞ்சனாளியா க³ண்ஹனங்.
329. Idāni lohabhaṇḍādīsu ekantabhājetabbabhaṇḍaṃ dassetuṃ ‘‘pattādī’’tiādimāha. Ettha (cūḷava. aṭṭha. 221) pana ādi-saddena lohathālakatamba kuṇḍikā kaṭacchu saraka añjani añjanisalākākaṇṇamalaharaṇīsūcisaṇḍāsakattarayaṭṭhiādīni gahitāneva. Tathāti bhājiyamevāti attho. Vippakatañca avippakatañca. Pādagaṇhakanti magadhanāḷiyā pañcanāḷiyā gaṇhanaṃ.
331-2. அனுஞ்ஞாதவாஸி யங் ஸக்கா ஸிபாடிகாய பக்கி²பித்வா பரிஹரிதுந்தி வுத்தா. தச்சி²தானிட்டி²தந்தி விப்பகதங். யதி³ தச்சி²தங், க³ருப⁴ண்ட³மேவ. த³ந்தங் பன அதச்சி²தஞ்ச அனிட்டி²தஞ்ச பா⁴ஜியமேவ. அனிட்டி²தங் மஞ்சபாதா³தி³கங் க³ருப⁴ண்ட³ங். இதா³னி மத்திகப⁴ண்ட³ங் த³ஸ்ஸேதுங் ‘‘பி⁴க்கூ²பகரணே’’திஆதி³மாஹ. பத்ததா²லககுண்டி³காதி³பி⁴க்கூ²பகரணே ச. பாத³க⁴டகோதி பாத³க³ண்ஹனகோ க⁴டகோ ச மத்திகாமயோ பா⁴ஜியோ பா⁴ஜேதப்³போ³தி அத்தோ². ஸங்க²தா²லகம்பி பா⁴ஜியமேவ.
331-2.Anuññātavāsi yaṃ sakkā sipāṭikāya pakkhipitvā pariharitunti vuttā. Tacchitāniṭṭhitanti vippakataṃ. Yadi tacchitaṃ, garubhaṇḍameva. Dantaṃ pana atacchitañca aniṭṭhitañca bhājiyameva. Aniṭṭhitaṃ mañcapādādikaṃ garubhaṇḍaṃ. Idāni mattikabhaṇḍaṃ dassetuṃ ‘‘bhikkhūpakaraṇe’’tiādimāha. Pattathālakakuṇḍikādibhikkhūpakaraṇe ca. Pādaghaṭakoti pādagaṇhanako ghaṭako ca mattikāmayo bhājiyo bhājetabboti attho. Saṅkhathālakampi bhājiyameva.
333-4. மிக³சம்மாதி³கங் கப்பியசம்மங் பா⁴ஜியங், ஸீஹசம்மாதி³கங் அகப்பியசம்மங் க³ருப⁴ண்ட³ங். தங் பன பூ⁴மத்த²ரணங் காதுங் வட்டதி. ஏளசம்மங் பன பச்சத்த²ரணக³திகத்தா க³ருப⁴ண்ட³ங் ஹோதி. இதா³னி இமானி பன பஞ்ச சீவரபிண்ட³பாதபே⁴ஸஜ்ஜானங் அத்தா²ய பரிவத்தேதுங் ந வட்டதி, க³ருப⁴ண்டே³ன பன க³ருப⁴ண்ட³ஞ்ச தா²வரஞ்ச தா²வரேன தா²வரமேவ பரிவத்தெத்வா பரிபு⁴ஞ்ஜிதப்³பா³னீதி த³ஸ்ஸேதுங் ‘‘க³ருனா’’திஆதி³மாஹ. தத்த² (சூளவ॰ அட்ட²॰ 321) க³ருனாதி க³ருப⁴ண்டே³ன க³ருப⁴ண்ட³ஞ்ச தா²வரஞ்ச பரிவத்தெய்யாதி ஸம்ப³ந்தோ⁴. தா²வரேன ச தா²வரமேவ பரிவத்தெய்ய, ந க³ருப⁴ண்ட³ந்தி அதி⁴ப்பாயோ. பஞ்சஸு கொட்டா²ஸேஸு பச்சி²மத்தயங் க³ருப⁴ண்ட³ங், புரிமத்³வயங் தா²வரந்தி வேதி³தப்³ப³ங் . ததா² கத்வா ச பு⁴ஞ்ஜதூதி ஏவங் பரிவத்தெத்வா ததோ ஆப⁴தங் கப்பியப⁴ண்ட³ங் பரிபு⁴ஞ்ஜதூதி அத்தோ². கத²ங் ஞாயதீதி சே? வுத்தஞ்ஹேதங் பரிவாரே-
