| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
२७. असंवासनिद्देसवण्णना
27. Asaṃvāsaniddesavaṇṇanā
१९८. उक्खित्तोति कम्मनानासंवासकसङ्खातो आपत्तिया अदस्सने, अप्पटिकम्मे, पापिकाय दिट्ठिया अप्पटिनिस्सग्गे उक्खित्तको। अनुपसम्पन्नोति सिक्खमानसामणेरसामणेरिसिक्खापच्चक्खातसङ्खातो अनुपसम्पन्नो। छिन्नमूलकोति अन्तिमवत्थुअज्झापन्नो। उक्खित्तकेसु ‘‘धम्मवादिनो एते’’ति उप्पन्नाय लद्धिया नानाभूतो संवासो एतस्साति नानासंवासो, उक्खित्तानुवत्तकसङ्खातो लद्धिनानासंवासको। सीमतो निग्गता निस्सीमा, सीमन्तरिका बहिसीमा च, तत्थ हत्थपासे चेपि ठितो, सीमानानासंवासको निस्सीमट्ठितो। वेहायसे आकासे ठितो वेहायसण्ठितो बिन्दागमेन। तत्थ ‘‘नानासंवासो चा’’तिआदिना समाहारद्वन्देपि क्वचि नपुंसकलिङ्गं ब्यभिचरतीति नपुंसकत्ताभावो यथा ‘‘मग्गामग्गो’’ति। एककम्मं एकुद्देसो समसिक्खताति अयं तिविधोपि संवासो नाम। सो येसं नत्थि, ते असंवासा। एते हत्थपासतो बहिकरणवसेन वज्जेतब्बा। एतेसु हि तिविधे उक्खित्तके सति उपोसथादिकं कम्मं करोन्तस्स पाचित्तियं, इतरेसु दुक्कटन्ति।
198.Ukkhittoti kammanānāsaṃvāsakasaṅkhāto āpattiyā adassane, appaṭikamme, pāpikāya diṭṭhiyā appaṭinissagge ukkhittako. Anupasampannoti sikkhamānasāmaṇerasāmaṇerisikkhāpaccakkhātasaṅkhāto anupasampanno. Chinnamūlakoti antimavatthuajjhāpanno. Ukkhittakesu ‘‘dhammavādino ete’’ti uppannāya laddhiyā nānābhūto saṃvāso etassāti nānāsaṃvāso, ukkhittānuvattakasaṅkhāto laddhinānāsaṃvāsako. Sīmato niggatā nissīmā, sīmantarikā bahisīmā ca, tattha hatthapāse cepi ṭhito, sīmānānāsaṃvāsako nissīmaṭṭhito. Vehāyase ākāse ṭhito vehāyasaṇṭhito bindāgamena. Tattha ‘‘nānāsaṃvāso cā’’tiādinā samāhāradvandepi kvaci napuṃsakaliṅgaṃ byabhicaratīti napuṃsakattābhāvo yathā ‘‘maggāmaggo’’ti. Ekakammaṃ ekuddeso samasikkhatāti ayaṃ tividhopi saṃvāso nāma. So yesaṃ natthi, te asaṃvāsā. Ete hatthapāsato bahikaraṇavasena vajjetabbā. Etesu hi tividhe ukkhittake sati uposathādikaṃ kammaṃ karontassa pācittiyaṃ, itaresu dukkaṭanti.
असंवासनिद्देसवण्णना निट्ठिता।
Asaṃvāsaniddesavaṇṇanā niṭṭhitā.
