| Library / Tipiṭaka / ತಿಪಿಟಕ • Tipiṭaka / ವಿಭಙ್ಗ-ಮೂಲಟೀಕಾ • Vibhaṅga-mūlaṭīkā |
೧೩. ಅಪ್ಪಮಞ್ಞಾವಿಭಙ್ಗೋ
13. Appamaññāvibhaṅgo
೧. ಸುತ್ತನ್ತಭಾಜನೀಯವಣ್ಣನಾ
1. Suttantabhājanīyavaṇṇanā
೬೪೨. ಸಬ್ಬಧೀತಿ ದಿಸಾದೇಸೋಧಿನಾ ಅನೋಧಿಸೋಫರಣಂ ವುತ್ತಂ, ಸಬ್ಬತ್ತತಾಯ ಸಬ್ಬಾವನ್ತನ್ತಿ ಸತ್ತೋಧಿನಾ। ತೇನಾಹ ‘‘ಅನೋಧಿಸೋ ದಸ್ಸನತ್ಥ’’ನ್ತಿ। ತಥಾ-ಸದ್ದೋ ಇತಿ-ಸದ್ದೋ ವಾ ನ ವುತ್ತೋತಿ ‘‘ಮೇತ್ತಾಸಹಗತೇನ ಚೇತಸಾ’’ತಿ ಏತಸ್ಸ ಅನುವತ್ತಕಂ ತಂ ದ್ವಯಂ ತಸ್ಸ ಫರಣನ್ತರಾದಿಟ್ಠಾನಂ ಅಟ್ಠಾನನ್ತಿ ಕತ್ವಾ ನ ವುತ್ತಂ, ಪುನ ‘‘ಮೇತ್ತಾಸಹಗತೇನ ಚೇತಸಾ’’ತಿ ವುತ್ತನ್ತಿ ಅತ್ಥೋ।
642. Sabbadhīti disādesodhinā anodhisopharaṇaṃ vuttaṃ, sabbattatāya sabbāvantanti sattodhinā. Tenāha ‘‘anodhiso dassanattha’’nti. Tathā-saddo iti-saddo vā na vuttoti ‘‘mettāsahagatena cetasā’’ti etassa anuvattakaṃ taṃ dvayaṃ tassa pharaṇantarādiṭṭhānaṃ aṭṭhānanti katvā na vuttaṃ, puna ‘‘mettāsahagatena cetasā’’ti vuttanti attho.
೬೪೩. ಹಿರೋತ್ತಪ್ಪಾನುಪಾಲಿತಾ ಮೇತ್ತಾ ನ ಪರಿಹಾಯತಿ ಆಸನ್ನಸಪತ್ತಸ್ಸ ರಾಗಸ್ಸ ಸಿನೇಹಸ್ಸ ಚ ವಿಪತ್ತಿಯಾ ಅನುಪ್ಪತ್ತಿತೋತಿ ಅಧಿಪ್ಪಾಯೋ।
643. Hirottappānupālitā mettā na parihāyati āsannasapattassa rāgassa sinehassa ca vipattiyā anuppattitoti adhippāyo.
೬೪೫. ಅಧಿಮುಞ್ಚಿತ್ವಾತಿ ಸುಟ್ಠು ಪಸಾರೇತ್ವಾತಿ ಅತ್ಥೋ। ತಂ ದಸ್ಸೇನ್ತೋ ‘‘ಅಧಿಕಭಾವೇನಾ’’ತಿಆದಿಮಾಹ, ಬಲವತಾ ವಾ ಅಧಿಮೋಕ್ಖೇನ ಅಧಿಮುಚ್ಚಿತ್ವಾ।
645. Adhimuñcitvāti suṭṭhu pasāretvāti attho. Taṃ dassento ‘‘adhikabhāvenā’’tiādimāha, balavatā vā adhimokkhena adhimuccitvā.
೬೪೮. ಹೇಟ್ಠಾ ವುತ್ತೋಯೇವಾತಿ ‘‘ಸಬ್ಬೇನ ಸಬ್ಬಂ ಸಬ್ಬಥಾ ಸಬ್ಬ’’ನ್ತಿ ಏತೇಸಂ ‘‘ಸಬ್ಬೇನ ಸಿಕ್ಖಾಸಮಾದಾನೇನ ಸಬ್ಬಂ ಸಿಕ್ಖಂ, ಸಬ್ಬೇನ ಸಿಕ್ಖಿತಬ್ಬಾಕಾರೇನ ಸಬ್ಬಂ ಸಿಕ್ಖ’’ನ್ತಿ ಚ ಝಾನವಿಭಙ್ಗೇ (ವಿಭ॰ ಅಟ್ಠ॰ ೫೧೬) ಅತ್ಥೋ ವುತ್ತೋ। ಇಧ ಪನ ಸಬ್ಬೇನ ಅವಧಿನಾ ಅತ್ತಸಮತಾಯ ಸಬ್ಬಸತ್ತಯುತ್ತತಾಯ ಚ ಸಬ್ಬಂ ಲೋಕಂ, ಸಬ್ಬಾವಧಿದಿಸಾದಿಫರಣಾಕಾರೇಹಿ ಸಬ್ಬಂ ಲೋಕನ್ತಿ ಚ ಅತ್ಥೋ ಯುಜ್ಜತಿ।
648. Heṭṭhā vuttoyevāti ‘‘sabbena sabbaṃ sabbathā sabba’’nti etesaṃ ‘‘sabbena sikkhāsamādānena sabbaṃ sikkhaṃ, sabbena sikkhitabbākārena sabbaṃ sikkha’’nti ca jhānavibhaṅge (vibha. aṭṭha. 516) attho vutto. Idha pana sabbena avadhinā attasamatāya sabbasattayuttatāya ca sabbaṃ lokaṃ, sabbāvadhidisādipharaṇākārehi sabbaṃ lokanti ca attho yujjati.
