| Library / Tipiṭaka / তিপিটক • Tipiṭaka / ধম্মপদপাল়ি • Dhammapadapāḷi |
৭. অরহন্তৰগ্গো
7. Arahantavaggo
৯০.
90.
গতদ্ধিনো ৰিসোকস্স, ৰিপ্পমুত্তস্স সব্বধি।
Gataddhino visokassa, vippamuttassa sabbadhi;
সব্বগন্থপ্পহীনস্স, পরিল়াহো ন ৰিজ্জতি॥
Sabbaganthappahīnassa, pariḷāho na vijjati.
৯১.
91.
উয্যুঞ্জন্তি সতীমন্তো, ন নিকেতে রমন্তি তে।
Uyyuñjanti satīmanto, na nikete ramanti te;
হংসাৰ পল্ললং হিত্ৰা, ওকমোকং জহন্তি তে॥
Haṃsāva pallalaṃ hitvā, okamokaṃ jahanti te.
৯২.
92.
যেসং সন্নিচযো নত্থি, যে পরিঞ্ঞাতভোজনা।
Yesaṃ sannicayo natthi, ye pariññātabhojanā;
সুঞ্ঞতো অনিমিত্তো চ, ৰিমোক্খো যেসং গোচরো।
Suññato animitto ca, vimokkho yesaṃ gocaro;
৯৩.
93.
যস্সাসৰা পরিক্খীণা, আহারে চ অনিস্সিতো।
Yassāsavā parikkhīṇā, āhāre ca anissito;
সুঞ্ঞতো অনিমিত্তো চ, ৰিমোক্খো যস্স গোচরো।
Suññato animitto ca, vimokkho yassa gocaro;
আকাসে ৰ সকুন্তানং, পদং তস্স দুরন্নযং॥
Ākāse va sakuntānaṃ, padaṃ tassa durannayaṃ.
৯৪.
94.
যস্সিন্দ্রিযানি সমথঙ্গতানি 3, অস্সা যথা সারথিনা সুদন্তা।
Yassindriyāni samathaṅgatāni 4, assā yathā sārathinā sudantā;
পহীনমানস্স অনাসৰস্স, দেৰাপি তস্স পিহযন্তি তাদিনো॥
Pahīnamānassa anāsavassa, devāpi tassa pihayanti tādino.
৯৫.
95.
পথৰিসমো নো ৰিরুজ্ঝতি, ইন্দখিলুপমো 5 তাদি সুব্বতো।
Pathavisamo no virujjhati, indakhilupamo 6 tādi subbato;
রহদোৰ অপেতকদ্দমো, সংসারা ন ভৰন্তি তাদিনো॥
Rahadova apetakaddamo, saṃsārā na bhavanti tādino.
৯৬.
96.
সন্তং তস্স মনং হোতি, সন্তা ৰাচা চ কম্ম চ।
Santaṃ tassa manaṃ hoti, santā vācā ca kamma ca;
সম্মদঞ্ঞা ৰিমুত্তস্স, উপসন্তস্স তাদিনো॥
Sammadaññā vimuttassa, upasantassa tādino.
৯৭.
97.
অস্সদ্ধো অকতঞ্ঞূ চ, সন্ধিচ্ছেদো চ যো নরো।
Assaddho akataññū ca, sandhicchedo ca yo naro;
হতাৰকাসো ৰন্তাসো, স ৰে উত্তমপোরিসো॥
Hatāvakāso vantāso, sa ve uttamaporiso.
৯৮.
98.
গামে ৰা যদি ৰারঞ্ঞে, নিন্নে ৰা যদি ৰা থলে।
Gāme vā yadi vāraññe, ninne vā yadi vā thale;
যত্থ অরহন্তো ৰিহরন্তি, তং ভূমিরামণেয্যকং॥
Yattha arahanto viharanti, taṃ bhūmirāmaṇeyyakaṃ.
৯৯.
99.
রমণীযানি অরঞ্ঞানি, যত্থ ন রমতী জনো।
Ramaṇīyāni araññāni, yattha na ramatī jano;
ৰীতরাগা রমিস্সন্তি, ন তে কামগৰেসিনো॥
Vītarāgā ramissanti, na te kāmagavesino.
অরহন্তৰগ্গো সত্তমো নিট্ঠিতো।
Arahantavaggo sattamo niṭṭhito.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ধম্মপদ-অট্ঠকথা • Dhammapada-aṭṭhakathā / ৭. অরহন্তৰগ্গো • 7. Arahantavaggo
