| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
55. ஆஸவக்க²யஞாணனித்³தே³ஸவண்ணனா
55. Āsavakkhayañāṇaniddesavaṇṇanā
107. ஆஸவக்க²யஞாணனித்³தே³ஸே அனஞ்ஞாதஞ்ஞஸ்ஸாமீதிந்த்³ரியாதீ³னி வுத்தத்தா²னி. கதி டா²னானி க³ச்ச²தீதி ஏகேகஸ்ஸ உப்பத்திட்டா²னநியமனத்த²ங் புச்சா². ஏகங் டா²னங் க³ச்ச²தீதி ஏகஸ்மிங் டா²னே உப்பஜ்ஜதீதி வுத்தங் ஹோதி. உப்பத்திஓகாஸட்டா²னஞ்ஹி திட்ட²தி எத்தா²தி டா²னந்தி வுச்சதி. ச² டா²னானீதி ச² மக்³க³ப²லக்க²ணே. இந்த்³ரியானங் அனஞ்ஞாதஞ்ஞஸ்ஸாமீதிந்த்³ரியாதீ³ஸு தீஸு ஏகேகமேவ அதி⁴கங் ஹோதீதி த³ஸ்ஸனத்த²ங் ஸத்³தி⁴ந்த்³ரியங் அதி⁴மொக்க²பரிவாரங் ஹோதீதிஆதி³ வுத்தங். யதா² ‘‘ஸத்³தி⁴ந்த்³ரியஸ்ஸ அதி⁴மொக்க²ட்டோ²’’திஆதீ³ஸு (படி॰ ம॰ 1.12) அதி⁴மொக்கா²த³யோ ஸத்³தி⁴ந்த்³ரியாதீ³னங் கிச்சவஸேன வுத்தா, ஏவமிதா⁴பி ‘‘அதி⁴மொக்க²பரிவாரங் ஹோதீ’’தி ஸத்³தி⁴ந்த்³ரியங் அதி⁴மொக்க²த்தே²ன பரிவாரங் ஹோதீதி வுத்தங் ஹோதி. ஏஸ நயோ ஸேஸேஸுபி. பரிவாரந்தி ச லிங்க³விபல்லாஸோ கதோ. பஞ்ஞிந்த்³ரியந்தி அனஞ்ஞாதஞ்ஞஸ்ஸாமீதிந்த்³ரியமேவ பஜானநஸபா⁴வத³ஸ்ஸனத்த²ங் விஸுங் கத்வா வுத்தங். அபி⁴த⁴ம்மேபி (விப⁴॰ 219) ஹி பஞ்ஞாய கிச்சவிஸேஸத³ஸ்ஸனத்த²ங் மக்³க³க்க²ணே ச ப²லக்க²ணே ச ஏகாவ பஞ்ஞா அட்ட²தா⁴ விப⁴த்தா. அபி⁴ஸந்த³னபரிவாரந்தி ந்ஹானியசுண்ணானங் உத³கங் விய சித்தசேதஸிகானங் ஸினேஹனகிச்சேன பரிவாரங் ஹோதி. இத³ங் ஸோமனஸ்ஸஸம்பயுத்தமக்³க³வஸேனேவ வுத்தங். உபெக்கா²ஸம்பயுத்தமக்³கே³ பன ஸோமனஸ்ஸிந்த்³ரியட்டா²னே உபெக்கி²ந்த்³ரியங் த³ட்ட²ப்³ப³ங். தங் பன ஸம்பயுத்தானங் நாதிஉபப்³ரூஹனபரிவாரந்தி க³ஹேதப்³ப³ங். பவத்தஸந்ததாதி⁴பதெய்யபரிவாரந்தி பவத்தா ஸந்ததி பவத்தஸந்ததி, வத்தமானஸந்தானந்தி அத்தோ². அதி⁴பதிபா⁴வோ ஆதி⁴பதெய்யங், பவத்தஸந்ததியா ஆதி⁴பதெய்யங் பவத்தஸந்ததாதி⁴பதெய்யங். வத்தமானஜீவிதிந்த்³ரியஸ்ஸ உபரிபவத்தியா ச பச்சயத்தா புப்³பா³பரவஸேன பவத்தஸந்ததியா அதி⁴பதிபா⁴வேன அனஞ்ஞாதஞ்ஞஸ்ஸாமீதிந்த்³ரியஸ்ஸ பரிவாரங் ஹோதி.
