| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. အာဝရဏနီဝရဏသုတ္တဝဏ္ဏနာ
8. Āvaraṇanīvaraṇasuttavaṇṇanā
၂၁၉. အဋ္ဌမေ ပညာယ ဒုဗ္ဗလီကရဏာတိ ပညာယ မန္ဒဘာဝကရာ။ နီဝရဏာနဉ္ဟိ အဘိဏ္ဟုပ္ပာဒေ သတိ အန္တရန္တရာ ဥပ္ပဇ္ဇမာနာ ပညာ ဒုဗ္ဗလာ ဟောတိ မန္ဒာ အဝိသဒာ။
219. Aṭṭhame paññāya dubbalīkaraṇāti paññāya mandabhāvakarā. Nīvaraṇānañhi abhiṇhuppāde sati antarantarā uppajjamānā paññā dubbalā hoti mandā avisadā.
ပဉ္စ နီဝရဏာ တသ္မိံ သမယေ န ဟောန္တိ။ သတ္တဗောဇ္ဈင္ဂာ တသ္မိံ သမယေ ဘာဝနာပာရိပူရိံ ဂစ္ဆန္တီတိ အရိယသာဝကသ္သ ဟိ သပ္ပာယဓမ္မသ္သဝနံ သုဏန္တသ္သ ပဉ္စ နီဝရဏာ ဒူရေ ဟောန္တိ။ သော သစေ တသ္မိံယေဝ ဌာနေ ဝိသေသံ နိဗ္ဗတ္တေတုံ သက္ကောတိ, ဧဝမသ္သ သတ္တ ဗောဇ္ဈင္ဂာ ဘာဝနာပာရိပူရိံ ဂစ္ဆန္တိ။ နော စေ သက္ကောတိ, တတော ဝုဋ္ဌာယ ရတ္တိဋ္ဌာနဒိဝာဋ္ဌာနံ ဂတော တမေဝ ပီတိံ အဝိဇဟန္တော ပဉ္စ နီဝရဏေ ဝိက္ခမ္ဘေတ္ဝာ ဝိသေသံ နိဗ္ဗတ္တေသ္သတိ။ တတ္ထ အသက္ကောန္တောပိ ယာဝ သတ္တဒိဝသဗ္ဘန္တရာ တမေဝ ပီတိံ အဝိဇဟန္တော နီဝရဏေ ဝိက္ခမ္ဘေတ္ဝာ ဝိသေသံ နိဗ္ဗတ္တေသ္သတီတိ ဣဒံ သန္ဓာယေတံ ဝုတ္တံ။ ဓမ္မသ္သဝနဝသေန သကိံ ပီတိပာမောဇ္ဇပက္ခိယာ ပဋိလဒ္ဓဗောဇ္ဈင္ဂာ ဟိ ကမ္မာရာမတာဒီနိ အာဂမ္မ နသ္သန္တိ, တထာရူပံ ပန ဥတုသပ္ပာယာဒိံ လဘိတ္ဝာ ပုန ဥပ္ပဇ္ဇန္တာပိ တသ္မိံ သမယေ ဘာဝနာပာရိပူရိံ ဂစ္ဆန္တိ ဣစ္စေဝ ဝုစ္စတိ။
Pañca nīvaraṇā tasmiṃ samaye na honti. Sattabojjhaṅgā tasmiṃ samaye bhāvanāpāripūriṃ gacchantīti ariyasāvakassa hi sappāyadhammassavanaṃ suṇantassa pañca nīvaraṇā dūre honti. So sace tasmiṃyeva ṭhāne visesaṃ nibbattetuṃ sakkoti, evamassa satta bojjhaṅgā bhāvanāpāripūriṃ gacchanti. No ce sakkoti, tato vuṭṭhāya rattiṭṭhānadivāṭṭhānaṃ gato tameva pītiṃ avijahanto pañca nīvaraṇe vikkhambhetvā visesaṃ nibbattessati. Tattha asakkontopi yāva sattadivasabbhantarā tameva pītiṃ avijahanto nīvaraṇe vikkhambhetvā visesaṃ nibbattessatīti idaṃ sandhāyetaṃ vuttaṃ. Dhammassavanavasena sakiṃ pītipāmojjapakkhiyā paṭiladdhabojjhaṅgā hi kammārāmatādīni āgamma nassanti, tathārūpaṃ pana utusappāyādiṃ labhitvā puna uppajjantāpi tasmiṃ samaye bhāvanāpāripūriṃ gacchanti icceva vuccati.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. အာဝရဏနီဝရဏသုတ္တံ • 8. Āvaraṇanīvaraṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. အာဝရဏနီဝရဏသုတ္တဝဏ္ဏနာ • 8. Āvaraṇanīvaraṇasuttavaṇṇanā
