| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. দুতিযৰগ্গো
2. Dutiyavaggo
২৩-৩৩. অসঙ্খতসুত্তাদিৰণ্ণনা
23-33. Asaṅkhatasuttādivaṇṇanā
৩৭৭-৪০৯. তত্থ চ নত্থি এত্থ তণ্হাসঙ্খাতং নতং, নত্থি এতস্মিং ৰা অধিগতে পুগ্গলভাৰোতি অনতং। অনাসৰন্তি এত্থাপি এসেৰ নযো। সচ্চধম্মতায সচ্চং। ৰট্টদুক্খতো পারমেতীতি পারং। সণ্হট্ঠেনাতি সুখুমট্ঠেন নিপুণং। ততো এৰ দুদ্দসতায। অজজ্জরং নিচ্চসভাৰত্তা। নত্থি এতস্স নিদস্সনন্তি ৰা অনিদস্সনং। এতস্মিং অধিগতে নত্থি সংসারে। পপঞ্চন্তি ৰা নিপ্পপঞ্চং।
377-409. Tattha ca natthi ettha taṇhāsaṅkhātaṃ nataṃ, natthi etasmiṃ vā adhigate puggalabhāvoti anataṃ. Anāsavanti etthāpi eseva nayo. Saccadhammatāya saccaṃ. Vaṭṭadukkhato pārametīti pāraṃ. Saṇhaṭṭhenāti sukhumaṭṭhena nipuṇaṃ. Tato eva duddasatāya. Ajajjaraṃ niccasabhāvattā. Natthi etassa nidassananti vā anidassanaṃ. Etasmiṃ adhigate natthi saṃsāre. Papañcanti vā nippapañcaṃ.
এতস্মিং অধিগতে পুগ্গলস্স মরণং নত্থীতি ৰা অমতং। অতপ্পকট্ঠেন ৰা পণীতং। সুখহেতুতায ৰা সিৰং। তণ্হা খীযন্তি এত্থাতি তণ্হক্খযং।
Etasmiṃ adhigate puggalassa maraṇaṃ natthīti vā amataṃ. Atappakaṭṭhena vā paṇītaṃ. Sukhahetutāya vā sivaṃ. Taṇhā khīyanti etthāti taṇhakkhayaṃ.
অঞ্ঞস্স তাদিসস্স অভাৰতো ৰিম্হাপনীযতায অভূতমেৰাতি। কুতোচি পচ্চযতো অনিব্বত্তমেৰ হুত্ৰা ভূতং ৰিজ্জমানং। তেনাহ ‘‘অজাতং হুত্ৰা অত্থী’’তি। নত্থি এত্থ দুক্খন্তি নিদ্দুক্খং, তস্স ভাৰো নিদ্দুক্খত্তং। তস্মা অনীতিকং ঈতিরহিতং। ৰানং ৰুচ্চতি তণ্হা, তদভাৰেন নিব্বানং। ব্যাবজ্ঝং ৰুচ্চতি দুক্খং, তদভাৰেন অব্যাবজ্ঝং। পরমত্থতো সচ্চতো সুদ্ধিভাৰেন। কামা এৰ পুথুজ্জনেহি অল্লীযিতব্বতো আলযা। এস নযো সেসেসুপি। পতিট্ঠট্ঠেনাতি পতিট্ঠাভাৰেন ৰট্টদুক্খতো মুচ্চিতুকামানং দীপসদিসং ওঘেহি অনজ্ঝোত্থরণীযত্তা। অল্লীযিতব্বযুত্তট্ঠেনাতি অল্লীযিতুং অরহভাৰতো। তাযনট্ঠেনাতি সপরতাযনট্ঠেন। ভযসরণট্ঠেনাতি ভযস্স হিংসনট্ঠেন। সেট্ঠং উত্তমং। গতীতি গন্ধব্বট্ঠানং।
Aññassa tādisassa abhāvato vimhāpanīyatāya abhūtamevāti. Kutoci paccayato anibbattameva hutvā bhūtaṃ vijjamānaṃ. Tenāha ‘‘ajātaṃ hutvā atthī’’ti. Natthi ettha dukkhanti niddukkhaṃ, tassa bhāvo niddukkhattaṃ. Tasmā anītikaṃ ītirahitaṃ. Vānaṃ vuccati taṇhā, tadabhāvena nibbānaṃ. Byābajjhaṃ vuccati dukkhaṃ, tadabhāvena abyābajjhaṃ. Paramatthato saccato suddhibhāvena. Kāmā eva puthujjanehi allīyitabbato ālayā. Esa nayo sesesupi. Patiṭṭhaṭṭhenāti patiṭṭhābhāvena vaṭṭadukkhato muccitukāmānaṃ dīpasadisaṃ oghehi anajjhottharaṇīyattā. Allīyitabbayuttaṭṭhenāti allīyituṃ arahabhāvato. Tāyanaṭṭhenāti saparatāyanaṭṭhena. Bhayasaraṇaṭṭhenāti bhayassa hiṃsanaṭṭhena. Seṭṭhaṃ uttamaṃ. Gatīti gandhabbaṭṭhānaṃ.
অসঙ্খতসুত্তাদিৰণ্ণনা নিট্ঠিতা।
Asaṅkhatasuttādivaṇṇanā niṭṭhitā.
অসঙ্খতসংযুত্তৰণ্ণনা নিট্ঠিতা।
Asaṅkhatasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
১. অসঙ্খতসুত্তং • 1. Asaṅkhatasuttaṃ
২. অনতসুত্তং • 2. Anatasuttaṃ
৩-৩২. অনাসৰাদিসুত্তং • 3-32. Anāsavādisuttaṃ
৩৩. পরাযনসুত্তং • 33. Parāyanasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-৩৩. অসঙ্খতসুত্তাদিৰণ্ণনা • 1-33. Asaṅkhatasuttādivaṇṇanā