107. Āsavakkhayañāṇaniddese anaññātaññassāmītindriyādīni vuttatthāni. Kati ṭhānāni gacchatīti ekekassa uppattiṭṭhānaniyamanatthaṃ pucchā. Ekaṃ ṭhānaṃ gacchatīti ekasmiṃ ṭhāne uppajjatīti vuttaṃ hoti. Uppattiokāsaṭṭhānañhi tiṭṭhati etthāti ṭhānanti vuccati. Cha ṭhānānīti cha maggaphalakkhaṇe. Indriyānaṃ anaññātaññassāmītindriyādīsu tīsu ekekameva adhikaṃ hotīti dassanatthaṃ saddhindriyaṃ adhimokkhaparivāraṃ hotītiādi vuttaṃ. Yathā ‘‘saddhindriyassa adhimokkhaṭṭho’’tiādīsu (paṭi. ma. 1.12) adhimokkhādayo saddhindriyādīnaṃ kiccavasena vuttā, evamidhāpi ‘‘adhimokkhaparivāraṃ hotī’’ti saddhindriyaṃ adhimokkhatthena parivāraṃ hotīti vuttaṃ hoti. Esa nayo sesesupi. Parivāranti ca liṅgavipallāso kato. Paññindriyanti anaññātaññassāmītindriyameva pajānanasabhāvadassanatthaṃ visuṃ katvā vuttaṃ. Abhidhammepi (vibha. 219) hi paññāya kiccavisesadassanatthaṃ maggakkhaṇe ca phalakkhaṇe ca ekāva paññā aṭṭhadhā vibhattā. Abhisandanaparivāranti nhāniyacuṇṇānaṃ udakaṃ viya cittacetasikānaṃ sinehanakiccena parivāraṃ hoti. Idaṃ somanassasampayuttamaggavaseneva vuttaṃ. Upekkhāsampayuttamagge pana somanassindriyaṭṭhāne upekkhindriyaṃ daṭṭhabbaṃ. Taṃ pana sampayuttānaṃ nātiupabrūhanaparivāranti gahetabbaṃ. Pavattasantatādhipateyyaparivāranti pavattā santati pavattasantati, vattamānasantānanti attho. Adhipatibhāvo ādhipateyyaṃ, pavattasantatiyā ādhipateyyaṃ pavattasantatādhipateyyaṃ. Vattamānajīvitindriyassa uparipavattiyā ca paccayattā pubbāparavasena pavattasantatiyā adhipatibhāvena anaññātaññassāmītindriyassa parivāraṃ hoti.
ஸோதாபத்திமக்³க³க்க²ணே ஜாதா த⁴ம்மாதிஆதி³ ஸப்³பே³ஸங் மக்³க³ஸம்பயுத்தகானங் வண்ணப⁴ணனத்த²ங் வுத்தங். தத்த² மக்³க³க்க²ணே ஜாதாதி மக்³க³ஸமுட்டி²தா ஏவ, ந அஞ்ஞே. யஸ்மா பன மக்³க³ஸமுட்டி²தம்பி ரூபங் குஸலாதி³னாமங் ந லப⁴தி, தஸ்மா தங் அபனெந்தோ ட²பெத்வா சித்தஸமுட்டா²னங் ரூபந்தி ஆஹ. ஸப்³பே³வ ஹி தே த⁴ம்மா குச்சி²தானங் ஸலனாதீ³ஹி அத்தே²ஹி குஸலா. தே ஆரம்மணங் கத்வா பவத்தமானா நத்தி² ஏதேஸங் ஆஸவாதி அனாஸவா. வட்டமூலங் சி²ந்த³ந்தா நிப்³பா³னங் ஆரம்மணங் கத்வா வட்டதோ நிய்யந்தீதி நிய்யானிகா. குஸலாகுஸலஸங்கா²தா சயா அபேதத்தா அபசயஸங்கா²தங் நிப்³பா³னங் ஆரம்மணங் கத்வா பவத்தனதோ அபசயங் க³ச்ச²ந்தீதி அபசயகா³மினோ, பவத்தங் அபசினந்தா வித்³த⁴ங்ஸெந்தா க³ச்ச²ந்தீதிபி அபசயகா³மினோ. லோகே அபரியாபன்னபா⁴வேன லோகதோ உத்தரா உத்திண்ணாதி லோகுத்தரா. நிப்³பா³னங் ஆரம்மணங் ஏதேஸந்தி நிப்³பா³னாரம்மணா.
