| Library / Tipiṭaka / તિપિટક • Tipiṭaka / ઇતિવુત્તકપાળિ • Itivuttakapāḷi |
૬. અસુભાનુપસ્સીસુત્તં
6. Asubhānupassīsuttaṃ
૮૫. વુત્તઞ્હેતં ભગવતા, વુત્તમરહતાતિ મે સુતં –
85. Vuttañhetaṃ bhagavatā, vuttamarahatāti me sutaṃ –
‘‘અસુભાનુપસ્સી, ભિક્ખવે, કાયસ્મિં વિહરથ; આનાપાનસ્સતિ ચ વો અજ્ઝત્તં પરિમુખં સૂપટ્ઠિતા હોતુ; સબ્બસઙ્ખારેસુ અનિચ્ચાનુપસ્સિનો વિહરથ. અસુભાનુપસ્સીનં, ભિક્ખવે, કાયસ્મિં વિહરતં યો સુભાય ધાતુયા રાગાનુસયો સો પહીયતિ 1. આનાપાનસ્સતિયા અજ્ઝત્તં પરિમુખં સૂપટ્ઠિતિતાય યે બાહિરા વિતક્કાસયા વિઘાતપક્ખિકા, તે ન હોન્તિ. સબ્બસઙ્ખારેસુ અનિચ્ચાનુપસ્સીનં વિહરતં યા અવિજ્જા સા પહીયતિ, યા વિજ્જા સા ઉપ્પજ્જતી’’તિ. એતમત્થં ભગવા અવોચ. તત્થેતં ઇતિ વુચ્ચતિ –
‘‘Asubhānupassī, bhikkhave, kāyasmiṃ viharatha; ānāpānassati ca vo ajjhattaṃ parimukhaṃ sūpaṭṭhitā hotu; sabbasaṅkhāresu aniccānupassino viharatha. Asubhānupassīnaṃ, bhikkhave, kāyasmiṃ viharataṃ yo subhāya dhātuyā rāgānusayo so pahīyati 2. Ānāpānassatiyā ajjhattaṃ parimukhaṃ sūpaṭṭhititāya ye bāhirā vitakkāsayā vighātapakkhikā, te na honti. Sabbasaṅkhāresu aniccānupassīnaṃ viharataṃ yā avijjā sā pahīyati, yā vijjā sā uppajjatī’’ti. Etamatthaṃ bhagavā avoca. Tatthetaṃ iti vuccati –
‘‘અસુભાનુપસ્સી કાયસ્મિં, આનાપાને પટિસ્સતો;
‘‘Asubhānupassī kāyasmiṃ, ānāpāne paṭissato;
સબ્બસઙ્ખારસમથં, પસ્સં આતાપિ સબ્બદા.
Sabbasaṅkhārasamathaṃ, passaṃ ātāpi sabbadā.
‘‘સ વે સમ્મદ્દસો ભિક્ખુ, યતો તત્થ વિમુચ્ચતિ;
‘‘Sa ve sammaddaso bhikkhu, yato tattha vimuccati;
અભિઞ્ઞાવોસિતો સન્તો, સ વે યોગાતિગો મુની’’તિ.
Abhiññāvosito santo, sa ve yogātigo munī’’ti.
અયમ્પિ અત્થો વુત્તો ભગવતા, ઇતિ મે સુતન્તિ. છટ્ઠં.
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / ઇતિવુત્તક-અટ્ઠકથા • Itivuttaka-aṭṭhakathā / ૬. અસુભાનુપસ્સીસુત્તવણ્ણના • 6. Asubhānupassīsuttavaṇṇanā
