| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૭. અત્થસન્દસ્સકત્થેરઅપદાનવણ્ણના
7. Atthasandassakattheraapadānavaṇṇanā
વિસાલમાળે આસીનોતિઆદિકં આયસ્મતો અત્થસન્દસ્સકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ અત્તભાવેસુ કતપુઞ્ઞૂપચયો પદુમુત્તરસ્સ ભગવતો કાલે બ્રાહ્મણકુલે નિબ્બત્તો વુદ્ધિમન્વાય સકસિપ્પેસુ નિપ્ફત્તિં પત્તો તત્થ સારં અપસ્સન્તો ગેહં પહાય હિમવન્તં ગન્ત્વા રમણીયે ઠાને પણ્ણસાલં કત્વા પટિવસતિ, તદા સત્તાનુકમ્પાય હિમવન્તમાગતં પદુમુત્તરભગવન્તં દિસ્વા પસન્નમાનસો પઞ્ચઙ્ગસમન્નાગતો વન્દિત્વા થુતિવચનેહિ થોમેસિ. સો તેન પુઞ્ઞેન યાવતાયુકં કત્વા કાલઙ્કત્વા બ્રહ્મલોકૂપગો અહોસિ. સો અપરભાગે ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો સત્થુ ધમ્મદેસનં સુત્વા પટિલદ્ધસદ્ધો પબ્બજિત્વા અરહત્તં પાપુણિ.
Visālamāḷe āsīnotiādikaṃ āyasmato atthasandassakattherassa apadānaṃ. Ayampi purimabuddhesu katādhikāro anekesu attabhāvesu katapuññūpacayo padumuttarassa bhagavato kāle brāhmaṇakule nibbatto vuddhimanvāya sakasippesu nipphattiṃ patto tattha sāraṃ apassanto gehaṃ pahāya himavantaṃ gantvā ramaṇīye ṭhāne paṇṇasālaṃ katvā paṭivasati, tadā sattānukampāya himavantamāgataṃ padumuttarabhagavantaṃ disvā pasannamānaso pañcaṅgasamannāgato vanditvā thutivacanehi thomesi. So tena puññena yāvatāyukaṃ katvā kālaṅkatvā brahmalokūpago ahosi. So aparabhāge imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā paṭiladdhasaddho pabbajitvā arahattaṃ pāpuṇi.
૪૭. સો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો વિસાલમાળે આસીનોતિઆદિમાહ. તત્થ વિસાલમાળેતિ વિસાલં પત્થટં વિત્થિણ્ણં મહન્તં માળં વિસાલમાળં, તસ્મિં વિસાલમાળે આસીનો નિસિન્નો અહં લોકનાયકં અદ્દસન્તિ સમ્બન્ધો. તેસં સુવિઞ્ઞેય્યમેવાતિ.
47. So attano pubbakammaṃ saritvā somanassajāto pubbacaritāpadānaṃ pakāsento visālamāḷe āsīnotiādimāha. Tattha visālamāḷeti visālaṃ patthaṭaṃ vitthiṇṇaṃ mahantaṃ māḷaṃ visālamāḷaṃ, tasmiṃ visālamāḷe āsīno nisinno ahaṃ lokanāyakaṃ addasanti sambandho. Tesaṃ suviññeyyamevāti.
અત્થસન્દસ્સકત્થેરઅપદાનવણ્ણના સમત્તા.
Atthasandassakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૭. અત્થસન્દસ્સકત્થેરઅપદાનં • 7. Atthasandassakattheraapadānaṃ
