| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৬. অপুঞ্ঞপঞ্হো
6. Apuññapañho
৬. ‘‘ভন্তে নাগসেন, তুম্হে ভণথ ‘যো অজানন্তো পাণাতিপাতং করোতি, সো বলৰতরং অপুঞ্ঞং পসৰতী’তি। পুন চ ভগৰতা ৰিনযপঞ্ঞত্তিযা ভণিতং ‘অনাপত্তি অজানন্তস্সা’তি। যদি, ভন্তে নাগসেন, অজানিত্ৰা পাণাতিপাতং করোন্তো বলৰতরং অপুঞ্ঞং পসৰতি, তেন হি ‘অনাপত্তি অজানন্তস্সা’তি যং ৰচনং, তং মিচ্ছা। যদি অনাপত্তি অজানন্তস্স, তেন হি ‘অজানিত্ৰা পাণাতিপাতং করোন্তো বলৰতরং অপুঞ্ঞং পসৰতী’তি তম্পি ৰচনং মিচ্ছা। অযম্পি উভতো কোটিকো পঞ্হো দুরুত্তরো দুরতিক্কমো তৰানুপ্পত্তো, সো তযা নিব্বাহিতব্বো’’তি।
6. ‘‘Bhante nāgasena, tumhe bhaṇatha ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca bhagavatā vinayapaññattiyā bhaṇitaṃ ‘anāpatti ajānantassā’ti. Yadi, bhante nāgasena, ajānitvā pāṇātipātaṃ karonto balavataraṃ apuññaṃ pasavati, tena hi ‘anāpatti ajānantassā’ti yaṃ vacanaṃ, taṃ micchā. Yadi anāpatti ajānantassa, tena hi ‘ajānitvā pāṇātipātaṃ karonto balavataraṃ apuññaṃ pasavatī’ti tampi vacanaṃ micchā. Ayampi ubhato koṭiko pañho duruttaro duratikkamo tavānuppatto, so tayā nibbāhitabbo’’ti.
‘‘ভাসিতম্পেতং, মহারাজ, ভগৰতা ‘যো অজানন্তো পাণাতিপাতং করোতি, সো বলৰতরং অপুঞ্ঞং পসৰতী’তি। পুন চ ৰিনযপঞ্ঞত্তিযা ভগৰতা ভণিতং ‘অনাপত্তি অজানন্তস্সা’তি। তত্থ অত্থন্তরং অত্থি। কতমং অত্থন্তরং ? অত্থি, মহারাজ, আপত্তি সঞ্ঞাৰিমোক্খা, অত্থি আপত্তি নোসঞ্ঞাৰিমোক্খা। যাযং, মহারাজ, আপত্তি সঞ্ঞাৰিমোক্খা, তং আপত্তিং আরব্ভ ভগৰতা ভণিতং ‘অনাপত্তি অজানন্তস্সা’’তি। ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি।
‘‘Bhāsitampetaṃ, mahārāja, bhagavatā ‘yo ajānanto pāṇātipātaṃ karoti, so balavataraṃ apuññaṃ pasavatī’ti. Puna ca vinayapaññattiyā bhagavatā bhaṇitaṃ ‘anāpatti ajānantassā’ti. Tattha atthantaraṃ atthi. Katamaṃ atthantaraṃ ? Atthi, mahārāja, āpatti saññāvimokkhā, atthi āpatti nosaññāvimokkhā. Yāyaṃ, mahārāja, āpatti saññāvimokkhā, taṃ āpattiṃ ārabbha bhagavatā bhaṇitaṃ ‘anāpatti ajānantassā’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
অপুঞ্ঞপঞ্হো ছট্ঠো।
Apuññapañho chaṭṭho.