Sotāpattimaggakkhaṇejātā dhammātiādi sabbesaṃ maggasampayuttakānaṃ vaṇṇabhaṇanatthaṃ vuttaṃ. Tattha maggakkhaṇe jātāti maggasamuṭṭhitā eva, na aññe. Yasmā pana maggasamuṭṭhitampi rūpaṃ kusalādināmaṃ na labhati, tasmā taṃ apanento ṭhapetvā cittasamuṭṭhānaṃ rūpanti āha. Sabbeva hi te dhammā kucchitānaṃ salanādīhi atthehi kusalā. Te ārammaṇaṃ katvā pavattamānā natthi etesaṃ āsavāti anāsavā. Vaṭṭamūlaṃ chindantā nibbānaṃ ārammaṇaṃ katvā vaṭṭato niyyantīti niyyānikā. Kusalākusalasaṅkhātā cayā apetattā apacayasaṅkhātaṃ nibbānaṃ ārammaṇaṃ katvā pavattanato apacayaṃ gacchantīti apacayagāmino, pavattaṃ apacinantā viddhaṃsentā gacchantītipi apacayagāmino. Loke apariyāpannabhāvena lokato uttarā uttiṇṇāti lokuttarā. Nibbānaṃ ārammaṇaṃ etesanti nibbānārammaṇā.
இமானி அட்டி²ந்த்³ரியானீதிஆதி³ புப்³பே³ வுத்தபரிவாரபா⁴வஸ்ஸ ச தேன ஸஹக³தாதி³பா⁴வஸ்ஸ ச ஆதி³வுத்தஆகாரானஞ்ச தீ³பனத்த²ங் வுத்தங். தத்த² அட்டி²ந்த்³ரியானீதி புப்³பே³ வுத்தனயேன பஞ்ஞிந்த்³ரியேன ஸஹ அட்ட². ஸஹஜாதபரிவாராதி அட்ட²ஸு ஏகேகேன ஸஹ இதரே இதரே ஸத்த ஸஹஜாதா ஹுத்வா தஸ்ஸ ஸஹஜாதபரிவாரா ஹொந்தி. ததே²வ அஞ்ஞங் அஞ்ஞஸ்ஸ அஞ்ஞங் அஞ்ஞஸ்ஸாதி ஏவங் அஞ்ஞமஞ்ஞபரிவாரா ஹொந்தி. ததே²வ அஞ்ஞமஞ்ஞங் நிஸ்ஸயபரிவாரா ஸம்பயுத்தபரிவாரா ச ஹொந்தி. ஸஹக³தாதி தேன அனஞ்ஞாதஞ்ஞஸ்ஸாமீதிந்த்³ரியேன ஸஹ ஏகுப்பாதா³தி³பா⁴வங் க³தா. ஸஹஜாதாதி தேனேவ ஸஹ ஜாதா. ஸங்ஸட்டா²தி தேனேவ ஸஹ மிஸ்ஸிதா. ஸம்பயுத்தாதி தேனேவ ஸமங் ஏகுப்பாதா³தி³பகாரேஹி யுத்தா. தேவாதி தே ஏவ அட்ட² இந்த்³ரியத⁴ம்மா. தஸ்ஸாதி அனஞ்ஞாதஞ்ஞஸ்ஸாமீதிந்த்³ரியஸ்ஸ. ஆகாராதி பரிவாரகொட்டா²ஸா.
