| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১১. অতীতানাগতসমন্নাগতকথাৰণ্ণনা
11. Atītānāgatasamannāgatakathāvaṇṇanā
৫৬৮-৫৭০. ইদানি অতীতানাগতেহি সমন্নাগতকথা নাম হোতি। তত্থ সমন্নাগতপঞ্ঞত্তি পটিলাভপঞ্ঞত্তীতি দ্ৰে পঞ্ঞত্তিযো ৰেদিতব্বা। তাসু পচ্চুপ্পন্নধম্মসমঙ্গী সমন্নাগতোতি ৰুচ্চতি। অট্ঠ সমাপত্তিলাভিনো পন সমাপত্তিযো কিঞ্চাপি ন একক্খণে পৰত্তন্তি, অঞ্ঞা অতীতা হোন্তি, অঞ্ঞা অনাগতা, অঞ্ঞা পচ্চুপ্পন্না, পটিৰিজ্ঝিত্ৰা অপরিহীনতায পন লাভীতি ৰুচ্চতি। তত্থ যেসং ইমং ৰিভাগং অগ্গহেত্ৰা যস্মা ঝানলাভীনং অতীতানাগতানি ঝানানিপি অত্থি, তস্মা ‘‘তে অতীতেনপি অনাগতেনপি সমন্নাগতা’’তি লদ্ধি, সেয্যথাপি অন্ধকানং। তে সন্ধায পুচ্ছা সকৰাদিস্স, পটিঞ্ঞা ইতরস্স। সেসমেত্থ উত্তানত্থমেৰাতি। ‘‘অট্ঠৰিমোক্খঝাযী’’তিআদি পন লাভীভাৰস্স সাধকং, ন সমন্নাগতভাৰস্সাতি।
568-570. Idāni atītānāgatehi samannāgatakathā nāma hoti. Tattha samannāgatapaññatti paṭilābhapaññattīti dve paññattiyo veditabbā. Tāsu paccuppannadhammasamaṅgī samannāgatoti vuccati. Aṭṭha samāpattilābhino pana samāpattiyo kiñcāpi na ekakkhaṇe pavattanti, aññā atītā honti, aññā anāgatā, aññā paccuppannā, paṭivijjhitvā aparihīnatāya pana lābhīti vuccati. Tattha yesaṃ imaṃ vibhāgaṃ aggahetvā yasmā jhānalābhīnaṃ atītānāgatāni jhānānipi atthi, tasmā ‘‘te atītenapi anāgatenapi samannāgatā’’ti laddhi, seyyathāpi andhakānaṃ. Te sandhāya pucchā sakavādissa, paṭiññā itarassa. Sesamettha uttānatthamevāti. ‘‘Aṭṭhavimokkhajhāyī’’tiādi pana lābhībhāvassa sādhakaṃ, na samannāgatabhāvassāti.
অতীতানাগতসমন্নাগতকথাৰণ্ণনা।
Atītānāgatasamannāgatakathāvaṇṇanā.
নৰমো ৰগ্গো।
Navamo vaggo.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৯৪) ১১. অতীতানাগতসমন্নাগতকথা • (94) 11. Atītānāgatasamannāgatakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১১. অতীতানাগতসমন্নাগতকথাৰণ্ণনা • 11. Atītānāgatasamannāgatakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১১. অতীতানাগতসমন্নাগতকথাৰণ্ণনা • 11. Atītānāgatasamannāgatakathāvaṇṇanā
