| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. အသုရိန္ဒကသုတ္တဝဏ္ဏနာ
3. Asurindakasuttavaṇṇanā
၁၈၉. တေနေဝာတိ ဘာတုပဗ္ဗဇိတေနေဝ။ အသ္သေဝာတိ တိတိက္ခသ္သ။ ‘‘တံ ဇယံ ဟောတီ’’တိ လိင္ဂဝိပလ္လာသဝသေန ဝုတ္တန္တိ အာဟ ‘‘သော ဇယော ဟောတီ’’တိ, ဒုဇ္ဇယံ ကောဓံ တိတိက္ခာယ ဇိနန္တသ္သာတိ အဓိပ္ပာယော။ ယသ္မာ တိတိက္ခာဒယော န ကောဓဝသိကံ ဓုရံ, တံ ပန ဗာလာနံ မညနာမတ္တန္တိ ဣဓ ဣမမတ္ထံ ဝိဘာဝေတုံ ‘‘ကတမသ္သာ’’တိအာဒိ ဝုတ္တံ။ ဝိဇာနတောဝ ဇယော န အဝိဇာနတော တိတိက္ခာယ အဘာဝတော။ န ဟိ အဝိဇာနန္တော အန္ဓဗာလော ကောဓံ ဝိဇေတုံ သက္ကောတိ။ ကေဝလံ ဇယံ မညတိ ကိလေသေဟိ ပရာဇိတော သမာနောပီတိ အဓိပ္ပာယော။
189.Tenevāti bhātupabbajiteneva. Assevāti titikkhassa. ‘‘Taṃ jayaṃ hotī’’ti liṅgavipallāsavasena vuttanti āha ‘‘so jayo hotī’’ti, dujjayaṃ kodhaṃ titikkhāya jinantassāti adhippāyo. Yasmā titikkhādayo na kodhavasikaṃ dhuraṃ, taṃ pana bālānaṃ maññanāmattanti idha imamatthaṃ vibhāvetuṃ ‘‘katamassā’’tiādi vuttaṃ. Vijānatova jayo na avijānato titikkhāya abhāvato. Na hi avijānanto andhabālo kodhaṃ vijetuṃ sakkoti. Kevalaṃ jayaṃ maññati kilesehi parājito samānopīti adhippāyo.
အသုရိန္ဒကသုတ္တဝဏ္ဏနာ နိဋ္ဌိတာ။
Asurindakasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. အသုရိန္ဒကသုတ္တံ • 3. Asurindakasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. အသုရိန္ဒကသုတ္တဝဏ္ဏနာ • 3. Asurindakasuttavaṇṇanā
