| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
33. அரணவிஹாரஞாணனித்³தே³ஸவண்ணனா
33. Araṇavihārañāṇaniddesavaṇṇanā
82. அரணவிஹாரஞாணனித்³தே³ஸே அனிச்சானுபஸ்ஸனாத³யோ வுத்தத்தா². ஸுஞ்ஞதோ விஹாரோதி அனத்தானுபஸ்ஸனாய வுட்டி²தஸ்ஸ ஸுஞ்ஞதாகாரேனேவ பவத்தா அரஹத்தப²லஸமாபத்தி. அனிமித்தோ விஹாரோதி அனிச்சானுபஸ்ஸனாய வுட்டி²தஸ்ஸ அனிமித்தாகாரேன பவத்தா அரஹத்தப²லஸமாபத்தி. அப்பணிஹிதோ விஹாரோதி து³க்கா²னுபஸ்ஸனாய வுட்டி²தஸ்ஸ அப்பணிஹிதாகாரேன பவத்தா அரஹத்தப²லஸமாபத்தி. ஸுஞ்ஞதே அதி⁴முத்ததாதி ஸுஞ்ஞதே ப²லஸமாபத்தியா புப்³ப³பா⁴க³பஞ்ஞாவஸேன அதி⁴முத்ததா. ஸேஸத்³வயேபி ஏஸேவ நயோ. பட²மங் ஜா²னந்திஆதீ³ஹி அரஹத்தப²லஸமாபத்திங் ஸமாபஜ்ஜிதுகாமஸ்ஸ விபஸ்ஸனாய ஆரம்மணபூ⁴தா ஜா²னஸமாபத்தியோ வுத்தா. அரஹதோயேவ ஹி விபஸ்ஸனாப²லஸமாபத்திபணீதாதி⁴முத்திஜா²னஸமாபத்தியோ ஸப்³ப³கிலேஸானங் பஹீனத்தா ‘‘அரணவிஹாரோ’’தி வத்துங் அரஹந்தி.
82. Araṇavihārañāṇaniddese aniccānupassanādayo vuttatthā. Suññato vihāroti anattānupassanāya vuṭṭhitassa suññatākāreneva pavattā arahattaphalasamāpatti. Animitto vihāroti aniccānupassanāya vuṭṭhitassa animittākārena pavattā arahattaphalasamāpatti. Appaṇihitovihāroti dukkhānupassanāya vuṭṭhitassa appaṇihitākārena pavattā arahattaphalasamāpatti. Suññate adhimuttatāti suññate phalasamāpattiyā pubbabhāgapaññāvasena adhimuttatā. Sesadvayepi eseva nayo. Paṭhamaṃ jhānantiādīhi arahattaphalasamāpattiṃ samāpajjitukāmassa vipassanāya ārammaṇabhūtā jhānasamāpattiyo vuttā. Arahatoyeva hi vipassanāphalasamāpattipaṇītādhimuttijhānasamāpattiyo sabbakilesānaṃ pahīnattā ‘‘araṇavihāro’’ti vattuṃ arahanti.
