| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. အဝကုဇ္ဇသုတ္တဝဏ္ဏနာ
10. Avakujjasuttavaṇṇanā
၃၀. ဒသမေ အဝကုဇ္ဇပညောတိ အဓောမုခပညော။ ဥစ္ဆင္ဂပညောတိ ဥစ္ဆင္ဂသဒိသပညော။ ပုထုပညောတိ ဝိတ္ထာရိကပညော။ အာဒိကလ္ယာဏန္တိအာဒီသု အာဒီတိ ပုဗ္ဗပဋ္ဌပနာ။ မဇ္ဈန္တိ ကထာဝေမဇ္ဈံ။ ပရိယောသာနန္တိ သန္နိဋ္ဌာနံ။ ဣတိသ္သ တေ ဓမ္မံ ကထေန္တာ ပုဗ္ဗပဋ္ဌပနေပိ ကလ္ယာဏံ ဘဒ္ဒကံ အနဝဇ္ဇမေဝ ကတ္ဝာ ကထေန္တိ, ဝေမဇ္ဈေပိ ပရိယောသာနေပိ။ ဧတ္ထ စ အတ္ထိ ဒေသနာယ အာဒိမဇ္ဈပရိယောသာနာနိ, အတ္ထိ သာသနသ္သ။ တတ္ထ ဒေသနာယ တာဝ စတုပ္ပဒိကဂာထာယ ပဌမပဒံ အာဒိ, ဒ္ဝေ ပဒာနိ မဇ္ဈံ, အဝသာနပဒံ ပရိယောသာနံ။ ဧကာနုသန္ဓိကသ္သ သုတ္တသ္သ နိဒာနံ အာဒိ, အနုသန္ဓိ မဇ္ဈံ, ဣဒမဝောစာတိ အပ္ပနာ ပရိယောသာနံ။ အနေကာနုသန္ဓိကသ္သ ပဌမော အနုသန္ဓိ အာဒိ, တတော ပရံ ဧကော ဝာ အနေကေ ဝာ မဇ္ဈံ, ပစ္ဆိမော ပရိယောသာနံ။ အယံ တာဝ ဒေသနာယ နယော။ သာသနသ္သ ပန သီလံ အာဒိ, သမာဓိ မဇ္ဈံ, ဝိပသ္သနာ ပရိယောသာနံ။ သမာဓိ ဝာ အာဒိ, ဝိပသ္သနာ မဇ္ဈံ, မဂ္ဂော ပရိယောသာနံ။ ဝိပသ္သနာ ဝာ အာဒိ, မဂ္ဂော မဇ္ဈံ, ဖလံ ပရိယောသာနံ။ မဂ္ဂော ဝာ အာဒိ, ဖလံ မဇ္ဈံ, နိဗ္ဗာနံ ပရိယောသာနံ။ ဒ္ဝေ ဒ္ဝေ ဝာ ကယိရမာနေ သီလသမာဓယော အာဒိ, ဝိပသ္သနာမဂ္ဂာ မဇ္ဈံ, ဖလနိဗ္ဗာနာနိ ပရိယောသာနံ။
30. Dasame avakujjapaññoti adhomukhapañño. Ucchaṅgapaññoti ucchaṅgasadisapañño. Puthupaññoti vitthārikapañño. Ādikalyāṇantiādīsu ādīti pubbapaṭṭhapanā. Majjhanti kathāvemajjhaṃ. Pariyosānanti sanniṭṭhānaṃ. Itissa te dhammaṃ kathentā pubbapaṭṭhapanepi kalyāṇaṃ bhaddakaṃ anavajjameva katvā kathenti, vemajjhepi pariyosānepi. Ettha ca atthi desanāya ādimajjhapariyosānāni, atthi sāsanassa. Tattha desanāya tāva catuppadikagāthāya paṭhamapadaṃ ādi, dve padāni majjhaṃ, avasānapadaṃ pariyosānaṃ. Ekānusandhikassa suttassa nidānaṃ ādi, anusandhi majjhaṃ, idamavocāti appanā pariyosānaṃ. Anekānusandhikassa paṭhamo anusandhi ādi, tato paraṃ eko vā aneke vā majjhaṃ, pacchimo pariyosānaṃ. Ayaṃ tāva desanāya nayo. Sāsanassa pana sīlaṃ ādi, samādhi majjhaṃ, vipassanā pariyosānaṃ. Samādhi vā ādi, vipassanā majjhaṃ, maggo pariyosānaṃ. Vipassanā vā ādi, maggo majjhaṃ, phalaṃ pariyosānaṃ. Maggo vā ādi, phalaṃ majjhaṃ, nibbānaṃ pariyosānaṃ. Dve dve vā kayiramāne sīlasamādhayo ādi, vipassanāmaggā majjhaṃ, phalanibbānāni pariyosānaṃ.
