| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๓๙. อวฎผลวโคฺค
39. Avaṭaphalavaggo
๑. อวฎผลทายกเตฺถรอปทานํ
1. Avaṭaphaladāyakattheraapadānaṃ
๑.
1.
‘‘สตรํสิ นาม ภควา, สยมฺภู อปราชิโต;
‘‘Sataraṃsi nāma bhagavā, sayambhū aparājito;
วิเวกกาโม สมฺพุโทฺธ, โคจรายาภินิกฺขมิฯ
Vivekakāmo sambuddho, gocarāyābhinikkhami.
๒.
2.
‘‘ผลหโตฺถ อหํ ทิสฺวา, อุปคจฺฉิํ นราสภํ;
‘‘Phalahattho ahaṃ disvā, upagacchiṃ narāsabhaṃ;
๓.
3.
‘‘จตุนฺนวุติโต กเปฺป, ยํ ผลมททิํ อหํ;
‘‘Catunnavutito kappe, yaṃ phalamadadiṃ ahaṃ;
ทุคฺคติํ นาภิชานามิ, ผลทานสฺสิทํ ผลํฯ
Duggatiṃ nābhijānāmi, phaladānassidaṃ phalaṃ.
๔.
4.
‘‘กิเลสา ฌาปิตา มยฺหํ, ภวา สเพฺพ สมูหตา;
‘‘Kilesā jhāpitā mayhaṃ, bhavā sabbe samūhatā;
นาโคว พนฺธนํ เฉตฺวา, วิหรามิ อนาสโวฯ
Nāgova bandhanaṃ chetvā, viharāmi anāsavo.
๕.
5.
‘‘สฺวาคตํ วต เม อาสิ, มม พุทฺธสฺส สนฺติเก;
‘‘Svāgataṃ vata me āsi, mama buddhassa santike;
ติโสฺส วิชฺชา อนุปฺปตฺตา, กตํ พุทฺธสฺส สาสนํฯ
Tisso vijjā anuppattā, kataṃ buddhassa sāsanaṃ.
๖.
6.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา อวฎผลทายโก เถโร อิมา คาถาโย อภาสิตฺถาติฯ
Itthaṃ sudaṃ āyasmā avaṭaphaladāyako thero imā gāthāyo abhāsitthāti.
อวฎผลทายกเตฺถรสฺสาปทานํ ปฐมํฯ
Avaṭaphaladāyakattherassāpadānaṃ paṭhamaṃ.
Footnotes:
