| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၉၃. အာပတ္တိအာဝိကရဏဝိဓိ
93. Āpattiāvikaraṇavidhi
၁၇၀. တေန ခော ပန သမယေန အညတရော ဘိက္ခု ပာတိမောက္ခေ ဥဒ္ဒိသ္သမာနေ အာပတ္တိံ သရတိ။ အထ ခော တသ္သ ဘိက္ခုနော ဧတဒဟောသိ – ‘‘ဘဂဝတာ ပညတ္တံ ‘န သာပတ္တိကေန ဥပောသထော ကာတဗ္ဗော’တိ။ အဟဉ္စမ္ဟိ အာပတ္တိံ အာပန္နော။ ကထံ နု ခော မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။
170. Tena kho pana samayena aññataro bhikkhu pātimokkhe uddissamāne āpattiṃ sarati. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena uposatho kātabbo’ti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ.
ဣဓ ပန, ဘိက္ခဝေ, ဘိက္ခု ပာတိမောက္ခေ ဥဒ္ဒိသ္သမာနေ အာပတ္တိံ သရတိ။ တေန, ဘိက္ခဝေ, ဘိက္ခုနာ သာမန္တော ဘိက္ခု ဧဝမသ္သ ဝစနီယော – ‘‘အဟံ, အာဝုသော, ဣတ္ထန္နာမံ အာပတ္တိံ အာပန္နော။ ဣတော ဝုဋ္ဌဟိတ္ဝာ တံ အာပတ္တိံ ပဋိကရိသ္သာမီ’’တိ ဝတ္ဝာ ဥပောသထော ကာတဗ္ဗော, ပာတိမောက္ခံ သောတဗ္ဗံ, န တ္ဝေဝ တပ္ပစ္စယာ ဥပောသထသ္သ အန္တရာယော ကာတဗ္ဗော။
Idha pana, bhikkhave, bhikkhu pātimokkhe uddissamāne āpattiṃ sarati. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmaṃ āpattiṃ āpanno. Ito vuṭṭhahitvā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ, na tveva tappaccayā uposathassa antarāyo kātabbo.
ဣဓ ပန, ဘိက္ခဝေ, ဘိက္ခု ပာတိမောက္ခေ ဥဒ္ဒိသ္သမာနေ အာပတ္တိယာ ဝေမတိကော ဟောတိ။ တေန, ဘိက္ခဝေ, ဘိက္ခုနာ သာမန္တော ဘိက္ခု ဧဝမသ္သ ဝစနီယော – ‘‘အဟံ, အာဝုသော, ဣတ္ထန္နာမာယ အာပတ္တိယာ ဝေမတိကော။ ယဒာ နိဗ္ဗေမတိကော ဘဝိသ္သာမိ, တဒာ တံ အာပတ္တိံ ပဋိကရိသ္သာမီ’’တိ ဝတ္ဝာ ဥပောသထော ကာတဗ္ဗော, ပာတိမောက္ခံ သောတဗ္ဗံ; န တ္ဝေဝ တပ္ပစ္စယာ ဥပောသထသ္သ အန္တရာယော ကာတဗ္ဗောတိ။
Idha pana, bhikkhave, bhikkhu pātimokkhe uddissamāne āpattiyā vematiko hoti. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmāya āpattiyā vematiko. Yadā nibbematiko bhavissāmi, tadā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ; na tveva tappaccayā uposathassa antarāyo kātabboti.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အာပတ္တိပဋိကမ္မဝိဓိကထာ • Āpattipaṭikammavidhikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အာပတ္တိပဋိကမ္မဝိဓိကထာဒိဝဏ္ဏနာ • Āpattipaṭikammavidhikathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၉၂. အာပတ္တိပဋိကမ္မဝိဓိကထာ • 92. Āpattipaṭikammavidhikathā