သာတ္ထန္တိ သာတ္ထကံ ကတ္ဝာ ဒေသေန္တိ။ သဗ္ယဉ္ဇနန္တိ အက္ခရပာရိပူရိံ ကတ္ဝာ ဒေသေန္တိ။ ကေဝလပရိပုဏ္ဏန္တိ သကလပရိပုဏ္ဏံ အနူနံ ကတ္ဝာ ဒေသေန္တိ။ ပရိသုဒ္ဓန္တိ ပရိသုဒ္ဓံ နိဇ္ဇဋံ နိဂ္ဂဏ္ဌိံ ကတ္ဝာ ဒေသေန္တိ။ ဗ္ရဟ္မစရိယံ ပကာသေန္တီတိ ဧဝံ ဒေသေန္တာ စ သေဋ္ဌစရိယဘူတံ သိက္ခတ္တယသင္ဂဟိတံ အရိယံ အဋ္ဌင္ဂိကံ မဂ္ဂံ ပကာသေန္တိ။ နေဝ အာဒိံ မနသိ ကရောတီတိ နေဝ ပုဗ္ဗပဋ္ဌပနံ မနသိ ကရောတိ။
Sātthanti sātthakaṃ katvā desenti. Sabyañjananti akkharapāripūriṃ katvā desenti. Kevalaparipuṇṇanti sakalaparipuṇṇaṃ anūnaṃ katvā desenti. Parisuddhanti parisuddhaṃ nijjaṭaṃ niggaṇṭhiṃ katvā desenti. Brahmacariyaṃ pakāsentīti evaṃ desentā ca seṭṭhacariyabhūtaṃ sikkhattayasaṅgahitaṃ ariyaṃ aṭṭhaṅgikaṃ maggaṃ pakāsenti. Neva ādiṃ manasi karotīti neva pubbapaṭṭhapanaṃ manasi karoti.
ကုမ္ဘောတိ ဃဋော။ နိကုဇ္ဇောတိ အဓောမုခော ဌပိတော။ ဧဝမေဝ ခောတိ ဧတ္ထ ကုမ္ဘော နိကုဇ္ဇော ဝိယ အဝကုဇ္ဇပညော ပုဂ္ဂလော ဒဋ္ဌဗ္ဗော, ဥဒကာသိဉ္စနကာလော ဝိယ ဓမ္မဒေသနာယ လဒ္ဓကာလော, ဥဒကသ္သ ဝိဝဋ္ဋနကာလော ဝိယ တသ္မိံ အာသနေ နိသိန္နသ္သ ဥဂ္ဂဟေတုံ အသမတ္ထကာလော, ဥဒကသ္သ အသဏ္ဌာနကာလော ဝိယ ဝုဋ္ဌဟိတ္ဝာ အသလ္လက္ခဏကာလော ဝေဒိတဗ္ဗော။
Kumbhoti ghaṭo. Nikujjoti adhomukho ṭhapito. Evameva khoti ettha kumbho nikujjo viya avakujjapañño puggalo daṭṭhabbo, udakāsiñcanakālo viya dhammadesanāya laddhakālo, udakassa vivaṭṭanakālo viya tasmiṃ āsane nisinnassa uggahetuṃ asamatthakālo, udakassa asaṇṭhānakālo viya vuṭṭhahitvā asallakkhaṇakālo veditabbo.
