15. Chattavaggo

1. Atichattiyattheraapadānaṃ

1.

‘‘Parinibbute bhagavati, atthadassīnaruttame;

Chattātichattaṃ ² kāretvā, thūpamhi abhiropayiṃ.

2.

‘‘Kālena kālamāgantvā, namassiṃ lokanāyakaṃ ⁴;

Pupphacchadanaṃ katvāna, chattamhi abhiropayiṃ.

3.

‘‘Sattarase kappasate, devarajjamakārayiṃ;

Manussattaṃ na gacchāmi, thūpapūjāyidaṃ phalaṃ.

4.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā atichattiyo ⁶ thero imā gāthāyo abhāsitthāti.

Atichattiyattherassāpadānaṃ paṭhamaṃ.