| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৫. অসঙ্কমনপটিসন্দহনপঞ্হো
5. Asaṅkamanapaṭisandahanapañho
৫. রাজা আহ ‘‘ভন্তে নাগসেন, ন চ সঙ্কমতি পটিসন্দহতি চা’’তি? ‘‘আম, মহারাজ, ন চ সঙ্কমতি পটিসন্দহতি চা’’তি। ‘‘কথং, ভন্তে নাগসেন, ন চ সঙ্কমতি পটিসন্দহতি চ, ওপম্মং করোহী’’তি? ‘‘যথা, মহারাজ, কোচিদেৰ পুরিসো পদীপতো পদীপং পদীপেয্য, কিংনু খো সো, মহারাজ, পদীপো পদীপম্হা সঙ্কন্তো’’তি? ‘‘ন হি, ভন্তে’’তি। ‘‘এৰমেৰ খো, মহারাজ, ন চ সঙ্কমতি পটিসন্দহতি চা’’তি।
5. Rājā āha ‘‘bhante nāgasena, na ca saṅkamati paṭisandahati cā’’ti? ‘‘Āma, mahārāja, na ca saṅkamati paṭisandahati cā’’ti. ‘‘Kathaṃ, bhante nāgasena, na ca saṅkamati paṭisandahati ca, opammaṃ karohī’’ti? ‘‘Yathā, mahārāja, kocideva puriso padīpato padīpaṃ padīpeyya, kiṃnu kho so, mahārāja, padīpo padīpamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cā’’ti.
‘‘ভিয্যো ওপম্মং করোহী’’তি। ‘‘অভিজানাসি নু, ত্ৰং মহারাজ, দহরকো সন্তো সিলোকাচরিযস্স সন্তিকে কিঞ্চি সিলোকং গহিত’’ন্তি? ‘‘আম, ভন্তে’’তি । ‘‘কিংনু খো, মহারাজ, সো সিলোকো আচরিযম্হা সঙ্কন্তো’’তি? ‘‘ন হি, ভন্তে’’তি। ‘‘এৰমেৰ খো, মহারাজ, ন চ সঙ্কমতি পটিসন্দহতি চাতি।
‘‘Bhiyyo opammaṃ karohī’’ti. ‘‘Abhijānāsi nu, tvaṃ mahārāja, daharako santo silokācariyassa santike kiñci silokaṃ gahita’’nti? ‘‘Āma, bhante’’ti . ‘‘Kiṃnu kho, mahārāja, so siloko ācariyamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cāti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
অসঙ্কমনপটিসন্দহনপঞ্হো পঞ্চমো।
Asaṅkamanapaṭisandahanapañho pañcamo.
