| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၂. အတ္တာနုဒိဋ္ဌိပဟာနသုတ္တံ
12. Attānudiṭṭhipahānasuttaṃ
၁၆၇. အထ ခော အညတရော ဘိက္ခု။ပေ.။ ဧတဒဝောစ – ‘‘ကထံ နု ခော , ဘန္တေ, ဇာနတော ကထံ ပသ္သတော အတ္တာနုဒိဋ္ဌိ ပဟီယတီ’’တိ? ‘‘စက္ခုံ ခော, ဘိက္ခု, အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတိ။ ရူပေ အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတိ။ စက္ခုဝိညာဏံ အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတိ။ စက္ခုသမ္ဖသ္သံ အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတိ။ ယမ္ပိဒံ စက္ခုသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတိ။ပေ.။ ဇိဝ္ဟံ အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတိ။ပေ.။ မနံ အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတိ။ ဓမ္မေ။ မနောဝိညာဏံ။ မနောသမ္ဖသ္သံ။ ယမ္ပိဒံ မနောသမ္ဖသ္သပစ္စယာ ဥပ္ပဇ္ဇတိ ဝေဒယိတံ သုခံ ဝာ ဒုက္ခံ ဝာ အဒုက္ခမသုခံ ဝာ တမ္ပိ အနတ္တတော ဇာနတော ပသ္သတော အတ္တာနုဒိဋ္ဌိ ပဟီယတီ’’တိ။ ဒ္ဝာဒသမံ။
167. Atha kho aññataro bhikkhu…pe… etadavoca – ‘‘kathaṃ nu kho , bhante, jānato kathaṃ passato attānudiṭṭhi pahīyatī’’ti? ‘‘Cakkhuṃ kho, bhikkhu, anattato jānato passato attānudiṭṭhi pahīyati. Rūpe anattato jānato passato attānudiṭṭhi pahīyati. Cakkhuviññāṇaṃ anattato jānato passato attānudiṭṭhi pahīyati. Cakkhusamphassaṃ anattato jānato passato attānudiṭṭhi pahīyati. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi anattato jānato passato attānudiṭṭhi pahīyati…pe… jivhaṃ anattato jānato passato attānudiṭṭhi pahīyati…pe… manaṃ anattato jānato passato attānudiṭṭhi pahīyati. Dhamme… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi anattato jānato passato attānudiṭṭhi pahīyatī’’ti. Dvādasamaṃ.
နန္ဒိက္ခယဝဂ္ဂော သောဠသမော။
Nandikkhayavaggo soḷasamo.
တသ္သုဒ္ဒာနံ –
Tassuddānaṃ –
နန္ဒိက္ခယေန စတ္တာရော၊ ဇီဝကမ္ဗဝနေ ဒုဝေ။
Nandikkhayena cattāro, jīvakambavane duve;
ကောဋ္ဌိကေန တယော ဝုတ္တာ၊ မိစ္ဆာ သက္ကာယ အတ္တနောတိ။
Koṭṭhikena tayo vuttā, micchā sakkāya attanoti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀-၁၂. မိစ္ဆာဒိဋ္ဌိပဟာနသုတ္တာဒိဝဏ္ဏနာ • 10-12. Micchādiṭṭhipahānasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀-၁၂. မိစ္ဆာဒိဋ္ဌိပဟာနသုတ္တာဒိဝဏ္ဏနာ • 10-12. Micchādiṭṭhipahānasuttādivaṇṇanā
