| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. அபரஉத்தரத்தே²ரஅபதா³னவண்ணனா
7. Aparauttarattheraapadānavaṇṇanā
ஸத்தமாபதா³னே நிப்³பு³தே லோகனாத²ம்ஹீதிஆதி³கங் ஆயஸ்மதோ அபரஸ்ஸ உத்தரத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ இதோ சதுன்னவுதிகப்பே ஸித்³த⁴த்த²ஸ்ஸ ப⁴க³வதோ காலே குலகே³ஹே நிப்³ப³த்தித்வா வயப்பத்தோ விஞ்ஞுதங் பத்வா ஸாஸனே லத்³த⁴ப்பஸாதோ³ ஹுத்வா உபாஸகத்தங் நிவேதே³ஸி. ஸோ ஸத்த²ரி பரினிப்³பு³தே அத்தனோ ஞாதகே ஸன்னிபாதெத்வா ப³ஹுபூஜாஸக்காரங் ஸங்ஹரித்வா தா⁴துபூஜங் அகாஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸாகேதே ப்³ராஹ்மணகுலே நிப்³ப³த்தித்வா உத்தரோதி லத்³த⁴னாமோ வயப்பத்தோ கேனசிதே³வ கரணீயேன ஸாவத்தி²ங் க³தோ கண்ட³ம்ப³மூலே கதங் யமகபாடிஹாரியங் தி³ஸ்வா பஸீதி³த்வா புன காளகாராமஸுத்ததே³ஸனாய அபி⁴வட்³ட⁴மானஸத்³தோ⁴ பப்³ப³ஜித்வா ஸத்தா²ரா ஸத்³தி⁴ங் ராஜக³ஹங் க³ந்த்வா உபஸம்பத³ங் லபி⁴த்வா ததே²வ சரந்தோ விபஸ்ஸனங் பட்ட²பெத்வா நசிரஸ்ஸேவ ச²ளபி⁴ஞ்ஞோ அஹோஸி. ச²ளபி⁴ஞ்ஞோ பன ஹுத்வா ஸத்த²ரி ஸாவத்தி²யங் விஹரந்தே பு³த்³து⁴பட்டா²னத்த²ங் ராஜக³ஹதோ ஸாவத்தி²ங் உபக³தோ பி⁴க்கூ²ஹி – ‘‘கிங், ஆவுஸோ, பப்³ப³ஜ்ஜாகிச்சங் தயா மத்த²கங் பாபித’’ந்தி புட்டோ² அஞ்ஞங் ப்³யாகாஸி.
Sattamāpadāne nibbute lokanāthamhītiādikaṃ āyasmato aparassa uttarattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ito catunnavutikappe siddhatthassa bhagavato kāle kulagehe nibbattitvā vayappatto viññutaṃ patvā sāsane laddhappasādo hutvā upāsakattaṃ nivedesi. So satthari parinibbute attano ñātake sannipātetvā bahupūjāsakkāraṃ saṃharitvā dhātupūjaṃ akāsi. So tena puññakammena devamanussesu saṃsaranto imasmiṃ buddhuppāde sākete brāhmaṇakule nibbattitvā uttaroti laddhanāmo vayappatto kenacideva karaṇīyena sāvatthiṃ gato kaṇḍambamūle kataṃ yamakapāṭihāriyaṃ disvā pasīditvā puna kāḷakārāmasuttadesanāya abhivaḍḍhamānasaddho pabbajitvā satthārā saddhiṃ rājagahaṃ gantvā upasampadaṃ labhitvā tatheva caranto vipassanaṃ paṭṭhapetvā nacirasseva chaḷabhiñño ahosi. Chaḷabhiñño pana hutvā satthari sāvatthiyaṃ viharante buddhupaṭṭhānatthaṃ rājagahato sāvatthiṃ upagato bhikkhūhi – ‘‘kiṃ, āvuso, pabbajjākiccaṃ tayā matthakaṃ pāpita’’nti puṭṭho aññaṃ byākāsi.
93. அரஹத்தங் பன பத்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ நிப்³பு³தே லோகனாத²ம்ஹீதிஆதி³மாஹ. தங் ஸப்³ப³ங் ஹெட்டா² வுத்தனயத்தா உத்தானத்த²மேவாதி.
93. Arahattaṃ pana patvā somanassajāto attano pubbacaritāpadānaṃ pakāsento nibbute lokanāthamhītiādimāha. Taṃ sabbaṃ heṭṭhā vuttanayattā uttānatthamevāti.
அபரஉத்தரத்தே²ரஅபதா³னவண்ணனா ஸமத்தா.
Aparauttarattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. அபரஉத்தரத்தே²ரஅபதா³னங் • 7. Aparauttarattheraapadānaṃ
