| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
១៦. អត្ថទស្សីពុទ្ធវំសោ
16. Atthadassībuddhavaṃso
១.
1.
តត្ថេវ មណ្ឌកប្បម្ហិ, អត្ថទស្សី មហាយសោ;
Tattheva maṇḍakappamhi, atthadassī mahāyaso;
មហាតមំ និហន្ត្វាន, បត្តោ សម្ពោធិមុត្តមំ។
Mahātamaṃ nihantvāna, patto sambodhimuttamaṃ.
២.
2.
ព្រហ្មុនា យាចិតោ សន្តោ, ធម្មចក្កំ បវត្តយិ;
Brahmunā yācito santo, dhammacakkaṃ pavattayi;
អមតេន តប្បយី លោកំ, ទសសហស្សិសទេវកំ។
Amatena tappayī lokaṃ, dasasahassisadevakaṃ.
៣.
3.
តស្សាបិ លោកនាថស្ស, អហេសុំ អភិសមយា តយោ;
Tassāpi lokanāthassa, ahesuṃ abhisamayā tayo;
កោដិសតសហស្សានំ, បឋមាភិសមយោ អហុ។
Koṭisatasahassānaṃ, paṭhamābhisamayo ahu.
៤.
4.
យទា ពុទ្ធោ អត្ថទស្សី, ចរតេ ទេវចារិកំ;
Yadā buddho atthadassī, carate devacārikaṃ;
កោដិសតសហស្សានំ, ទុតិយាភិសមយោ អហុ។
Koṭisatasahassānaṃ, dutiyābhisamayo ahu.
៥.
5.
បុនាបរំ យទា ពុទ្ធោ, ទេសេសិ បិតុសន្តិកេ;
Punāparaṃ yadā buddho, desesi pitusantike;
កោដិសតសហស្សានំ, តតិយាភិសមយោ អហុ។
Koṭisatasahassānaṃ, tatiyābhisamayo ahu.
៦.
6.
សន្និបាតា តយោ អាសុំ, តស្សាបិ ច មហេសិនោ;
Sannipātā tayo āsuṃ, tassāpi ca mahesino;
ខីណាសវានំ វិមលានំ, សន្តចិត្តាន តាទិនំ។
Khīṇāsavānaṃ vimalānaṃ, santacittāna tādinaṃ.
៧.
7.
អដ្ឋនវុតិសហស្សានំ , បឋមោ អាសិ សមាគមោ;
Aṭṭhanavutisahassānaṃ , paṭhamo āsi samāgamo;
អដ្ឋាសីតិសហស្សានំ, ទុតិយោ អាសិ សមាគមោ។
Aṭṭhāsītisahassānaṃ, dutiyo āsi samāgamo.
៨.
8.
អដ្ឋសត្តតិសតសហស្សានំ , តតិយោ អាសិ សមាគមោ;
Aṭṭhasattatisatasahassānaṃ , tatiyo āsi samāgamo;
អនុបាទា វិមុត្តានំ, វិមលានំ មហេសិនំ។
Anupādā vimuttānaṃ, vimalānaṃ mahesinaṃ.
៩.
9.
អហំ តេន សមយេន, ជដិលោ ឧគ្គតាបនោ;
Ahaṃ tena samayena, jaṭilo uggatāpano;
សុសីមោ នាម នាមេន, មហិយា សេដ្ឋសម្មតោ។
Susīmo nāma nāmena, mahiyā seṭṭhasammato.
១០.
10.
ទិព្ពំ មន្ទារវំ បុប្ផំ, បទុមំ បារិឆត្តកំ;
Dibbaṃ mandāravaṃ pupphaṃ, padumaṃ pārichattakaṃ;
ទេវលោកាហរិត្វាន, សម្ពុទ្ធមភិបូជយិំ។
Devalokāharitvāna, sambuddhamabhipūjayiṃ.
១១.
11.
សោបិ មំ ពុទ្ធោ ព្យាកាសិ, អត្ថទស្សី មហាមុនិ;
Sopi maṃ buddho byākāsi, atthadassī mahāmuni;
‘‘អដ្ឋារសេ កប្បសតេ, អយំ ពុទ្ធោ ភវិស្សតិ។
‘‘Aṭṭhārase kappasate, ayaṃ buddho bhavissati.
១២.
12.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១៣.
13.
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៤.
14.
សោភណំ នាម នគរំ, សាគរោ នាម ខត្តិយោ;
Sobhaṇaṃ nāma nagaraṃ, sāgaro nāma khattiyo;
សុទស្សនា នាម ជនិកា, អត្ថទស្សិស្ស សត្ថុនោ។
Sudassanā nāma janikā, atthadassissa satthuno.