೬೫೦. ಪಚ್ಚತ್ಥಿಕವಿಘಾತವಸೇನಾತಿ ಮೇತ್ತಾದೀನಂ ಆಸನ್ನದೂರಪಚ್ಚತ್ಥಿಕಾನಂ ರಾಗಬ್ಯಾಪಾದಾದೀನಂ ವಿಘಾತವಸೇನ। ಯಂ ಅಪ್ಪಮಾಣಂ, ಸೋ ಅವೇರೋತಿ ಸೋ ಅವೇರಭಾವೋತಿ ಅಯಂ ವಾ ತಸ್ಸ ಅತ್ಥೋತಿ।
650. Paccatthikavighātavasenāti mettādīnaṃ āsannadūrapaccatthikānaṃ rāgabyāpādādīnaṃ vighātavasena. Yaṃ appamāṇaṃ, so averoti so averabhāvoti ayaṃ vā tassa atthoti.
೬೫೩. ನಿರಯಾದಿ ಗತಿ, ಚಣ್ಡಾಲಾದಿ ಕುಲಂ, ಅನ್ನಾದೀನಂ ಅಲಾಭಿತಾ ಭೋಗೋ। ಆದಿ-ಸದ್ದೇನ ದುಬ್ಬಣ್ಣತಾದಿ ಗಹಿತಂ।
653. Nirayādi gati, caṇḍālādi kulaṃ, annādīnaṃ alābhitā bhogo. Ādi-saddena dubbaṇṇatādi gahitaṃ.
ಸುತ್ತನ್ತಭಾಜನೀಯವಣ್ಣನಾ ನಿಟ್ಠಿತಾ।
Suttantabhājanīyavaṇṇanā niṭṭhitā.
೩. ಪಞ್ಹಪುಚ್ಛಕವಣ್ಣನಾ
3. Pañhapucchakavaṇṇanā
೬೯೯. ಇಮಸ್ಮಿಂ ಪನ…ಪೇ॰… ಕಥಿತಾತಿ ಇಮಿನಾ ಇಮಸ್ಮಿಂ ವಿಭಙ್ಗೇ ಕಥಿತಾನಂ ಲೋಕಿಯಭಾವಮೇವ ದಸ್ಸೇನ್ತೋ ಖನ್ಧವಿಭಙ್ಗಾದೀಹಿ ವಿಸೇಸೇತೀತಿ ನ ಅಞ್ಞತ್ಥ ಲೋಕುತ್ತರಾನಂ ಅಪ್ಪಮಞ್ಞಾನಂ ಕಥಿತತಾ ಅನುಞ್ಞಾತಾ ಹೋತಿ।
699. Imasmiṃpana…pe… kathitāti iminā imasmiṃ vibhaṅge kathitānaṃ lokiyabhāvameva dassento khandhavibhaṅgādīhi visesetīti na aññattha lokuttarānaṃ appamaññānaṃ kathitatā anuññātā hoti.
ಪಞ್ಹಪುಚ್ಛಕವಣ್ಣನಾ ನಿಟ್ಠಿತಾ।
Pañhapucchakavaṇṇanā niṭṭhitā.
ಅಪ್ಪಮಞ್ಞಾವಿಭಙ್ಗವಣ್ಣನಾ ನಿಟ್ಠಿತಾ।
Appamaññāvibhaṅgavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ವಿಭಙ್ಗಪಾಳಿ • Vibhaṅgapāḷi / ೧೩. ಅಪ್ಪಮಞ್ಞಾವಿಭಙ್ಗೋ • 13. Appamaññāvibhaṅgo
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಸಮ್ಮೋಹವಿನೋದನೀ-ಅಟ್ಠಕಥಾ • Sammohavinodanī-aṭṭhakathā / ೧. ಸುತ್ತನ್ತಭಾಜನೀಯವಣ್ಣನಾ • 1. Suttantabhājanīyavaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ವಿಭಙ್ಗ-ಅನುಟೀಕಾ • Vibhaṅga-anuṭīkā / ೧೩. ಅಪ್ಪಮಞ್ಞಾವಿಭಙ್ಗೋ • 13. Appamaññāvibhaṅgo