பட²மேன ஜா²னேன நீவரணே ஹரதீதி அரணவிஹாரோதி பட²மஜ்ஜா²னஸமங்கீ³ பட²மேன ஜா²னேன நீவரணே ஹரதீதி தங் பட²மங் ஜா²னங் அரணவிஹாரோதி அத்தோ². ஸேஸேஸுபி ஏஸேவ நயோ. அரஹதோ நீவரணாபா⁴வேபி நீவரணவிபக்க²த்தா பட²மஸ்ஸ ஜா²னஸ்ஸ நீவரணே ஹரதீதி வுத்தந்தி வேதி³தப்³ப³ங். விபஸ்ஸனாப²லஸமாபத்திபணீதாதி⁴முத்திவஸேன திதா⁴ அரணவிஹாரஞாணங் உத்³தி³ஸித்வா கஸ்மா ஜா²னஸமாபத்தியோவ அரணவிஹாரோதி நித்³தி³ட்டா²தி சே? உத்³தே³ஸவஸேனேவ தாஸங் திஸ்ஸன்னங் அரணவிஹாரதாய ஸித்³த⁴த்தா. ப²லஸமாபத்திவிபஸ்ஸனாய பன பூ⁴மிபூ⁴தானங் ஜா²னஸமாபத்தீனங் அரணவிஹாரதா அவுத்தே ந ஸிஜ்ஜ²தி, தஸ்மா அஸித்³த⁴மேவ ஸாதே⁴துங் ‘‘பட²மங் ஜா²னங் அரணவிஹாரோ’’திஆதி³ வுத்தந்தி வேதி³தப்³ப³ங். தாஸஞ்ஹி அரணவிஹாரதா உத்³தே³ஸவஸேன அஸித்³தா⁴பி நித்³தே³ஸே வுத்தத்தா ஸித்³தா⁴தி. தேஸங் வா யோஜிதனயேனேவ ‘‘அனிச்சானுபஸ்ஸனா நிச்சஸஞ்ஞங் ஹரதீதி அரணவிஹாரோ, து³க்கா²னுபஸ்ஸனா ஸுக²ஸஞ்ஞங் ஹரதீதி அரணவிஹாரோ, அனத்தானுபஸ்ஸனா அத்தஸஞ்ஞங் ஹரதீதி அரணவிஹாரோ, ஸுஞ்ஞதோ விஹாரோ அஸுஞ்ஞதங் ஹரதீதி அரணவிஹாரோ, அனிமித்தோ விஹாரோ நிமித்தங் ஹரதீதி அரணவிஹாரோ, அப்பணிஹிதோ விஹாரோ பணிதி⁴ங் ஹரதீதி அரணவிஹாரோ, ஸுஞ்ஞதாதி⁴முத்ததா அஸுஞ்ஞதாதி⁴முத்திங் ஹரதீதி அரணவிஹாரோ, அனிமித்தாதி⁴முத்ததா நிமித்தாதி⁴முத்திங் ஹரதீதி அரணவிஹாரோ, அப்பணிஹிதாதி⁴முத்ததா பணிஹிதாதி⁴முத்திங் ஹரதீதி அரணவிஹாரோ’’தி யோஜெத்வா க³ஹேதப்³ப³ங்.
Paṭhamena jhānena nīvaraṇe haratīti araṇavihāroti paṭhamajjhānasamaṅgī paṭhamena jhānena nīvaraṇe haratīti taṃ paṭhamaṃ jhānaṃ araṇavihāroti attho. Sesesupi eseva nayo. Arahato nīvaraṇābhāvepi nīvaraṇavipakkhattā paṭhamassa jhānassa nīvaraṇe haratīti vuttanti veditabbaṃ. Vipassanāphalasamāpattipaṇītādhimuttivasena tidhā araṇavihārañāṇaṃ uddisitvā kasmā jhānasamāpattiyova araṇavihāroti niddiṭṭhāti ce? Uddesavaseneva tāsaṃ tissannaṃ araṇavihāratāya siddhattā. Phalasamāpattivipassanāya pana bhūmibhūtānaṃ jhānasamāpattīnaṃ araṇavihāratā avutte na sijjhati, tasmā asiddhameva sādhetuṃ ‘‘paṭhamaṃ jhānaṃ araṇavihāro’’tiādi vuttanti veditabbaṃ. Tāsañhi araṇavihāratā uddesavasena asiddhāpi niddese vuttattā siddhāti. Tesaṃ vā yojitanayeneva ‘‘aniccānupassanā niccasaññaṃ haratīti araṇavihāro, dukkhānupassanā sukhasaññaṃ haratīti araṇavihāro, anattānupassanā attasaññaṃ haratīti araṇavihāro, suññato vihāro asuññataṃ haratīti araṇavihāro, animitto vihāro nimittaṃ haratīti araṇavihāro, appaṇihito vihāro paṇidhiṃ haratīti araṇavihāro, suññatādhimuttatā asuññatādhimuttiṃ haratīti araṇavihāro, animittādhimuttatā nimittādhimuttiṃ haratīti araṇavihāro, appaṇihitādhimuttatā paṇihitādhimuttiṃ haratīti araṇavihāro’’ti yojetvā gahetabbaṃ.
அரணவிஹாரஞாணனித்³தே³ஸவண்ணனா நிட்டி²தா.
Araṇavihārañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 33. அரணவிஹாரஞாணனித்³தே³ஸோ • 33. Araṇavihārañāṇaniddeso
