| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
20. வீஸதிமவக்³கோ³
20. Vīsatimavaggo
1. அஸஞ்சிச்சகதா²வண்ணனா
1. Asañciccakathāvaṇṇanā
857-862. இதா³னி அஸஞ்சிச்சகதா² நாம ஹோதி. தத்த² ‘‘ஆனந்தரியவத்தூ²னி நாம க³ரூனி பா⁴ரியானி, தஸ்மா அஸஞ்சிச்சாபி தேஸு வத்தூ²ஸு விகோபிதேஸு ஆனந்தரிகோ ஹோதீ’’தி யேஸங் லத்³தி⁴, ஸெய்யதா²பி ஏகச்சானங் உத்தராபத²கானங்; தே ஸந்தா⁴ய அஸஞ்சிச்சாதி புச்சா² ஸகவாதி³ஸ்ஸ, லத்³தி⁴வஸேன படிஞ்ஞா இதரஸ்ஸ. அத² நங் ‘‘யஸ்மா ஆனந்தரியகம்மங் நாம கம்மபத²ப்பத்தங். யதி³ ச அஸஞ்சிச்ச கம்மபத²பே⁴தோ³ ஸியா, அவஸேஸா பாணாதிபாதாத³யோபி அஸஞ்சிச்ச ப⁴வெய்யு’’ந்தி சோத³னத்த²ங் அஸஞ்சிச்சபாணங் ஹந்த்வாதிஆதி³மாஹ. இதரோ ததா²ரூபாய லத்³தி⁴யா அபா⁴வேன படிக்கி²பதி. ஸேஸங் யதா²பாளிமேவ நிய்யாதி. ந வத்தப்³ப³ங் மாதுகா⁴தகோதி புச்சா² பரவாதி³ஸ்ஸ, ரோக³படிகாராதி³காலே அஸஞ்சிச்ச கா⁴தங் ஸந்தா⁴ய படிஞ்ஞா ஸகவாதி³ஸ்ஸ. நனு மாதா ஜீவிதா வோரோபிதாதி பஞ்ஹேபி அஸஞ்சிச்ச வோரோபிதங் ஸந்தா⁴ய படிஞ்ஞா ஸகவாதி³ஸ்ஸேவ. ஏவங் அதி⁴ப்பாயங் பன அக்³க³ஹெத்வா ஹஞ்சீதி லத்³தி⁴பதிட்டா²பனங் இதரஸ்ஸ. தங் அயோனிஸோ பதிட்டா²பிதத்தா அப்பதிட்டி²தமேவ. பிதுகா⁴தகாதீ³ஸுபி ஏஸேவ நயோ. ஸங்க⁴பே⁴த³கே பன த⁴ம்மஸஞ்ஞிங் ஸந்தா⁴ய ஸங்க⁴பே⁴தோ³ ஆனந்தரிகோதி புச்சா² ஸகவாதி³ஸ்ஸ, ‘‘ஸங்க⁴ங் ஸமக்³க³ங் பெ⁴த்வான, கப்பங் நிரயம்ஹி பச்சதீ’’தி வசனங் அயோனிஸோ க³ஹெத்வா படிஞ்ஞா பரவாதி³ஸ்ஸ. புன ஸப்³பே³தி புட்டோ² ஸகபக்கே² த⁴ம்மஸஞ்ஞிங் ஸந்தா⁴ய படிக்கி²பதி, பரபக்கே² த⁴ம்மஸஞ்ஞிங் ஸந்தா⁴ய படிஜானாதி. த⁴ம்மஸஞ்ஞீதி பஞ்ஹத்³வயேபி ஏஸேவ நயோ. நனு வுத்தங் ப⁴க³வதாதி ஸுத்தங் ஏகந்தேனேவ த⁴ம்மவாதி³ஸ்ஸ ஆனந்தரிகபா⁴வத³ஸ்ஸனத்த²ங் வுத்தங். ஆபாயிகோ நேரயிகோதி கா³தா²யபி அத⁴ம்மவாதீ³யேவ அதி⁴ப்பேதோ. இதரோ பன அதி⁴ப்பாயங் அக்³க³ஹெத்வா லத்³தி⁴ங் பதிட்ட²பேதி. ஸா அயோனிஸோ பதிட்டா²பிதத்தா அப்பதிட்டி²தாயேவாதி.
857-862. Idāni asañciccakathā nāma hoti. Tattha ‘‘ānantariyavatthūni nāma garūni bhāriyāni, tasmā asañciccāpi tesu vatthūsu vikopitesu ānantariko hotī’’ti yesaṃ laddhi, seyyathāpi ekaccānaṃ uttarāpathakānaṃ; te sandhāya asañciccāti pucchā sakavādissa, laddhivasena paṭiññā itarassa. Atha naṃ ‘‘yasmā ānantariyakammaṃ nāma kammapathappattaṃ. Yadi ca asañcicca kammapathabhedo siyā, avasesā pāṇātipātādayopi asañcicca bhaveyyu’’nti codanatthaṃ asañciccapāṇaṃ hantvātiādimāha. Itaro tathārūpāya laddhiyā abhāvena paṭikkhipati. Sesaṃ yathāpāḷimeva niyyāti. Na vattabbaṃ mātughātakoti pucchā paravādissa, rogapaṭikārādikāle asañcicca ghātaṃ sandhāya paṭiññā sakavādissa. Nanu mātā jīvitā voropitāti pañhepi asañcicca voropitaṃ sandhāya paṭiññā sakavādisseva. Evaṃ adhippāyaṃ pana aggahetvā hañcīti laddhipatiṭṭhāpanaṃ itarassa. Taṃ ayoniso patiṭṭhāpitattā appatiṭṭhitameva. Pitughātakādīsupi eseva nayo. Saṅghabhedake pana dhammasaññiṃ sandhāya saṅghabhedo ānantarikoti pucchā sakavādissa, ‘‘saṅghaṃ samaggaṃ bhetvāna, kappaṃ nirayamhi paccatī’’ti vacanaṃ ayoniso gahetvā paṭiññā paravādissa. Puna sabbeti puṭṭho sakapakkhe dhammasaññiṃ sandhāya paṭikkhipati, parapakkhe dhammasaññiṃ sandhāya paṭijānāti. Dhammasaññīti pañhadvayepi eseva nayo. Nanu vuttaṃ bhagavatāti suttaṃ ekanteneva dhammavādissa ānantarikabhāvadassanatthaṃ vuttaṃ. Āpāyiko nerayikoti gāthāyapi adhammavādīyeva adhippeto. Itaro pana adhippāyaṃ aggahetvā laddhiṃ patiṭṭhapeti. Sā ayoniso patiṭṭhāpitattā appatiṭṭhitāyevāti.
அஸஞ்சிச்சகதா²வண்ணனா.
Asañciccakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (194) 1. அஸஞ்சிச்சகதா² • (194) 1. Asañciccakathā
