| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
असाधारणसमुट्ठानवण्णना
Asādhāraṇasamuṭṭhānavaṇṇanā
अचित्तकानीति (सारत्थ॰ टी॰ पाचित्तिय ३.१२१४) ‘‘नच्च’’न्तिआदिना अजानित्वा दस्सनादिं करोन्तिया आपत्तिसम्भवतो वत्थुअजाननचित्तेन अचित्तकानि। लोकवज्जानीति ‘‘नच्च’’न्तिआदिना जानित्वा दस्सनादिं करोन्तिया अकुसलेनेव आपज्जनतो लोकवज्जानि। तेनाह ‘‘अयं पनेत्थ अधिप्पायो’’तिआदि सचित्तकानीति ‘‘चोरी’’तिआदिना वत्थुं जानित्वा करणेयेव आपत्तिसम्भवतो सचित्तकानि। उपसम्पदादीनं एकन्ताकुसलचित्तेनेव अकत्तब्बत्ता पण्णत्तिवज्जानि। ‘‘इध सचित्तकाचित्तकता पण्णत्तिजाननाजाननताय अग्गहेट्ठा वत्थुजाननाजाननताय गहेतब्ब’’न्ति वदन्ति।
Acittakānīti (sārattha. ṭī. pācittiya 3.1214) ‘‘nacca’’ntiādinā ajānitvā dassanādiṃ karontiyā āpattisambhavato vatthuajānanacittena acittakāni. Lokavajjānīti ‘‘nacca’’ntiādinā jānitvā dassanādiṃ karontiyā akusaleneva āpajjanato lokavajjāni. Tenāha ‘‘ayaṃ panettha adhippāyo’’tiādi sacittakānīti ‘‘corī’’tiādinā vatthuṃ jānitvā karaṇeyeva āpattisambhavato sacittakāni. Upasampadādīnaṃ ekantākusalacitteneva akattabbattā paṇṇattivajjāni. ‘‘Idha sacittakācittakatā paṇṇattijānanājānanatāya aggaheṭṭhā vatthujānanājānanatāya gahetabba’’nti vadanti.
असाधारणसमुट्ठानवण्णना निट्ठिता।
Asādhāraṇasamuṭṭhānavaṇṇanā niṭṭhitā.
