| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā |
೯. ಅಪರಿನಿಪ್ಫನ್ನಕಥಾವಣ್ಣನಾ
9. Aparinipphannakathāvaṇṇanā
೯೧೭-೯೧೮. ಅನಿಚ್ಚಾದಿಕೋ ಭಾವೋತಿ ಅನಿಚ್ಚಸಙ್ಖಾರಪಟಿಚ್ಚಸಮುಪ್ಪನ್ನತಾದಿಕೋ ಭಾವೋ ಧಮ್ಮೋ ಪಕತಿ ಏತಸ್ಸಾತಿ ಅತ್ಥೋ। ದುಕ್ಖಞ್ಞೇವ ಪರಿನಿಪ್ಫನ್ನನ್ತಿ ‘‘ದುಕ್ಖಸಚ್ಚಂ ಸನ್ಧಾಯ ಪುಚ್ಛಾ ಕತಾ, ನ ದುಕ್ಖತಾಮತ್ತ’’ನ್ತಿ ಅಯಮತ್ಥೋ ವಿಞ್ಞಾಯತಿ ‘‘ನ ಕೇವಲಞ್ಹಿ ಪಠಮಸಚ್ಚಮೇವ ದುಕ್ಖ’’ನ್ತಿ ವಚನೇನ। ತಥಾ ಸತಿ ಪರವಾದಿನಾ ಚಕ್ಖಾಯತನಾದೀನಂ ಅಞ್ಞೇಸಞ್ಚ ತಂಸರಿಕ್ಖಕಾನಂ ಧಮ್ಮಾನಂ ಪರಿನಿಪ್ಫನ್ನತಾ ನಾನುಜಾನಿತಬ್ಬಾ ಸಿಯಾ। ಕಸ್ಮಾ? ತೇಸಮ್ಪಿ ಹಿ ದುಕ್ಖಸಚ್ಚೇನ ಸಙ್ಗಹೋ, ನ ಇತರಸಚ್ಚೇಹಿ। ಯಞ್ಹಿ ಸಮುದಯಸಚ್ಚತೋ ನಿಬ್ಬತ್ತಂ, ತಂ ನಿಪ್ಪರಿಯಾಯತೋ ದುಕ್ಖಸಚ್ಚಂ , ಇತರಂ ಸಙ್ಖಾರದುಕ್ಖತಾಯ ದುಕ್ಖನ್ತಿ ಇಮಮತ್ಥಂ ದಸ್ಸೇನ್ತೋ ‘‘ನ ಕೇವಲಞ್ಹೀ’’ತಿಆದಿಮಾಹ। ತತ್ಥ ನ ಹಿ ಅನುಪಾದಿನ್ನಾನೀತಿ ಇಮಿನಾ ಚಕ್ಖಾಯತನಾದೀನಂ ಸಮುದಯಸಚ್ಚೇನ ಸಙ್ಗಹಾಭಾವಮಾಹ। ಲೋಕುತ್ತರಾನೀತಿ ಇಮಿನಾ ನಿರೋಧಮಗ್ಗಸಚ್ಚೇಹಿ। ಯದಿ ಏವಮೇತ್ಥ ಯುತ್ತಿ ವತ್ತಬ್ಬಾ, ಕಿಮೇತ್ಥ ವತ್ತಬ್ಬಂ? ಸಭಾವೋ ಹೇಸ ಪರವಾದಿವಾದಸ್ಸ, ಯದಿದಂ ಪುಬ್ಬೇನಾಪರಮಸಂಸನ್ದನಂ। ತಥಾ ಹಿ ಸೋ ವಿಞ್ಞೂಹಿ ಪಟಿಕ್ಖಿತ್ತೋ। ತಥಾ ಚೇವ ತಂ ಅಮ್ಹೇಹಿ ತತ್ಥ ತತ್ಥ ವಿಭಾವಿತಂ। ಏತನ್ತಿ ‘‘ರೂಪಂ ಅಪರಿನಿಪ್ಫನ್ನಂ, ದುಕ್ಖಞ್ಞೇವ ಪರಿನಿಪ್ಫನ್ನ’’ನ್ತಿ ಯದೇತಂ ತಯಾ ವುತ್ತಂ, ಏತಂ ನೋ ವತ ರೇ ವತ್ತಬ್ಬೇ। ಕಸ್ಮಾ? ರೂಪಸ್ಸ ಚ ದುಕ್ಖತ್ತಾ। ರೂಪಞ್ಹಿ ಅನಿಚ್ಚಂ ದುಕ್ಖಾಧಿಟ್ಠಾನಞ್ಚ। ತೇನ ವುತ್ತಂ ‘‘ಯದನಿಚ್ಚಂ ತಂ ದುಕ್ಖಂ। ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ’’ತಿ ಚ।
917-918. Aniccādikobhāvoti aniccasaṅkhārapaṭiccasamuppannatādiko bhāvo dhammo pakati etassāti attho. Dukkhaññeva parinipphannanti ‘‘dukkhasaccaṃ sandhāya pucchā katā, na dukkhatāmatta’’nti ayamattho viññāyati ‘‘na kevalañhi paṭhamasaccameva dukkha’’nti