| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၂၆. အာပတ္တိအာဝိကရဏဝိဓိ
126. Āpattiāvikaraṇavidhi
၂၂၀. တေန ခော ပန သမယေန အညတရော ဘိက္ခု ပဝာရယမာနော အာပတ္တိံ သရတိ။ အထ ခော တသ္သ ဘိက္ခုနော ဧတဒဟောသိ – ‘‘ဘဂဝတာ ပညတ္တံ ‘န သာပတ္တိကေန ပဝာရေတဗ္ဗ’န္တိ။ အဟဉ္စမ္ဟိ အာပတ္တိံ အာပန္နော။ ကထံ နု ခော မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။
220. Tena kho pana samayena aññataro bhikkhu pavārayamāno āpattiṃ sarati. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena pavāretabba’nti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ.
ဣဓ ပန, ဘိက္ခဝေ, ဘိက္ခု ပဝာရယမာနော အာပတ္တိံ သရတိ။ တေန, ဘိက္ခဝေ, ဘိက္ခုနာ သာမန္တော ဘိက္ခု ဧဝမသ္သ ဝစနီယော – ‘‘အဟံ, အာဝုသော, ဣတ္ထန္နာမံ အာပတ္တိံ အာပန္နော။ ဣတော ဝုဋ္ဌဟိတ္ဝာ တံ အာပတ္တိံ ပဋိကရိသ္သာမီ’’တိ ဝတ္ဝာ ပဝာရေတဗ္ဗံ; န တ္ဝေဝ တပ္ပစ္စယာ ပဝာရဏာယ အန္တရာယော ကာတဗ္ဗော။
Idha pana, bhikkhave, bhikkhu pavārayamāno āpattiṃ sarati. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmaṃ āpattiṃ āpanno. Ito vuṭṭhahitvā taṃ āpattiṃ paṭikarissāmī’’ti vatvā pavāretabbaṃ; na tveva tappaccayā pavāraṇāya antarāyo kātabbo.
ဣဓ ပန, ဘိက္ခဝေ, ဘိက္ခု ပဝာရယမာနော အာပတ္တိယာ ဝေမတိကော ဟောတိ။ တေန, ဘိက္ခဝေ,
Idha pana, bhikkhave, bhikkhu pavārayamāno āpattiyā vematiko hoti. Tena, bhikkhave,
ဘိက္ခုနာ သာမန္တော ဘိက္ခု ဧဝမသ္သ ဝစနီယော – ‘‘အဟံ, အာဝုသော, ဣတ္ထန္နာမာယ အာပတ္တိယာ ဝေမတိကော; ယဒာ နိဗ္ဗေမတိကော ဘဝိသ္သာမိ တဒာ တံ အာပတ္တိံ ပဋိကရိသ္သာမီ’’တိ ဝတ္ဝာ ပဝာရေတဗ္ဗံ; န တ္ဝေဝ တပ္ပစ္စယာ ပဝာရဏာယ အန္တရာယော ကာတဗ္ဗောတိ။
Bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmāya āpattiyā vematiko; yadā nibbematiko bhavissāmi tadā taṃ āpattiṃ paṭikarissāmī’’ti vatvā pavāretabbaṃ; na tveva tappaccayā pavāraṇāya antarāyo kātabboti.
အာပတ္တိ အာဝိကရဏဝိဓိ နိဋ္ဌိတာ။
Āpatti āvikaraṇavidhi niṭṭhitā.
