| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. အာသဝသုတ္တံ
10. Āsavasuttaṃ
၄၁၆. ‘‘တယောမေ , ဘိက္ခဝေ အာသဝာ။ ကတမေ တယော? ကာမာသဝော, ဘဝာသဝော, အဝိဇ္ဇာသဝော – ဣမေ ခော, ဘိက္ခဝေ, တယော အာသဝာ။ ဣမေသံ ခော, ဘိက္ခဝေ, တိဏ္ဏန္နံ အာသဝာနံ ပဟာနာယ စတ္တာရော သတိပဋ္ဌာနာ ဘာဝေတဗ္ဗာ။
416. ‘‘Tayome , bhikkhave āsavā. Katame tayo? Kāmāsavo, bhavāsavo, avijjāsavo – ime kho, bhikkhave, tayo āsavā. Imesaṃ kho, bhikkhave, tiṇṇannaṃ āsavānaṃ pahānāya cattāro satipaṭṭhānā bhāvetabbā.
‘‘ကတမေ စတ္တာရော? ဣဓ, ဘိက္ခဝေ, ဘိက္ခု ကာယေ ကာယာနုပသ္သီ ဝိဟရတိ အာတာပီ သမ္ပဇာနော သတိမာ, ဝိနေယ္ယ လောကေ အဘိဇ္ဈာဒောမနသ္သံ; ဝေဒနာသု။ပေ.။ စိတ္တေ။ပေ.။ ဓမ္မေသု ဓမ္မာနုပသ္သီ ဝိဟရတိ အာတာပီ သမ္ပဇာနော သတိမာ, ဝိနေယ္ယ လောကေ အဘိဇ္ဈာဒောမနသ္သံ။ ဣမေသံ ခော, ဘိက္ခဝေ, တိဏ္ဏန္နံ အာသဝာနံ ပဟာနာယ ဣမေ စတ္တာရော သတိပဋ္ဌာနာ ဘာဝေတဗ္ဗာ’’တိ။ ဒသမံ။
‘‘Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Imesaṃ kho, bhikkhave, tiṇṇannaṃ āsavānaṃ pahānāya ime cattāro satipaṭṭhānā bhāvetabbā’’ti. Dasamaṃ.
အမတဝဂ္ဂော ပဉ္စမော။
Amatavaggo pañcamo.
တသ္သုဒ္ဒာနံ –
Tassuddānaṃ –
အမတံ သမုဒယော မဂ္ဂော၊ သတိ ကုသလရာသိ စ။
Amataṃ samudayo maggo, sati kusalarāsi ca;
ပာတိမောက္ခံ ဒုစ္စရိတံ၊ မိတ္တဝေဒနာ အာသဝေန စာတိ။
Pātimokkhaṃ duccaritaṃ, mittavedanā āsavena cāti.