vacanena. Tathā sati paravādinā cakkhāyatanādīnaṃ aññesañca taṃsarikkhakānaṃ dhammānaṃ parinipphannatā nānujānitabbā siyā. Kasmā? Tesampi hi dukkhasaccena saṅgaho, na itarasaccehi. Yañhi samudayasaccato nibbattaṃ, taṃ nippariyāyato dukkhasaccaṃ , itaraṃ saṅkhāradukkhatāya dukkhanti imamatthaṃ dassento ‘‘na kevalañhī’’tiādimāha. Tattha na hi anupādinnānīti iminā cakkhāyatanādīnaṃ samudayasaccena saṅgahābhāvamāha. Lokuttarānīti iminā nirodhamaggasaccehi. Yadi evamettha yutti vattabbā, kimettha vattabbaṃ? Sabhāvo hesa paravādivādassa, yadidaṃ pubbenāparamasaṃsandanaṃ. Tathā hi so viññūhi paṭikkhitto. Tathā ceva taṃ amhehi tattha tattha vibhāvitaṃ. Etanti ‘‘rūpaṃ aparinipphannaṃ, dukkhaññeva parinipphanna’’nti yadetaṃ tayā vuttaṃ, etaṃ no vata re vattabbe. Kasmā? Rūpassa ca dukkhattā. Rūpañhi aniccaṃ dukkhādhiṭṭhānañca. Tena vuttaṃ ‘‘yadaniccaṃ taṃ dukkhaṃ. Saṃkhittena pañcupādānakkhandhā dukkhā’’ti ca.
ಅಪರಿನಿಪ್ಫನ್ನಕಥಾವಣ್ಣನಾ ನಿಟ್ಠಿತಾ।
Aparinipphannakathāvaṇṇanā niṭṭhitā.
ತೇವೀಸತಿಮವಗ್ಗವಣ್ಣನಾ ನಿಟ್ಠಿತಾ।
Tevīsatimavaggavaṇṇanā niṭṭhitā.
ಕಥಾವತ್ಥುಪಕರಣ-ಅನುಟೀಕಾ ಸಮತ್ತಾ।
Kathāvatthupakaraṇa-anuṭīkā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೨೨೬) ೯. ಅಪರಿನಿಪ್ಫನ್ನಕಥಾ • (226) 9. Aparinipphannakathā
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೯. ಅಪರಿನಿಪ್ಫನ್ನಕಥಾವಣ್ಣನಾ • 9. Aparinipphannakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೯. ಅಪರಿನಿಪ್ಫನ್ನಕಥಾವಣ್ಣನಾ • 9. Aparinipphannakathāvaṇṇanā
