| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā |
၃၉. အတ္ထသန္ဒသ္သနဉာဏနိဒ္ဒေသဝဏ္ဏနာ
39. Atthasandassanañāṇaniddesavaṇṇanā
၉၀. အတ္ထသန္ဒသ္သနဉာဏနိဒ္ဒေသေ ပဉ္စက္ခန္ဓာတိအာဒီနိ ဝုတ္တတ္ထာနေဝ။ ပကာသေတီတိ ပာကဋံ ကရောတိ, သောတူနံ ဉာဏစက္ခုနာ ဒသ္သနံ သမ္ပာဒေတီတိ အတ္ထော။ နာနာဓမ္မာတိ လောကိယလောကုတ္တရာ သဗ္ဗဓမ္မာ ဝုတ္တာ။ ကသ္မာ ပကာသနာနိဒ္ဒေသေ လောကိယာ ဧဝ ဝုတ္တာတိ စေ? အနိစ္စာဒိဝသေန ပကာသနာယ အာရဒ္ဓတ္တာ။ လောကုတ္တရာနဉ္စ အသမ္မသနူပဂတ္တာ လောကုတ္တရာ န ဝုတ္တာ။ နာနာဓမ္မနိဒ္ဒေသေန ပန အတ္ထသန္ဒသ္သနနိဒ္ဒေသေန စ တေသံ သင္ဂဟိတတ္တာ ယထာ တေ ပကာသေတဗ္ဗာ, တထာ ပကာသနာ ပကာသနာယေဝ။ ပဇဟန္တောတိ သောတာရံ ပဇဟာပေန္တောတိ အတ္ထော။ သန္ဒသ္သေတီတိ သောတူနံ သမ္မာ ဒသ္သေတိ။ ကေစိ ပန ‘‘ကာမစ္ဆန္ဒသ္သ ပဟီနတ္တာ နေက္ခမ္မတ္ထံ သန္ဒသ္သေတီ’’တိအာဒိနာ နယေန ပဌန္တိ။ တေသံ ဥဇုကမေဝ သောတူနံ ဒောသပ္ပဟာနေ ဂုဏပဋိလာဘေ စ ကတေ သိခာပ္ပတ္တံ ဒေသနာဉာဏံ ဟောတီတိ ဒသ္သနတ္ထံ အယံ နယော ဝုတ္တောတိ ဝေဒိတဗ္ဗော။
90. Atthasandassanañāṇaniddese pañcakkhandhātiādīni vuttatthāneva. Pakāsetīti pākaṭaṃ karoti, sotūnaṃ ñāṇacakkhunā dassanaṃ sampādetīti attho. Nānādhammāti lokiyalokuttarā sabbadhammā vuttā. Kasmā pakāsanāniddese lokiyā eva vuttāti ce? Aniccādivasena pakāsanāya āraddhattā. Lokuttarānañca asammasanūpagattā lokuttarā na vuttā. Nānādhammaniddesena pana atthasandassananiddesena ca tesaṃ saṅgahitattā yathā te pakāsetabbā, tathā pakāsanā pakāsanāyeva. Pajahantoti sotāraṃ pajahāpentoti attho. Sandassetīti sotūnaṃ sammā dasseti. Keci pana ‘‘kāmacchandassa pahīnattā nekkhammatthaṃ sandassetī’’tiādinā nayena paṭhanti. Tesaṃ ujukameva sotūnaṃ dosappahāne guṇapaṭilābhe ca kate sikhāppattaṃ desanāñāṇaṃ hotīti dassanatthaṃ ayaṃ nayo vuttoti veditabbo.
အတ္ထသန္ဒသ္သနဉာဏနိဒ္ဒေသဝဏ္ဏနာ နိဋ္ဌိတာ။
Atthasandassanañāṇaniddesavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / ပဋိသမ္ဘိဒာမဂ္ဂပာဠိ • Paṭisambhidāmaggapāḷi / ၃၉. အတ္ထသန္ဒသ္သနဉာဏနိဒ္ဒေသော • 39. Atthasandassanañāṇaniddeso
