| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
१४. चुद्दसमवग्गो
14. Cuddasamavaggo
(१३९) ४. अरियरूपकथा
(139) 4. Ariyarūpakathā
६९८. अरियरूपं महाभूतानं उपादायाति? आमन्ता। अरियरूपं कुसलन्ति? आमन्ता। महाभूता कुसलाति? न हेवं वत्तब्बे …पे॰… महाभूता अब्याकताति? आमन्ता। अरियरूपं अब्याकतन्ति? न हेवं वत्तब्बे…पे॰… अरियरूपं महाभूतानं उपादायाति? आमन्ता। अरियरूपं अनासवं असंयोजनियं अगन्थनियं अनोघनियं अयोगनियं अनीवरणियं अपरामट्ठं अनुपादानियं असंकिलेसियन्ति? आमन्ता। महाभूता अनासवा…पे॰… असंकिलेसियाति? न हेवं वत्तब्बे…पे॰… महाभूता सासवा संयोजनिया…पे॰… संकिलेसियाति? आमन्ता। अरियरूपं सासवं संयोजनियं…पे॰… संकिलेसियन्ति? न हेवं वत्तब्बे…पे॰…।
698. Ariyarūpaṃ mahābhūtānaṃ upādāyāti? Āmantā. Ariyarūpaṃ kusalanti? Āmantā. Mahābhūtā kusalāti? Na hevaṃ vattabbe …pe… mahābhūtā abyākatāti? Āmantā. Ariyarūpaṃ abyākatanti? Na hevaṃ vattabbe…pe… ariyarūpaṃ mahābhūtānaṃ upādāyāti? Āmantā. Ariyarūpaṃ anāsavaṃ asaṃyojaniyaṃ aganthaniyaṃ anoghaniyaṃ ayoganiyaṃ anīvaraṇiyaṃ aparāmaṭṭhaṃ anupādāniyaṃ asaṃkilesiyanti? Āmantā. Mahābhūtā anāsavā…pe… asaṃkilesiyāti? Na hevaṃ vattabbe…pe… mahābhūtā sāsavā saṃyojaniyā…pe… saṃkilesiyāti? Āmantā. Ariyarūpaṃ sāsavaṃ saṃyojaniyaṃ…pe… saṃkilesiyanti? Na hevaṃ vattabbe…pe….
६९९. न वत्तब्बं – ‘‘अरियरूपं महाभूतानं उपादाया’’ति? आमन्ता। ननु वुत्तं भगवता – ‘‘यं किञ्चि, भिक्खवे, रूपं चत्तारि महाभूतानि चतुन्नञ्च महाभूतानं उपादायरूप’’न्ति 1! अत्थेव सुत्तन्तोति? आमन्ता। तेन हि अरियरूपं महाभूतानं उपादायाति।
699. Na vattabbaṃ – ‘‘ariyarūpaṃ mahābhūtānaṃ upādāyā’’ti? Āmantā. Nanu vuttaṃ bhagavatā – ‘‘yaṃ kiñci, bhikkhave, rūpaṃ cattāri mahābhūtāni catunnañca mahābhūtānaṃ upādāyarūpa’’nti 2! Attheva suttantoti? Āmantā. Tena hi ariyarūpaṃ mahābhūtānaṃ upādāyāti.
अरियरूपकथा निट्ठिता।
Ariyarūpakathā niṭṭhitā.
Footnotes:
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ४. अरियरूपकथावण्णना • 4. Ariyarūpakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ४. अरियरूपकथावण्णना • 4. Ariyarūpakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ४. अरियरूपकथावण्णना • 4. Ariyarūpakathāvaṇṇanā
