| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༡. ཨསྶཱསཔསྶཱསནིརོདྷཔཉྷོ
11. Assāsapassāsanirodhapañho
༡༡. རཱཛཱ ཨཱཧ ‘‘བྷནྟེ ནཱགསེན, ཏུམྷེ ཨེཝཾ བྷཎཐ ‘སཀྐཱ ཨསྶཱསཔསྶཱསེ ནིརོདྷེཏུ’’’ནྟི? ‘‘ཨཱམ, མཧཱརཱཛ, སཀྐཱ ཨསྶཱསཔསྶཱསེ ནིརོདྷེཏུ’’ནྟི། ‘‘ཀཐཾ, བྷནྟེ ནཱགསེན, སཀྐཱ ཨསྶཱསཔསྶཱསེ ནིརོདྷེཏུ’’ནྟི། ‘‘ཏཾ ཀིཾ མཉྙསི, མཧཱརཱཛ, སུཏཔུབྦོ ཏེ ཀོཙི ཀཱཀཙྪམཱནོ’’ཏི། ‘‘ཨཱམ, བྷནྟེ, སུཏཔུབྦོ’’ཏི། ‘‘ཀིཾ ནུ ཁོ, མཧཱརཱཛ, སོ སདྡོ ཀཱཡེ ནམིཏེ ཝིརམེཡྻཱ’’ཏི། ‘‘ཨཱམ, བྷནྟེ, ཝིརམེཡྻཱ’’ཏི། ‘‘སོ ཧི ནཱམ, མཧཱརཱཛ, སདྡོ ཨབྷཱཝིཏཀཱཡསྶ ཨབྷཱཝིཏསཱིལསྶ ཨབྷཱཝིཏཙིཏྟསྶ ཨབྷཱཝིཏཔཉྙསྶ ཀཱཡེ ནམིཏེ ཝིརམིསྶཏི, ཀིཾ པན བྷཱཝིཏཀཱཡསྶ བྷཱཝིཏསཱིལསྶ བྷཱཝིཏཙིཏྟསྶ བྷཱཝིཏཔཉྙསྶ ཙཏུཏྠཛ྄ཛྷཱནཾ སམཱཔནྣསྶ ཨསྶཱསཔསྶཱསཱ ན ནིརུཛ྄ཛྷིསྶནྟཱི’’ཏི།
11. Rājā āha ‘‘bhante nāgasena, tumhe evaṃ bhaṇatha ‘sakkā assāsapassāse nirodhetu’’’nti? ‘‘Āma, mahārāja, sakkā assāsapassāse nirodhetu’’nti. ‘‘Kathaṃ, bhante nāgasena, sakkā assāsapassāse nirodhetu’’nti. ‘‘Taṃ kiṃ maññasi, mahārāja, sutapubbo te koci kākacchamāno’’ti. ‘‘Āma, bhante, sutapubbo’’ti. ‘‘Kiṃ nu kho, mahārāja, so saddo kāye namite virameyyā’’ti. ‘‘Āma, bhante, virameyyā’’ti. ‘‘So hi nāma, mahārāja, saddo abhāvitakāyassa abhāvitasīlassa abhāvitacittassa abhāvitapaññassa kāye namite viramissati, kiṃ pana bhāvitakāyassa bhāvitasīlassa bhāvitacittassa bhāvitapaññassa catutthajjhānaṃ samāpannassa assāsapassāsā na nirujjhissantī’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ཨསྶཱསཔསྶཱསནིརོདྷཔཉྷོ ཨེཀཱདསམོ།
Assāsapassāsanirodhapañho ekādasamo.