333-4. Migacammādikaṃ kappiyacammaṃ bhājiyaṃ, sīhacammādikaṃ akappiyacammaṃ garubhaṇḍaṃ. Taṃ pana bhūmattharaṇaṃ kātuṃ vaṭṭati. Eḷacammaṃ pana paccattharaṇagatikattā garubhaṇḍaṃ hoti. Idāni imāni pana pañca cīvarapiṇḍapātabhesajjānaṃ atthāya parivattetuṃ na vaṭṭati, garubhaṇḍena pana garubhaṇḍañca thāvarañca thāvarena thāvarameva parivattetvā paribhuñjitabbānīti dassetuṃ ‘‘garunā’’tiādimāha. Tattha (cūḷava. aṭṭha. 321) garunāti garubhaṇḍena garubhaṇḍañca thāvarañca parivatteyyāti sambandho. Thāvarena ca thāvarameva parivatteyya, na garubhaṇḍanti adhippāyo. Pañcasu koṭṭhāsesu pacchimattayaṃ garubhaṇḍaṃ, purimadvayaṃ thāvaranti veditabbaṃ . Tathā katvā ca bhuñjatūti evaṃ parivattetvā tato ābhataṃ kappiyabhaṇḍaṃ paribhuñjatūti attho. Kathaṃ ñāyatīti ce? Vuttañhetaṃ parivāre-
‘‘அவிஸ்ஸஜ்ஜியங் அவேப⁴ங்கி³யங், பஞ்ச வுத்தா மஹேஸினா;
‘‘Avissajjiyaṃ avebhaṅgiyaṃ, pañca vuttā mahesinā;
விஸ்ஸஜ்ஜெந்தஸ்ஸ பரிபு⁴ஞ்ஜந்தஸ்ஸ அனாபத்தி,
Vissajjentassa paribhuñjantassa anāpatti,
பஞ்ஹா மேஸா குஸலேஹி சிந்திதா’’தி. (பரி॰ 479);
Pañhā mesā kusalehi cintitā’’ti. (pari. 479);
எத்த² பன க³ருப⁴ண்டே³ன க³ருப⁴ண்ட³ஞ்ச தா²வரஞ்ச தா²வரேன தா²வரமேவ பரிவத்தனவிதி⁴ங் ஸந்தா⁴ய ‘‘விஸ்ஸஜ்ஜந்தஸ்ஸ அனாபத்தீ’’தி வுத்தங். புன ததோ நிப்³ப³த்தஞ்ச சதுபச்சயங் பரிபு⁴ஞ்ஜிதுங் லப்³ப⁴தீதி தீ³பேதுங் ‘‘பரிபு⁴ஞ்ஜந்தஸ்ஸ அனாபத்தீ’’தி வுத்தங். அயங் இமிஸ்ஸா கா³தா²ய அதி⁴ப்பாயோ. ஸேஸந்தி (சூளவ॰ அட்ட²॰ 321) ஆராமாதி³ அபா⁴ஜியந்தி அத்தோ². அவேப⁴ங்கி³யவினிச்ச²யோ.
Ettha pana garubhaṇḍena garubhaṇḍañca thāvarañca thāvarena thāvarameva parivattanavidhiṃ sandhāya ‘‘vissajjantassa anāpattī’’ti vuttaṃ. Puna tato nibbattañca catupaccayaṃ paribhuñjituṃ labbhatīti dīpetuṃ ‘‘paribhuñjantassa anāpattī’’ti vuttaṃ. Ayaṃ imissā gāthāya adhippāyo. Sesanti (cūḷava. aṭṭha. 321) ārāmādi abhājiyanti attho. Avebhaṅgiyavinicchayo.
அவேப⁴ங்கி³யனித்³தே³ஸவண்ணனா நிட்டி²தா.
Avebhaṅgiyaniddesavaṇṇanā niṭṭhitā.
