| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. அஸுரிந்த³கஸுத்தங்
3. Asurindakasuttaṃ
189. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அஸ்ஸோஸி கோ² அஸுரிந்த³கபா⁴ரத்³வாஜோ ப்³ராஹ்மணோ – ‘‘பா⁴ரத்³வாஜகொ³த்தோ ப்³ராஹ்மணோ கிர ஸமணஸ்ஸ கோ³தமஸ்ஸ ஸந்திகே அகா³ரஸ்மா அனகா³ரியங் பப்³ப³ஜிதோ’’தி குபிதோ அனத்தமனோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அஸப்³பா⁴ஹி ப²ருஸாஹி வாசாஹி அக்கோஸதி பரிபா⁴ஸதி. ஏவங் வுத்தே, ப⁴க³வா துண்ஹீ அஹோஸி. அத² கோ² அஸுரிந்த³கபா⁴ரத்³வாஜோ ப்³ராஹ்மணோ ப⁴க³வந்தங் ஏதத³வோச – ‘‘ஜிதோஸி, ஸமண, ஜிதோஸி, ஸமணா’’தி.
189. Ekaṃ samayaṃ bhagavā rājagahe viharati veḷuvane kalandakanivāpe. Assosi kho asurindakabhāradvājo brāhmaṇo – ‘‘bhāradvājagotto brāhmaṇo kira samaṇassa gotamassa santike agārasmā anagāriyaṃ pabbajito’’ti kupito anattamano yena bhagavā tenupasaṅkami; upasaṅkamitvā bhagavantaṃ asabbhāhi pharusāhi vācāhi akkosati paribhāsati. Evaṃ vutte, bhagavā tuṇhī ahosi. Atha kho asurindakabhāradvājo brāhmaṇo bhagavantaṃ etadavoca – ‘‘jitosi, samaṇa, jitosi, samaṇā’’ti.
‘‘ஜயங் வே மஞ்ஞதி பா³லோ, வாசாய ப²ருஸங் ப⁴ணங்;
‘‘Jayaṃ ve maññati bālo, vācāya pharusaṃ bhaṇaṃ;
ஜயஞ்சேவஸ்ஸ தங் ஹோதி, யா திதிக்கா² விஜானதோ.
Jayañcevassa taṃ hoti, yā titikkhā vijānato.
‘‘தஸ்ஸேவ தேன பாபியோ, யோ குத்³த⁴ங் படிகுஜ்ஜ²தி;
‘‘Tasseva tena pāpiyo, yo kuddhaṃ paṭikujjhati;
குத்³த⁴ங் அப்படிகுஜ்ஜ²ந்தோ, ஸங்கா³மங் ஜேதி து³ஜ்ஜயங்.
Kuddhaṃ appaṭikujjhanto, saṅgāmaṃ jeti dujjayaṃ.
‘‘உபி⁴ன்னமத்த²ங் சரதி, அத்தனோ ச பரஸ்ஸ ச;
‘‘Ubhinnamatthaṃ carati, attano ca parassa ca;
பரங் ஸங்குபிதங் ஞத்வா, யோ ஸதோ உபஸம்மதி.
Paraṃ saṅkupitaṃ ñatvā, yo sato upasammati.
‘‘உபி⁴ன்னங் திகிச்ச²ந்தானங், அத்தனோ ச பரஸ்ஸ ச;
‘‘Ubhinnaṃ tikicchantānaṃ, attano ca parassa ca;
ஜனா மஞ்ஞந்தி பா³லோதி, யே த⁴ம்மஸ்ஸ அகோவிதா³’’தி.
Janā maññanti bāloti, ye dhammassa akovidā’’ti.
ஏவங் வுத்தே, அஸுரிந்த³கபா⁴ரத்³வாஜோ ப்³ராஹ்மணோ ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம…பே॰… அப்³ப⁴ஞ்ஞாஸி. அஞ்ஞதரோ ச பனாயஸ்மா பா⁴ரத்³வாஜோ அரஹதங் அஹோஸீ’’தி.
Evaṃ vutte, asurindakabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… abbhaññāsi. Aññataro ca panāyasmā bhāradvājo arahataṃ ahosī’’ti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. அஸுரிந்த³கஸுத்தவண்ணனா • 3. Asurindakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. அஸுரிந்த³கஸுத்தவண்ணனா • 3. Asurindakasuttavaṇṇanā