Imāni aṭṭhindriyānītiādi pubbe vuttaparivārabhāvassa ca tena sahagatādibhāvassa ca ādivuttaākārānañca dīpanatthaṃ vuttaṃ. Tattha aṭṭhindriyānīti pubbe vuttanayena paññindriyena saha aṭṭha. Sahajātaparivārāti aṭṭhasu ekekena saha itare itare satta sahajātā hutvā tassa sahajātaparivārā honti. Tatheva aññaṃ aññassa aññaṃ aññassāti evaṃ aññamaññaparivārā honti. Tatheva aññamaññaṃ nissayaparivārā sampayuttaparivārā ca honti. Sahagatāti tena anaññātaññassāmītindriyena saha ekuppādādibhāvaṃ gatā. Sahajātāti teneva saha jātā. Saṃsaṭṭhāti teneva saha missitā. Sampayuttāti teneva samaṃ ekuppādādipakārehi yuttā. Tevāti te eva aṭṭha indriyadhammā. Tassāti anaññātaññassāmītindriyassa. Ākārāti parivārakoṭṭhāsā.
ப²லக்க²ணே ஜாதா த⁴ம்மா ஸப்³பே³வ அப்³யாகதா ஹொந்தீதி ரூபஸ்ஸபி அப்³யாகதத்தா சித்தஸமுட்டா²னரூபேன ஸஹ வுத்தா. மக்³க³ஸ்ஸேவ குஸலத்தா நிய்யானிகத்தா அபசயகா³மித்தா ச ப²லக்க²ணே ‘‘குஸலா’’தி ச ‘‘நிய்யானிகா’’தி ச ‘‘அபசயகா³மினோ’’தி ச ந வுத்தங். இதீதிஆதி³ வுத்தப்பகாரனிக³மனங். தத்த² அட்ட²ட்ட²கானீதி அட்ட²ஸு மக்³க³ப²லேஸு ஏகேகஸ்ஸ அட்ட²கஸ்ஸ வஸேன அட்ட² இந்த்³ரியஅட்ட²கானி. சதுஸட்டி² ஹொந்தீதி சதுஸட்டி² ஆகாரா ஹொந்தி. ஆஸவாதிஆதி³ ஹெட்டா² வுத்தத்த²மேவ . இத⁴ அரஹத்தமக்³க³வஜ்ஜே²யேவ ஆஸவே அவத்வா ஸேஸமக்³க³த்தயவஜ்ஜா²னம்பி வசனங் ஆஸவக்க²யவசனஸாமஞ்ஞமத்தேன வுத்தந்தி வேதி³தப்³ப³ங். அரஹத்தமக்³க³ஞாணமேவ ஹி கேசி ஆஸவே அஸேஸெத்வா ஆஸவானங் கே²பனதோ ‘‘க²யே ஞாண’’ந்தி வுச்சதி. தஸ்மாயேவ ச அரஹாயேவ கீ²ணாஸவோதி வுச்சதீதி.
Phalakkhaṇe jātā dhammā sabbeva abyākatā hontīti rūpassapi abyākatattā cittasamuṭṭhānarūpena saha vuttā. Maggasseva kusalattā niyyānikattā apacayagāmittā ca phalakkhaṇe ‘‘kusalā’’ti ca ‘‘niyyānikā’’ti ca ‘‘apacayagāmino’’ti ca na vuttaṃ. Itītiādi vuttappakāranigamanaṃ. Tattha aṭṭhaṭṭhakānīti aṭṭhasu maggaphalesu ekekassa aṭṭhakassa vasena aṭṭha indriyaaṭṭhakāni. Catusaṭṭhi hontīti catusaṭṭhi ākārā honti. Āsavātiādi heṭṭhā vuttatthameva . Idha arahattamaggavajjheyeva āsave avatvā sesamaggattayavajjhānampi vacanaṃ āsavakkhayavacanasāmaññamattena vuttanti veditabbaṃ. Arahattamaggañāṇameva hi keci āsave asesetvā āsavānaṃ khepanato ‘‘khaye ñāṇa’’nti vuccati. Tasmāyeva ca arahāyeva khīṇāsavoti vuccatīti.
ஆஸவக்க²யஞாணனித்³தே³ஸவண்ணனா நிட்டி²தா.
Āsavakkhayañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 55. ஆஸவக்க²யஞாணனித்³தே³ஸோ • 55. Āsavakkhayañāṇaniddeso
