| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. အရဟန္တသုတ္တဝဏ္ဏနာ
4. Arahantasuttavaṇṇanā
၇၆. ယတ္တကာ သတ္တာဝာသာတိ တသ္မိံ တသ္မိံ သတ္တနိကာယေ အာဝသနဋ္ဌေန သတ္တာ ဧဝ သတ္တာဝာသာ။ တေန ယတ္တကာ သတ္တာဝာသာ, တေဟိ သဗ္ဗေဟိပိ ဧတေ အဂ္ဂာ ဧတေ သေဋ္ဌာ, ယေ ဣမေ အရဟန္တာတိ ဒသ္သေတိ။ ပုရိမနယေနေဝာတိ ပုရိမသ္မိံ သတ္တဋ္ဌာနကောသလ္လသုတ္တေ ဝုတ္တနယေန။
76.Yattakā sattāvāsāti tasmiṃ tasmiṃ sattanikāye āvasanaṭṭhena sattā eva sattāvāsā. Tena yattakā sattāvāsā, tehi sabbehipi ete aggā ete seṭṭhā, ye ime arahantāti dasseti. Purimanayenevāti purimasmiṃ sattaṭṭhānakosallasutte vuttanayena.
တဒတ္ထပရိဒီပနာဟီတိ ‘‘ပဉ္စက္ခန္ဓေ ပရိညာယ။ တဏ္ဟာ တေသံ န ဝိဇ္ဇတိ။ အသ္မိမာနော သမုစ္ဆိန္နော’’တိအာဒိနာ တသ္သ ယထာနိဒ္ဒိဋ္ဌသ္သ သုတ္တသ္သ အတ္ထဒီပနာဟိ စေဝ ‘‘အနေဇံ တေ အနုပ္ပတ္တာ, စိတ္တံ တေသံ အနာဝိလ’’န္တိအာဒိနာ ဝိသေသတ္ထပရိဒီပနာဟိ စ။ ဈာနမဂ္ဂဖလပရိယာပန္နံ အတိသယိတသုခံ ဧတေသမတ္ထီတိ သုခိနောတိ အာဟ ‘‘ဈာန။ပေ.။ သုခိတာ’’တိ။ တဏ္ဟာ တေသံ န ဝိဇ္ဇတီတိ ဧတ္ထ တေသံ အပာယဒုက္ခဇနိကာ တဏ္ဟာ န ဝိဇ္ဇတီတိ ဝုတ္တံ။ ဝဋ္ဋမူလိကာယ တဏ္ဟာယ အဘာဝာ ‘‘နန္ဒီ တေသံ န ဝိဇ္ဇတီ’’တိ ဧတ္ထ ဝုစ္စတီတိ။ ဣမသ္သပီတိ ပိ-သဒ္ဒေန ဒုက္ခသ္သာဘာဝေနပီတိ ဒုက္ခာဘာဝော ဝိယ ဝဋ္ဋမူလိကတဏ္ဟာဘာဝော သမ္ပိဏ္ဍီယတီတိ ဒဋ္ဌဗ္ဗံ။ တေန ဟိ တေ အနုပာဒိသေသနိဗ္ဗာနပ္ပတ္တိယာ အစ္စန္တသုခိတာ ဧဝာတိ ဝုစ္စန္တီတိ။ ‘‘သေယ္ယောဟမသ္မီ’’တိအာဒိနယပ္ပဝတ္တိယာ နဝဝိဓော။ ဉာဏေနာတိ အဂ္ဂမဂ္ဂညာဏေန။
Tadatthaparidīpanāhīti ‘‘pañcakkhandhe pariññāya. Taṇhā tesaṃ na vijjati. Asmimāno samucchinno’’tiādinā tassa yathāniddiṭṭhassa suttassa atthadīpanāhi ceva ‘‘anejaṃ te anuppattā, cittaṃ tesaṃ anāvila’’ntiādinā visesatthaparidīpanāhi ca. Jhānamaggaphalapariyāpannaṃ atisayitasukhaṃ etesamatthīti sukhinoti āha ‘‘jhāna…pe… sukhitā’’ti. Taṇhā tesaṃ na vijjatīti ettha tesaṃ apāyadukkhajanikā taṇhā na vijjatīti vuttaṃ. Vaṭṭamūlikāya taṇhāya abhāvā ‘‘nandī tesaṃ na vijjatī’’ti ettha vuccatīti. Imassapīti pi-saddena dukkhassābhāvenapīti dukkhābhāvo viya vaṭṭamūlikataṇhābhāvo sampiṇḍīyatīti daṭṭhabbaṃ. Tena hi te anupādisesanibbānappattiyā accantasukhitā evāti vuccantīti. ‘‘Seyyohamasmī’’tiādinayappavattiyā navavidho. Ñāṇenāti aggamaggaññāṇena.
