| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
११. अतीतानागतसमन्नागतकथावण्णना
11. Atītānāgatasamannāgatakathāvaṇṇanā
५६८-५७०. इदानि अतीतानागतेहि समन्नागतकथा नाम होति। तत्थ समन्नागतपञ्ञत्ति पटिलाभपञ्ञत्तीति द्वे पञ्ञत्तियो वेदितब्बा। तासु पच्चुप्पन्नधम्मसमङ्गी समन्नागतोति वुच्चति। अट्ठ समापत्तिलाभिनो पन समापत्तियो किञ्चापि न एकक्खणे पवत्तन्ति, अञ्ञा अतीता होन्ति, अञ्ञा अनागता, अञ्ञा पच्चुप्पन्ना, पटिविज्झित्वा अपरिहीनताय पन लाभीति वुच्चति। तत्थ येसं इमं विभागं अग्गहेत्वा यस्मा झानलाभीनं अतीतानागतानि झानानिपि अत्थि, तस्मा ‘‘ते अतीतेनपि अनागतेनपि समन्नागता’’ति लद्धि, सेय्यथापि अन्धकानं। ते सन्धाय पुच्छा सकवादिस्स, पटिञ्ञा इतरस्स। सेसमेत्थ उत्तानत्थमेवाति। ‘‘अट्ठविमोक्खझायी’’तिआदि पन लाभीभावस्स साधकं, न समन्नागतभावस्साति।
568-570. Idāni atītānāgatehi samannāgatakathā nāma hoti. Tattha samannāgatapaññatti paṭilābhapaññattīti dve paññattiyo veditabbā. Tāsu paccuppannadhammasamaṅgī samannāgatoti vuccati. Aṭṭha samāpattilābhino pana samāpattiyo kiñcāpi na ekakkhaṇe pavattanti, aññā atītā honti, aññā anāgatā, aññā paccuppannā, paṭivijjhitvā aparihīnatāya pana lābhīti vuccati. Tattha yesaṃ imaṃ vibhāgaṃ aggahetvā yasmā jhānalābhīnaṃ atītānāgatāni jhānānipi atthi, tasmā ‘‘te atītenapi anāgatenapi samannāgatā’’ti laddhi, seyyathāpi andhakānaṃ. Te sandhāya pucchā sakavādissa, paṭiññā itarassa. Sesamettha uttānatthamevāti. ‘‘Aṭṭhavimokkhajhāyī’’tiādi pana lābhībhāvassa sādhakaṃ, na samannāgatabhāvassāti.
अतीतानागतसमन्नागतकथावण्णना।
Atītānāgatasamannāgatakathāvaṇṇanā.
नवमो वग्गो।
Navamo vaggo.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (९४) ११. अतीतानागतसमन्नागतकथा • (94) 11. Atītānāgatasamannāgatakathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ११. अतीतानागतसमन्नागतकथावण्णना • 11. Atītānāgatasamannāgatakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ११. अतीतानागतसमन्नागतकथावण्णना • 11. Atītānāgatasamannāgatakathāvaṇṇanā