១៥.
15.
ទសវស្សសហស្សានិ, អគារំ អជ្ឈ សោ វសិ;
Dasavassasahassāni, agāraṃ ajjha so vasi;
អមរគិរិ សុគិរិ វាហនា, តយោ បាសាទមុត្តមា។
Amaragiri sugiri vāhanā, tayo pāsādamuttamā.
១៦.
16.
តេត្តិំសញ្ច សហស្សានិ, នារិយោ សមលង្កតា;
Tettiṃsañca sahassāni, nāriyo samalaṅkatā;
វិសាខា នាម នារី ច, សេលោ នាមាសិ អត្រជោ។
Visākhā nāma nārī ca, selo nāmāsi atrajo.
១៧.
17.
និមិត្តេ ចតុរោ ទិស្វា, អស្សយានេន និក្ខមិ;
Nimitte caturo disvā, assayānena nikkhami;
អនូនអដ្ឋមាសានិ, បធានំ បទហី ជិនោ។
Anūnaaṭṭhamāsāni, padhānaṃ padahī jino.
១៨.
18.
ព្រហ្មុនា យាចិតោ សន្តោ, អត្ថទស្សី មហាយសោ;
Brahmunā yācito santo, atthadassī mahāyaso;
វត្តិ ចក្កំ មហាវីរោ, អនោមុយ្យានេ នរាសភោ។
Vatti cakkaṃ mahāvīro, anomuyyāne narāsabho.
១៩.
19.
សន្តោ ច ឧបសន្តោ ច, អហេសុំ អគ្គសាវកា;
Santo ca upasanto ca, ahesuṃ aggasāvakā;
អភយោ នាមុបដ្ឋាកោ, អត្ថទស្សិស្ស សត្ថុនោ។
Abhayo nāmupaṭṭhāko, atthadassissa satthuno.
២០.
20.
ធម្មា ចេវ សុធម្មា ច, អហេសុំ អគ្គសាវិកា;
Dhammā ceva sudhammā ca, ahesuṃ aggasāvikā;
ពោធិ តស្ស ភគវតោ, ចម្បកោតិ បវុច្ចតិ។
Bodhi tassa bhagavato, campakoti pavuccati.
២១.
21.
នកុលោ ច និសភោ ច, អហេសុំ អគ្គុបដ្ឋកា;
Nakulo ca nisabho ca, ahesuṃ aggupaṭṭhakā;
មកិលា ច សុនន្ទា ច, អហេសុំ អគ្គុបដ្ឋិកា។
Makilā ca sunandā ca, ahesuṃ aggupaṭṭhikā.
២២.
22.
សោបិ ពុទ្ធោ អសមសមោ, អសីតិហត្ថមុគ្គតោ;
Sopi buddho asamasamo, asītihatthamuggato;
សោភតេ សាលរាជាវ, ឧឡុរាជាវ បូរិតោ។
Sobhate sālarājāva, uḷurājāva pūrito.
២៣.
23.
តស្ស បាកតិកា រំសី, អនេកសតកោដិយោ;
Tassa pākatikā raṃsī, anekasatakoṭiyo;
ឧទ្ធំ អធោ ទស ទិសា, ផរន្តិ យោជនំ សទា។
Uddhaṃ adho dasa disā, pharanti yojanaṃ sadā.
២៤.
24.
សោបិ ពុទ្ធោ នរាសភោ, សព្ពសត្តុត្តមោ មុនិ;
Sopi buddho narāsabho, sabbasattuttamo muni;
វស្សសតសហស្សានិ, លោកេ អដ្ឋាសិ ចក្ខុមា។
Vassasatasahassāni, loke aṭṭhāsi cakkhumā.
២៥.
25.
សោបិ អនិច្ចតំ បត្តោ, យថគ្គុបាទានសង្ខយា។
Sopi aniccataṃ patto, yathaggupādānasaṅkhayā.
២៦.
26.
អត្ថទស្សី ជិនវរោ, អនោមារាមម្ហិ និព្ពុតោ;
Atthadassī jinavaro, anomārāmamhi nibbuto;
ធាតុវិត្ថារិកំ អាសិ, តេសុ តេសុ បទេសតោតិ។
Dhātuvitthārikaṃ āsi, tesu tesu padesatoti.
អត្ថទស្សិស្ស ភគវតោ វំសោ ចុទ្ទសមោ។
Atthadassissa bhagavato vaṃso cuddasamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ១៦. អត្ថទស្សីពុទ្ធវំសវណ្ណនា • 16. Atthadassībuddhavaṃsavaṇṇanā
