| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၁. အရဏသုတ္တဝဏ္ဏနာ
11. Araṇasuttavaṇṇanā
၈၁. ရဏန္တိ ကန္ဒန္တိ ဧတေဟီတိ ရဏာ, ရာဂာဒယော။ တေဟိ အဘိဘူတတာယ ဟိ သတ္တာ နာနပ္ပကာရံ ကန္ဒန္တိ ပရိဒေဝန္တိ။ တေ ပန သဗ္ဗသော နတ္ထိ ဧတေသံ ရဏာတိ အရဏာ။ နိက္ကိလေသာ ခီဏာသဝာ။ ဝုသိတဝာသောတိ ဝုသိတဗ္ရဟ္မစရိယဝာသော။ ဘောဇိသ္သိယန္တိ ဘုဇိသ္သဘာဝော။ တေနာဟ ‘‘အဒာသဘာဝော’’တိ။ သမဏာတိ သမိတပာပသမဏာတိ အာဟ ‘‘ခီဏာသဝသမဏာ’’တိ။ ပုထုဇ္ဇနကလ္ယာဏကာလေ လောကိယပရိညာယ, သေက္ခာ ပုဗ္ဗဘာဂေ လောကိယပရိညာယ, ပစ္စဝေက္ခဏေ လောကိယလောကုတ္တရာယ ပရိညာယ ပရိညေယ္ယံ တေဘူမကံ ခန္ဓပဉ္စကံ ပရိဇာနန္တိ ပရိစ္ဆိဇ္ဇန္တိ။ ခီဏာသဝာ ပန ပရိညာတပရိညေယ္ယာ ဟောန္တိ။ တထာ ဟိ တေ သာမီ ဟုတ္ဝာ ပရိဘုဉ္ဇန္တိ။ ဝန္ဒန္တိ နံ ပတိဋ္ဌိတန္တိ ဝုတ္တံ, ဝန္ဒနီယဘာဝော စ သီလသမ္ပန္နတာယာတိ အာဟ ‘‘ပတိဋ္ဌိတန္တိ သီလေ ပတိဋ္ဌိတ’’န္တိ။ ဣဓာတိ ဣမသ္မိံ လောကေ။ ခတ္တိယာတိ လက္ခဏဝစနန္တိ အာဟ ‘‘န ကေဝလံ ခတ္တိယာဝာ’’တိအာဒိ။
81. Raṇanti kandanti etehīti raṇā, rāgādayo. Tehi abhibhūtatāya hi sattā nānappakāraṃ kandanti paridevanti. Te pana sabbaso natthi etesaṃ raṇāti araṇā. Nikkilesā khīṇāsavā. Vusitavāsoti vusitabrahmacariyavāso. Bhojissiyanti bhujissabhāvo. Tenāha ‘‘adāsabhāvo’’ti. Samaṇāti samitapāpasamaṇāti āha ‘‘khīṇāsavasamaṇā’’ti. Puthujjanakalyāṇakāle lokiyapariññāya, sekkhā pubbabhāge lokiyapariññāya, paccavekkhaṇe lokiyalokuttarāya pariññāya pariññeyyaṃ tebhūmakaṃ khandhapañcakaṃ parijānanti paricchijjanti. Khīṇāsavā pana pariññātapariññeyyā honti. Tathā hi te sāmī hutvā paribhuñjanti. Vandanti naṃ patiṭṭhitanti vuttaṃ, vandanīyabhāvo ca sīlasampannatāyāti āha ‘‘patiṭṭhitanti sīle patiṭṭhita’’nti. Idhāti imasmiṃ loke. Khattiyāti lakkhaṇavacananti āha ‘‘na kevalaṃ khattiyāvā’’tiādi.
အရဏသုတ္တဝဏ္ဏနာ နိဋ္ဌိတာ။
Araṇasuttavaṇṇanā niṭṭhitā.
ဆေတ္ဝာဝဂ္ဂဝဏ္ဏနာ နိဋ္ဌိတာ။
Chetvāvaggavaṇṇanā niṭṭhitā.
သာရတ္ထပ္ပကာသိနိယာ သံယုတ္တနိကာယ-အဋ္ဌကထာယ
Sāratthappakāsiniyā saṃyuttanikāya-aṭṭhakathāya
ဒေဝတာသံယုတ္တဝဏ္ဏနာယ လီနတ္ထပ္ပကာသနာ သမတ္တာ။
Devatāsaṃyuttavaṇṇanāya līnatthappakāsanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၁. အရဏသုတ္တံ • 11. Araṇasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၁. အရဏသုတ္တဝဏ္ဏနာ • 11. Araṇasuttavaṇṇanā
