| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
১১. আপাযিকসুত্তং
11. Āpāyikasuttaṃ
৪৮. ৰুত্তঞ্হেতং ভগৰতা, ৰুত্তমরহতাতি মে সুতং –
48. Vuttañhetaṃ bhagavatā, vuttamarahatāti me sutaṃ –
‘‘দ্ৰেমে, ভিক্খৰে, আপাযিকা নেরযিকা ইদমপ্পহায। কতমে দ্ৰে? যো চ অব্রহ্মচারী ব্রহ্মচারিপটিঞ্ঞো, যো চ পরিপুণ্ণং পরিসুদ্ধং ব্রহ্মচরিযং চরন্তং অমূলকেন অব্রহ্মচরিযেন অনুদ্ধংসেতি। ইমে খো, ভিক্খৰে, দ্ৰে আপাযিকা নেরযিকা ইদমপ্পহাযা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Dveme, bhikkhave, āpāyikā nerayikā idamappahāya. Katame dve? Yo ca abrahmacārī brahmacāripaṭiñño, yo ca paripuṇṇaṃ parisuddhaṃ brahmacariyaṃ carantaṃ amūlakena abrahmacariyena anuddhaṃseti. Ime kho, bhikkhave, dve āpāyikā nerayikā idamappahāyā’’ti. Etamatthaṃ bhagavā avoca. Tatthetaṃ iti vuccati –
‘‘অভূতৰাদী নিরযং উপেতি, যো ৰাপি কত্ৰা ন করোমি চাহ।
‘‘Abhūtavādī nirayaṃ upeti, yo vāpi katvā na karomi cāha;
উভোপি তে পেচ্চ সমা ভৰন্তি, নিহীনকম্মা মনুজা পরত্থ॥
Ubhopi te pecca samā bhavanti, nihīnakammā manujā parattha.
‘‘কাসাৰকণ্ঠা বহৰো, পাপধম্মা অসঞ্ঞতা।
‘‘Kāsāvakaṇṭhā bahavo, pāpadhammā asaññatā;
পাপা পাপেহি কম্মেহি, নিরযং তে উপপজ্জরে॥
Pāpā pāpehi kammehi, nirayaṃ te upapajjare.
‘‘সেয্যো অযোগুল়ো ভুত্তো, তত্তো অগ্গিসিখূপমো।
‘‘Seyyo ayoguḷo bhutto, tatto aggisikhūpamo;
যঞ্চে ভুঞ্জেয্য দুস্সীলো, রট্ঠপিণ্ডমসঞ্ঞতো’’তি॥
Yañce bhuñjeyya dussīlo, raṭṭhapiṇḍamasaññato’’ti.
অযম্পি অত্থো ৰুত্তো ভগৰতা, ইতি মে সুতন্তি। একাদসমং।
Ayampi attho vutto bhagavatā, iti me sutanti. Ekādasamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ১১. আপাযিকসুত্তৰণ্ণনা • 11. Āpāyikasuttavaṇṇanā