အရဟတ္တံ အနုပ္ပတ္တာ။ အလိတ္တာတိ အမက္ခိတာ။ ဗ္ရဟ္မဘူတာတိ ဗ္ရဟ္မဘာဝံ ပတ္တာ, ဗ္ရဟ္မတော ဝာ အရိယမဂ္ဂဉာဏတော ဘူတာ အရိယာယ ဇာတိယာ ဇာတာ။ သတ္တ သဒ္ဓမ္မာ ဂောစရော ပဝတ္တိဋ္ဌာနံ ဧတေသန္တိ သတ္တသဒ္ဓမ္မဂောစရာ။
Arahattaṃ anuppattā. Alittāti amakkhitā. Brahmabhūtāti brahmabhāvaṃ pattā, brahmato vā ariyamaggañāṇato bhūtā ariyāya jātiyā jātā. Satta saddhammā gocaro pavattiṭṭhānaṃ etesanti sattasaddhammagocarā.
နိရာသင္ကစာရော နာမ ဂဟိတော ကုတောစိပိ တေသံ အာသင္ကာယ အဘာဝတော။ သမ္မာဒိဋ္ဌိအာဒီဟိ ဒသဟိ အင္ဂေဟိ သမ္မာဝိမုတ္တိ-သမ္မာဉာဏပရိယောသာနေဟိ။ ‘‘အာဂုံ န ကရောတီ’’တိအာဒီဟိ စတူဟိ ကာရဏေဟိ။ တဏ္ဟာ တေသံ န ဝိဇ္ဇတီတိ ဣဒမ္ပိ တဏ္ဟာပဟာနသ္သ ဗဟူပကာရတာဒသ္သနံ။ တေနာဟ ‘‘ဒာသကာရိကာ တဏ္ဟာပိ တေသံ နတ္ထီ’’တိ။
Nirāsaṅkacāro nāma gahito kutocipi tesaṃ āsaṅkāya abhāvato. Sammādiṭṭhiādīhi dasahi aṅgehi sammāvimutti-sammāñāṇapariyosānehi. ‘‘Āguṃ na karotī’’tiādīhi catūhi kāraṇehi. Taṇhā tesaṃ na vijjatīti idampi taṇhāpahānassa bahūpakāratādassanaṃ. Tenāha ‘‘dāsakārikā taṇhāpi tesaṃ natthī’’ti.
န ဝိကမ္ပန္တိ ‘‘သေယ္ယောဟမသ္မီ’’တိအာဒိနာ။
Navikampanti ‘‘seyyohamasmī’’tiādinā.
ဥဒ္ဓံ တိရိယံ အပာစီနန္တိ ဧတ္ထ ‘‘ဥဒ္ဓံ ဝုစ္စတီ’’တိအာဒိနာ ရူပမုခေန အတ္တဘာဝံ ဂဟေတ္ဝာ ပဝတ္တော ပဌမနယော။ ကာလတ္တယဝသေန ဓမ္မပ္ပဝတ္တိံ ဂဟေတ္ဝာ ပဝတ္တော ဒုတိယနယော။ ဌာနဝသေန သကလလောကဓာတုံ ဂဟေတ္ဝာ ပဝတ္တော တတိယနယော။ ဗုဒ္ဓာတိ စတ္တာရိ သစ္စာနိ ဗုဒ္ဓဝန္တော။
Uddhaṃtiriyaṃ apācīnanti ettha ‘‘uddhaṃ vuccatī’’tiādinā rūpamukhena attabhāvaṃ gahetvā pavatto paṭhamanayo. Kālattayavasena dhammappavattiṃ gahetvā pavatto dutiyanayo. Ṭhānavasena sakalalokadhātuṃ gahetvā pavatto tatiyanayo. Buddhāti cattāri saccāni buddhavanto.
သီဟနာဒသမောဓာနန္တိ သီဟနာဒာနံ သံကလနံ။ လောကေ အတ္တနော ဥတ္တရိတရသ္သာဘာဝာ အနုတ္တရာ။ ဥတ္တရော တာဝ တိဋ္ဌတု ပုရိသော, သဒိသောပိ တာဝ နတ္ထီတိ အသဒိသာ။ သကလမ္ပိ ဘဝံ ဥတ္တရိတ္ဝာ ဘဝပိဋ္ဌေ ဌတ္ဝာ ဝိမုတ္တိသုခေန သုခိတတ္တာဒိဝသေန ဧကဝီသတိယာကာရေဟိ သီဟနာဒံ နဒန္တိ။
Sīhanādasamodhānanti sīhanādānaṃ saṃkalanaṃ. Loke attano uttaritarassābhāvā anuttarā. Uttaro tāva tiṭṭhatu puriso, sadisopi tāva natthīti asadisā. Sakalampi bhavaṃ uttaritvā bhavapiṭṭhe ṭhatvā vimuttisukhena sukhitattādivasena ekavīsatiyākārehi sīhanādaṃ nadanti.
အရဟန္တသုတ္တဝဏ္ဏနာ နိဋ္ဌိတာ။
Arahantasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. အရဟန္တသုတ္တံ • 4. Arahantasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. အရဟန္တသုတ္တဝဏ္ဏနာ • 4. Arahantasuttavaṇṇanā