အာကိဏ္ဏာနီတိ ပက္ခိတ္တာနိ။ သတိသမ္မောသာယ ပကိရေယ္ယာတိ မုဋ္ဌသ္သတိတာယ ဝိကိရေယ္ယ။ ဧဝမေဝ ခောတိ ဧတ္ထ ဥစ္ဆင္ဂော ဝိယ ဥစ္ဆင္ဂပညော ပုဂ္ဂလော ဒဋ္ဌဗ္ဗော, နာနာခဇ္ဇကာနိ ဝိယ နာနပ္ပကာရံ ဗုဒ္ဓဝစနံ, ဥစ္ဆင္ဂေ နာနာခဇ္ဇကာနိ ခာဒန္တသ္သ နိသိန္နကာလော ဝိယ တသ္မိံ အာသနေ နိသိန္နသ္သ ဥဂ္ဂဏ္ဟနကာလော, ဝုဋ္ဌဟန္တသ္သ သတိသမ္မောသာ ပကိရဏကာလော ဝိယ တသ္မာ အာသနာ ဝုဋ္ဌာယ ဂစ္ဆန္တသ္သ အသလ္လက္ခဏကာလော ဝေဒိတဗ္ဗော။
Ākiṇṇānīti pakkhittāni. Satisammosāya pakireyyāti muṭṭhassatitāya vikireyya. Evameva khoti ettha ucchaṅgo viya ucchaṅgapañño puggalo daṭṭhabbo, nānākhajjakāni viya nānappakāraṃ buddhavacanaṃ, ucchaṅge nānākhajjakāni khādantassa nisinnakālo viya tasmiṃ āsane nisinnassa uggaṇhanakālo, vuṭṭhahantassa satisammosā pakiraṇakālo viya tasmā āsanā vuṭṭhāya gacchantassa asallakkhaṇakālo veditabbo.
ဥက္ကုဇ္ဇောတိ ဥပရိမုခော ဌပိတော။ သဏ္ဌာတီတိ ပတိဋ္ဌဟတိ။ ဧဝမေဝ ခောတိ ဧတ္ထ ဥပရိမုခော ဌပိတော ကုမ္ဘော ဝိယ ပုထုပညော ပုဂ္ဂလော ဒဋ္ဌဗ္ဗော, ဥဒကသ္သ အာသိတ္တကာလော ဝိယ ဒေသနာယ လဒ္ဓကာလော, ဥဒကသ္သ သဏ္ဌာနကာလော ဝိယ တတ္ထ နိသိန္နသ္သ ဥဂ္ဂဏ္ဟနကာလော, နော ဝိဝဋ္ဋနကာလော ဝိယ ဝုဋ္ဌာယ ဂစ္ဆန္တသ္သ သလ္လက္ခဏကာလော ဝေဒိတဗ္ဗော။
Ukkujjoti uparimukho ṭhapito. Saṇṭhātīti patiṭṭhahati. Evameva khoti ettha uparimukho ṭhapito kumbho viya puthupañño puggalo daṭṭhabbo, udakassa āsittakālo viya desanāya laddhakālo, udakassa saṇṭhānakālo viya tattha nisinnassa uggaṇhanakālo, no vivaṭṭanakālo viya vuṭṭhāya gacchantassa sallakkhaṇakālo veditabbo.
ဒုမ္မေဓောတိ နိပ္ပညော။ အဝိစက္ခဏောတိ သံဝိဒဟနပညာယ ရဟိတော။ ဂန္တာတိ ဂမနသီလော။ သေယ္ယော ဧတေန ဝုစ္စတီတိ ဧတသ္မာ ပုဂ္ဂလာ ဥတ္တရိတရောတိ ဝုစ္စတိ။ ဓမ္မာနုဓမ္မပ္ပဋိပန္နောတိ နဝလောကုတ္တရဓမ္မသ္သ အနုဓမ္မံ သဟ သီလေန ပုဗ္ဗဘာဂပဋိပဒံ ပဋိပန္နော။ ဒုက္ခသ္သာတိ ဝဋ္ဋဒုက္ခသ္သ။ အန္တကရော သိယာတိ ကောဋိကရော ပရိစ္ဆေဒကရော ပရိဝဋုမကရော ဘဝေယ္ယာတိ။
Dummedhoti nippañño. Avicakkhaṇoti saṃvidahanapaññāya rahito. Gantāti gamanasīlo. Seyyo etena vuccatīti etasmā puggalā uttaritaroti vuccati. Dhammānudhammappaṭipannoti navalokuttaradhammassa anudhammaṃ saha sīlena pubbabhāgapaṭipadaṃ paṭipanno. Dukkhassāti vaṭṭadukkhassa. Antakaro siyāti koṭikaro paricchedakaro parivaṭumakaro bhaveyyāti.
ပုဂ္ဂလဝဂ္ဂော တတိယော။
Puggalavaggo tatiyo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. အဝကုဇ္ဇသုတ္တံ • 10. Avakujjasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. အဝကုဇ္ဇသုတ္တဝဏ္ဏနာ • 10. Avakujjasuttavaṇṇanā
