| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. အပ္ပမာဒသုတ္တဝဏ္ဏနာ
7. Appamādasuttavaṇṇanā
၁၂၈. သမဓိဂ္ဂယ္ဟာတိ သမ္မာ အတိဝိယ ဂဟေတ္ဝာ, ဉာယေန ဝိသေသတော ဂဏ္ဟိတ္ဝာ။ ကာရာပကအပ္ပမာဒောတိ တိဏ္ဏံ ပုညကိရိယဝတ္ထူနံ ပဝတ္တကအပ္ပမာဒော။ သမဝဓာနန္တိ သမဝရောဓံ အန္တောဂဓံ။ ဥပက္ခေပန္တိ ဗဟိ အဟုတ္ဝာ ပက္ခိပိတဗ္ဗတံ။ သေသပဒဇာတာနိ ဝိယ အဝ။ပေ.။ ဓမ္မာ သပ္ပဒေသတ္တာ။ အပ္ပမာဒေ သမောဓာနံ ဂစ္ဆန္တိ တသ္သ နိပ္ပဒေသတ္တာ။ အဂ္ဂံ သေဋ္ဌံ မဟန္တံ သေသဓမ္မာနံ အပ္ပမာဒော။ ပဋိလာဘကဋ္ဌေနာတိ အဓိဂမဟေတုတာယ။ လောကိယောပိ သမာနောတိ ကာမာဝစရောပိ သမာနော။ မဟဂ္ဂတာနုတ္တရာနံ ပုဗ္ဗဘာဂေ ပဝတ္တအပ္ပမာဒော ဟိ ဣဓာဓိပ္ပေတော။
128.Samadhiggayhāti sammā ativiya gahetvā, ñāyena visesato gaṇhitvā. Kārāpakaappamādoti tiṇṇaṃ puññakiriyavatthūnaṃ pavattakaappamādo. Samavadhānanti samavarodhaṃ antogadhaṃ. Upakkhepanti bahi ahutvā pakkhipitabbataṃ. Sesapadajātāni viya ava…pe… dhammā sappadesattā. Appamāde samodhānaṃ gacchanti tassa nippadesattā. Aggaṃ seṭṭhaṃ mahantaṃ sesadhammānaṃappamādo. Paṭilābhakaṭṭhenāti adhigamahetutāya. Lokiyopi samānoti kāmāvacaropi samāno. Mahaggatānuttarānaṃ pubbabhāge pavattaappamādo hi idhādhippeto.
ပသံသန္တိ ပဏ္ဍိတာတိ ယောဇနာ။ အပ္ပမာဒသ္သ ပာသံသဘာဝေ ဧကန္တတော ကတ္တဗ္ဗတာယ ပန ‘‘ဧတာနီ’’တိအာဒိနာ ကာရဏံ အာဟ။ ဣမိသ္သာ ယောဇနာယ ‘‘ပုညကိရိယာသူ’’တိ ပဒသ္သ ‘‘အပ္ပမတ္တော’’တိ ဣမိနာ သမ္ဗန္ဓော။ ယသ္မာ ပဏ္ဍိတာ အပ္ပမာဒံ ပသံသန္တိ, ယသ္မာ စ ပုညကိရိယာသု အပ္ပမတ္တော ဥဘော အတ္ထေ အဓိဂ္ဂဏ္ဟာတိ, တသ္မာ အာယုအာဒီနိ ပတ္ထယန္တေန အပ္ပမာဒောဝ ကာတဗ္ဗောတိ။ ဒုတိယယောဇနာယ ပန ပဏ္ဍိတာ အပ္ပမာဒံ ပသံသန္တိ။ ကတ္ထ? ပုညကိရိယာသု။ ကသ္မာတိ စေ? အပ္ပမတ္တောတိအာဒိ။ တေနာဟ ‘‘ယသ္မာ။ပေ.။ အတ္ထော’’တိ။ အတ္ထပဋိလာဘာတိ ဒိဋ္ဌဓမ္မိကာဒိဟိတပဋိလာဘာ။
Pasaṃsanti paṇḍitāti yojanā. Appamādassa pāsaṃsabhāve ekantato kattabbatāya pana ‘‘etānī’’tiādinā kāraṇaṃ āha. Imissā yojanāya ‘‘puññakiriyāsū’’ti padassa ‘‘appamatto’’ti iminā sambandho. Yasmā paṇḍitā appamādaṃ pasaṃsanti, yasmā ca puññakiriyāsu appamatto ubho atthe adhiggaṇhāti, tasmā āyuādīni patthayantena appamādova kātabboti. Dutiyayojanāya pana paṇḍitā appamādaṃ pasaṃsanti. Kattha? Puññakiriyāsu. Kasmāti ce? Appamattotiādi. Tenāha ‘‘yasmā…pe… attho’’ti. Atthapaṭilābhāti diṭṭhadhammikādihitapaṭilābhā.
အပ္ပမာဒသုတ္တဝဏ္ဏနာ နိဋ္ဌိတာ။
Appamādasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. အပ္ပမာဒသုတ္တံ • 7. Appamādasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. အပ္ပမာဒသုတ္တဝဏ္ဏနာ • 7. Appamādasuttavaṇṇanā
