| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၂၇. အသံဝာသနိဒ္ဒေသဝဏ္ဏနာ
27. Asaṃvāsaniddesavaṇṇanā
၁၉၈. ဥက္ခိတ္တောတိ ကမ္မနာနာသံဝာသကသင္ခာတော အာပတ္တိယာ အဒသ္သနေ, အပ္ပဋိကမ္မေ, ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကော။ အနုပသမ္ပန္နောတိ သိက္ခမာနသာမဏေရသာမဏေရိသိက္ခာပစ္စက္ခာတသင္ခာတော အနုပသမ္ပန္နော။ ဆိန္နမူလကောတိ အန္တိမဝတ္ထုအဇ္ဈာပန္နော။ ဥက္ခိတ္တကေသု ‘‘ဓမ္မဝာဒိနော ဧတေ’’တိ ဥပ္ပန္နာယ လဒ္ဓိယာ နာနာဘူတော သံဝာသော ဧတသ္သာတိ နာနာသံဝာသော, ဥက္ခိတ္တာနုဝတ္တကသင္ခာတော လဒ္ဓိနာနာသံဝာသကော။ သီမတော နိဂ္ဂတာ နိသ္သီမာ, သီမန္တရိကာ ဗဟိသီမာ စ, တတ္ထ ဟတ္ထပာသေ စေပိ ဌိတော, သီမာနာနာသံဝာသကော နိသ္သီမဋ္ဌိတော။ ဝေဟာယသေ အာကာသေ ဌိတော ဝေဟာယသဏ္ဌိတော ဗိန္ဒာဂမေန။ တတ္ထ ‘‘နာနာသံဝာသော စာ’’တိအာဒိနာ သမာဟာရဒ္ဝန္ဒေပိ က္ဝစိ နပုံသကလိင္ဂံ ဗ္ယဘိစရတီတိ နပုံသကတ္တာဘာဝော ယထာ ‘‘မဂ္ဂာမဂ္ဂော’’တိ။ ဧကကမ္မံ ဧကုဒ္ဒေသော သမသိက္ခတာတိ အယံ တိဝိဓောပိ သံဝာသော နာမ။ သော ယေသံ နတ္ထိ, တေ အသံဝာသာ။ ဧတေ ဟတ္ထပာသတော ဗဟိကရဏဝသေန ဝဇ္ဇေတဗ္ဗာ။ ဧတေသု ဟိ တိဝိဓေ ဥက္ခိတ္တကေ သတိ ဥပောသထာဒိကံ ကမ္မံ ကရောန္တသ္သ ပာစိတ္တိယံ, ဣတရေသု ဒုက္ကဋန္တိ။
198.Ukkhittoti kammanānāsaṃvāsakasaṅkhāto āpattiyā adassane, appaṭikamme, pāpikāya diṭṭhiyā appaṭinissagge ukkhittako. Anupasampannoti sikkhamānasāmaṇerasāmaṇerisikkhāpaccakkhātasaṅkhāto anupasampanno. Chinnamūlakoti antimavatthuajjhāpanno. Ukkhittakesu ‘‘dhammavādino ete’’ti uppannāya laddhiyā nānābhūto saṃvāso etassāti nānāsaṃvāso, ukkhittānuvattakasaṅkhāto laddhinānāsaṃvāsako. Sīmato niggatā nissīmā, sīmantarikā bahisīmā ca, tattha hatthapāse cepi ṭhito, sīmānānāsaṃvāsako nissīmaṭṭhito. Vehāyase ākāse ṭhito vehāyasaṇṭhito bindāgamena. Tattha ‘‘nānāsaṃvāso cā’’tiādinā samāhāradvandepi kvaci napuṃsakaliṅgaṃ byabhicaratīti napuṃsakattābhāvo yathā ‘‘maggāmaggo’’ti. Ekakammaṃ ekuddeso samasikkhatāti ayaṃ tividhopi saṃvāso nāma. So yesaṃ natthi, te asaṃvāsā. Ete hatthapāsato bahikaraṇavasena vajjetabbā. Etesu hi tividhe ukkhittake sati uposathādikaṃ kammaṃ karontassa pācittiyaṃ, itaresu dukkaṭanti.
အသံဝာသနိဒ္ဒေသဝဏ္ဏနာ နိဋ္ဌိတာ။
Asaṃvāsaniddesavaṇṇanā niṭṭhitā.
