| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
३. अस्साजानीयसुत्तवण्णना
3. Assājānīyasuttavaṇṇanā
१३. ततिये अङ्गेहीति गुणङ्गेहि। तस्सं दिसायं जातो होतीति तस्सं सिन्धुनदीतीरदिसायं जातो होति। अञ्ञेपि भद्रा अस्साजानीया तत्थेव जायन्ति। अल्लं वा सुक्खं वाति अल्लतिणं वा सुक्खतिणं वा। नाञ्ञे अस्से उब्बेजेताति अञ्ञे अस्से न उब्बेजेति न पहरति न डंसति न कलहं करोति। साठेय्यानीति सठभावो। कूटेय्यानीति कूटभावो। जिम्हेय्यानीति जिम्हभावो। वङ्केय्यानीति वङ्कभावा। इच्चस्स चतूहिपि पदेहि असिक्खितभावोव कथितो । वाहीति वहनसभावो दिन्नोवादपटिकरो। याव जीवितमरणपरियादानाति याव जीवितस्स मरणेन परियोसाना। सक्कच्चं परिभुञ्जतीति अमतं विय पच्चवेक्खित्वा परिभुञ्जति। पुरिसथामेनातिआदीसु ञाणथामादयो कथिता। सण्ठानन्ति ओसक्कनं पटिप्पस्सद्धि।
13. Tatiye aṅgehīti guṇaṅgehi. Tassaṃ disāyaṃ jāto hotīti tassaṃ sindhunadītīradisāyaṃ jāto hoti. Aññepi bhadrā assājānīyā tattheva jāyanti. Allaṃ vā sukkhaṃ vāti allatiṇaṃ vā sukkhatiṇaṃ vā. Nāññe asse ubbejetāti aññe asse na ubbejeti na paharati na ḍaṃsati na kalahaṃ karoti. Sāṭheyyānīti saṭhabhāvo. Kūṭeyyānīti kūṭabhāvo. Jimheyyānīti jimhabhāvo. Vaṅkeyyānīti vaṅkabhāvā. Iccassa catūhipi padehi asikkhitabhāvova kathito . Vāhīti vahanasabhāvo dinnovādapaṭikaro. Yāvajīvitamaraṇapariyādānāti yāva jīvitassa maraṇena pariyosānā. Sakkaccaṃ paribhuñjatīti amataṃ viya paccavekkhitvā paribhuñjati. Purisathāmenātiādīsu ñāṇathāmādayo kathitā. Saṇṭhānanti osakkanaṃ paṭippassaddhi.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ३. अस्साजानीयसुत्तं • 3. Assājānīyasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ३-४. अस्साजानीयसुत्तादिवण्णना • 3-4. Assājānīyasuttādivaṇṇanā
