| Library / Tipiṭaka / တိပိဋက • Tipiṭaka / ဣတိဝုတ္တကပာဠိ • Itivuttakapāḷi |
၆. အသုဘာနုပသ္သီသုတ္တံ
6. Asubhānupassīsuttaṃ
၈၅. ဝုတ္တဉ္ဟေတံ ဘဂဝတာ, ဝုတ္တမရဟတာတိ မေ သုတံ –
85. Vuttañhetaṃ bhagavatā, vuttamarahatāti me sutaṃ –
‘‘အသုဘာနုပသ္သီ, ဘိက္ခဝေ, ကာယသ္မိံ ဝိဟရထ; အာနာပာနသ္သတိ စ ဝော အဇ္ဈတ္တံ ပရိမုခံ သူပဋ္ဌိတာ ဟောတု; သဗ္ဗသင္ခာရေသု အနိစ္စာနုပသ္သိနော ဝိဟရထ။ အသုဘာနုပသ္သီနံ, ဘိက္ခဝေ, ကာယသ္မိံ ဝိဟရတံ ယော သုဘာယ ဓာတုယာ ရာဂာနုသယော သော ပဟီယတိ 1။ အာနာပာနသ္သတိယာ အဇ္ဈတ္တံ ပရိမုခံ သူပဋ္ဌိတိတာယ ယေ ဗာဟိရာ ဝိတက္ကာသယာ ဝိဃာတပက္ခိကာ, တေ န ဟောန္တိ။ သဗ္ဗသင္ခာရေသု အနိစ္စာနုပသ္သီနံ ဝိဟရတံ ယာ အဝိဇ္ဇာ သာ ပဟီယတိ, ယာ ဝိဇ္ဇာ သာ ဥပ္ပဇ္ဇတီ’’တိ။ ဧတမတ္ထံ ဘဂဝာ အဝောစ။ တတ္ထေတံ ဣတိ ဝုစ္စတိ –
‘‘Asubhānupassī, bhikkhave, kāyasmiṃ viharatha; ānāpānassati ca vo ajjhattaṃ parimukhaṃ sūpaṭṭhitā hotu; sabbasaṅkhāresu aniccānupassino viharatha. Asubhānupassīnaṃ, bhikkhave, kāyasmiṃ viharataṃ yo subhāya dhātuyā rāgānusayo so pahīyati 2. Ānāpānassatiyā ajjhattaṃ parimukhaṃ sūpaṭṭhititāya ye bāhirā vitakkāsayā vighātapakkhikā, te na honti. Sabbasaṅkhāresu aniccānupassīnaṃ viharataṃ yā avijjā sā pahīyati, yā vijjā sā uppajjatī’’ti. Etamatthaṃ bhagavā avoca. Tatthetaṃ iti vuccati –
‘‘အသုဘာနုပသ္သီ ကာယသ္မိံ၊ အာနာပာနေ ပဋိသ္သတော။
‘‘Asubhānupassī kāyasmiṃ, ānāpāne paṭissato;
သဗ္ဗသင္ခာရသမထံ၊ ပသ္သံ အာတာပိ သဗ္ဗဒာ။
Sabbasaṅkhārasamathaṃ, passaṃ ātāpi sabbadā.
‘‘သ ဝေ သမ္မဒ္ဒသော ဘိက္ခု၊ ယတော တတ္ထ ဝိမုစ္စတိ။
‘‘Sa ve sammaddaso bhikkhu, yato tattha vimuccati;
အဘိညာဝောသိတော သန္တော၊ သ ဝေ ယောဂာတိဂော မုနီ’’တိ။
Abhiññāvosito santo, sa ve yogātigo munī’’ti.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ။ ဆဋ္ဌံ။
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဣတိဝုတ္တက-အဋ္ဌကထာ • Itivuttaka-aṭṭhakathā / ၆. အသုဘာနုပသ္သီသုတ္တဝဏ္ဏနာ • 6. Asubhānupassīsuttavaṇṇanā
