| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൭. അപ്പമാദസുത്തവണ്ണനാ
7. Appamādasuttavaṇṇanā
൧൨൮. സത്തമേ സമധിഗ്ഗയ്ഹാതി സമധിഗ്ഗണ്ഹിത്വാ, ആദിയിത്വാതി അത്ഥോ. അപ്പമാദോതി കാരാപകഅപ്പമാദോ. സമോധാനന്തി സമവധാനം ഉപക്ഖേപം. ഏവമേവ ഖോതി ഹത്ഥിപദം വിയ ഹി കാരാപകഅപ്പമാദോ, സേസപദജാതാനി വിയ അവസേസാ ചതുഭൂമകാ കുസലധമ്മാ. തേ ഹത്ഥിപദേ സേസപദാനി വിയ അപ്പമാദേ സമോധാനം ഗച്ഛന്തി, അപ്പമാദസ്സ അന്തോ പരിവത്തന്തി. യഥാ ച ഹത്ഥിപദം സേസപദാനം അഗ്ഗം സേട്ഠം, ഏവം അപ്പമാദോ സേസധമ്മാനന്തി ദസ്സേതി. മഹഗ്ഗതലോകുത്തരധമ്മാനമ്പി ഹേസ പടിലാഭകട്ഠേന ലോകിയോപി സമാനോ അഗ്ഗോവ ഹോതി.
128. Sattame samadhiggayhāti samadhiggaṇhitvā, ādiyitvāti attho. Appamādoti kārāpakaappamādo. Samodhānanti samavadhānaṃ upakkhepaṃ. Evameva khoti hatthipadaṃ viya hi kārāpakaappamādo, sesapadajātāni viya avasesā catubhūmakā kusaladhammā. Te hatthipade sesapadāni viya appamāde samodhānaṃ gacchanti, appamādassa anto parivattanti. Yathā ca hatthipadaṃ sesapadānaṃ aggaṃ seṭṭhaṃ, evaṃ appamādo sesadhammānanti dasseti. Mahaggatalokuttaradhammānampi hesa paṭilābhakaṭṭhena lokiyopi samāno aggova hoti.
അപ്പമാദം പസംസന്തീതി ‘‘ഏതാനി ആയുആദീനി പത്ഥയന്തേന അപ്പമാദോവ കാതബ്ബോ’’തി അപ്പമാദമേവ പസംസന്തി. യസ്മാ വാ പുഞ്ഞകിരിയാസു പണ്ഡിതാ അപ്പമാദം പസംസന്തി, തസ്മാ ആയുആദീനി പത്ഥയന്തേന അപ്പമാദോവ കാതബ്ബോതി അത്ഥോ. അത്ഥാഭിസമയാതി അത്ഥപടിലാഭാ. സത്തമം.
Appamādaṃ pasaṃsantīti ‘‘etāni āyuādīni patthayantena appamādova kātabbo’’ti appamādameva pasaṃsanti. Yasmā vā puññakiriyāsu paṇḍitā appamādaṃ pasaṃsanti, tasmā āyuādīni patthayantena appamādova kātabboti attho. Atthābhisamayāti atthapaṭilābhā. Sattamaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൭. അപ്പമാദസുത്തം • 7. Appamādasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൭. അപ്പമാദസുത്തവണ്ണനാ • 7. Appamādasuttavaṇṇanā
