| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ಅರಿಯರೂಪಕಥಾವಣ್ಣನಾ
4. Ariyarūpakathāvaṇṇanā
೬೯೮-೬೯೯. ಇದಾನಿ ಅರಿಯರೂಪಕಥಾ ನಾಮ ಹೋತಿ। ತತ್ಥ ಸಮ್ಮಾವಾಚಾಕಮ್ಮನ್ತಾ ರೂಪಂ, ತಞ್ಚ ಖೋ ‘‘ಸಬ್ಬಂ ರೂಪಂ ಚತ್ತಾರಿ ಚ ಮಹಾಭೂತಾನಿ ಚತುನ್ನಞ್ಚ ಮಹಾಭೂತಾನಂ ಉಪಾದಾಯರೂಪ’’ನ್ತಿ (ಮ॰ ನಿ॰ ೩.೬೭) ವಚನತೋ ಉಪಾದಾಯರೂಪನ್ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಉತ್ತರಾಪಥಕಾನಂ; ತೇ ಸನ್ಧಾಯ ಅರಿಯರೂಪಂ ಮಹಾಭೂತಾನಂ ಉಪಾದಾಯಾತಿ ಪುಚ್ಛಾ ಸಕವಾದಿಸ್ಸ। ತತ್ಥ ಅರಿಯಾನಂ ರೂಪಂ, ಅರಿಯಂ ವಾ ರೂಪನ್ತಿ ಅರಿಯರೂಪಂ। ಆಮನ್ತಾತಿ ಲದ್ಧಿಯಂ ಠತ್ವಾ ಪಟಿಞ್ಞಾ ಇತರಸ್ಸ। ಕುಸಲನ್ತಿ ಪುಟ್ಠೋ ಲದ್ಧಿವಸೇನೇವ ಪಟಿಜಾನಾತಿ। ಅನಾಸವಪುಚ್ಛಾದೀಸುಪಿ ಏಸೇವ ನಯೋ। ಯಂ ಕಿಞ್ಚಿ ರೂಪನ್ತಿ ಸುತ್ತಂ ಠಪೇತ್ವಾ ಭೂತಾನಿ ಸೇಸರೂಪಸ್ಸ ಉಪಾದಾಭಾವಂ ದೀಪೇತಿ, ನ ಸಮ್ಮಾವಾಚಾಕಮ್ಮನ್ತಾನಂ। ತೇಸಞ್ಹಿ ರೂಪಮತ್ತಞ್ಞೇವ ಅಸಿದ್ಧಂ, ಕುತೋ ಉಪಾದಾರೂಪತಾ; ತಸ್ಮಾ ಅಸಾಧಕನ್ತಿ।
698-699. Idāni ariyarūpakathā nāma hoti. Tattha sammāvācākammantā rūpaṃ, tañca kho ‘‘sabbaṃ rūpaṃ cattāri ca mahābhūtāni catunnañca mahābhūtānaṃ upādāyarūpa’’nti (ma. ni. 3.67) vacanato upādāyarūpanti yesaṃ laddhi, seyyathāpi uttarāpathakānaṃ; te sandhāya ariyarūpaṃ mahābhūtānaṃ upādāyāti pucchā sakavādissa. Tattha ariyānaṃ rūpaṃ, ariyaṃ vā rūpanti ariyarūpaṃ. Āmantāti laddhiyaṃ ṭhatvā paṭiññā itarassa. Kusalanti puṭṭho laddhivaseneva paṭijānāti. Anāsavapucchādīsupi eseva nayo. Yaṃ kiñci rūpanti suttaṃ ṭhapetvā bhūtāni sesarūpassa upādābhāvaṃ dīpeti, na sammāvācākammantānaṃ. Tesañhi rūpamattaññeva asiddhaṃ, kuto upādārūpatā; tasmā asādhakanti.
ಅರಿಯರೂಪಕಥಾವಣ್ಣನಾ।
Ariyarūpakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೩೯) ೪. ಅರಿಯರೂಪಕಥಾ • (139) 4. Ariyarūpakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೪. ಅರಿಯರೂಪಕಥಾವಣ್ಣನಾ • 4. Ariyarūpakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೪. ಅರಿಯರೂಪಕಥಾವಣ್ಣನಾ • 4. Ariyarūpakathāvaṇṇanā
