| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೬. ಅಸುಭಾನುಪಸ್ಸೀಸುತ್ತಂ
6. Asubhānupassīsuttaṃ
೮೫. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
85. Vuttañhetaṃ bhagavatā, vuttamarahatāti me sutaṃ –
‘‘ಅಸುಭಾನುಪಸ್ಸೀ, ಭಿಕ್ಖವೇ, ಕಾಯಸ್ಮಿಂ ವಿಹರಥ; ಆನಾಪಾನಸ್ಸತಿ ಚ ವೋ ಅಜ್ಝತ್ತಂ ಪರಿಮುಖಂ ಸೂಪಟ್ಠಿತಾ ಹೋತು; ಸಬ್ಬಸಙ್ಖಾರೇಸು ಅನಿಚ್ಚಾನುಪಸ್ಸಿನೋ ವಿಹರಥ। ಅಸುಭಾನುಪಸ್ಸೀನಂ, ಭಿಕ್ಖವೇ, ಕಾಯಸ್ಮಿಂ ವಿಹರತಂ ಯೋ ಸುಭಾಯ ಧಾತುಯಾ ರಾಗಾನುಸಯೋ ಸೋ ಪಹೀಯತಿ 1। ಆನಾಪಾನಸ್ಸತಿಯಾ ಅಜ್ಝತ್ತಂ ಪರಿಮುಖಂ ಸೂಪಟ್ಠಿತಿತಾಯ ಯೇ ಬಾಹಿರಾ ವಿತಕ್ಕಾಸಯಾ ವಿಘಾತಪಕ್ಖಿಕಾ, ತೇ ನ ಹೋನ್ತಿ। ಸಬ್ಬಸಙ್ಖಾರೇಸು ಅನಿಚ್ಚಾನುಪಸ್ಸೀನಂ ವಿಹರತಂ ಯಾ ಅವಿಜ್ಜಾ ಸಾ ಪಹೀಯತಿ, ಯಾ ವಿಜ್ಜಾ ಸಾ ಉಪ್ಪಜ್ಜತೀ’’ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Asubhānupassī, bhikkhave, kāyasmiṃ viharatha; ānāpānassati ca vo ajjhattaṃ parimukhaṃ sūpaṭṭhitā hotu; sabbasaṅkhāresu aniccānupassino viharatha. Asubhānupassīnaṃ, bhikkhave, kāyasmiṃ viharataṃ yo subhāya dhātuyā rāgānusayo so pahīyati 2. Ānāpānassatiyā ajjhattaṃ parimukhaṃ sūpaṭṭhititāya ye bāhirā vitakkāsayā vighātapakkhikā, te na honti. Sabbasaṅkhāresu aniccānupassīnaṃ viharataṃ yā avijjā sā pahīyati, yā vijjā sā uppajjatī’’ti. Etamatthaṃ bhagavā avoca. Tatthetaṃ iti vuccati –
‘‘ಅಸುಭಾನುಪಸ್ಸೀ ಕಾಯಸ್ಮಿಂ, ಆನಾಪಾನೇ ಪಟಿಸ್ಸತೋ।
‘‘Asubhānupassī kāyasmiṃ, ānāpāne paṭissato;
ಸಬ್ಬಸಙ್ಖಾರಸಮಥಂ, ಪಸ್ಸಂ ಆತಾಪಿ ಸಬ್ಬದಾ॥
Sabbasaṅkhārasamathaṃ, passaṃ ātāpi sabbadā.
‘‘ಸ ವೇ ಸಮ್ಮದ್ದಸೋ ಭಿಕ್ಖು, ಯತೋ ತತ್ಥ ವಿಮುಚ್ಚತಿ।
‘‘Sa ve sammaddaso bhikkhu, yato tattha vimuccati;
ಅಭಿಞ್ಞಾವೋಸಿತೋ ಸನ್ತೋ, ಸ ವೇ ಯೋಗಾತಿಗೋ ಮುನೀ’’ತಿ॥
Abhiññāvosito santo, sa ve yogātigo munī’’ti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ಛಟ್ಠಂ।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೬. ಅಸುಭಾನುಪಸ್ಸೀಸುತ್ತವಣ್ಣನಾ • 6. Asubhānupassīsuttavaṇṇanā
