| Library / Tipiṭaka / ติปิฎก • Tipiṭaka / เถรคาถาปาฬิ • Theragāthāpāḷi |
๗. (อปร)-โคตมเตฺถรคาถา
7. (Apara)-gotamattheragāthā
๕๘๗.
587.
‘‘วิชาเนยฺย สกํ อตฺถํ, อวโลเกยฺยาถ ปาวจนํ;
‘‘Vijāneyya sakaṃ atthaṃ, avalokeyyātha pāvacanaṃ;
ยเญฺจตฺถ อสฺส ปติรูปํ, สามญฺญํ อชฺฌุปคตสฺสฯ
Yañcettha assa patirūpaṃ, sāmaññaṃ ajjhupagatassa.
๕๘๘.
588.
‘‘มิตฺตํ อิธ จ กลฺยาณํ, สิกฺขา วิปุลํ สมาทานํ;
‘‘Mittaṃ idha ca kalyāṇaṃ, sikkhā vipulaṃ samādānaṃ;
สุสฺสูสา จ ครูนํ, เอตํ สมณสฺส ปติรูปํฯ
Sussūsā ca garūnaṃ, etaṃ samaṇassa patirūpaṃ.
๕๘๙.
589.
‘‘พุเทฺธสุ สคารวตา, ธเมฺม อปจิติ ยถาภูตํ;
‘‘Buddhesu sagāravatā, dhamme apaciti yathābhūtaṃ;
สเงฺฆ จ จิตฺติกาโร, เอตํ สมณสฺส ปติรูปํฯ
Saṅghe ca cittikāro, etaṃ samaṇassa patirūpaṃ.
๕๙๐.
590.
‘‘อาจารโคจเร ยุโตฺต, อาชีโว โสธิโต อคารโยฺห;
‘‘Ācāragocare yutto, ājīvo sodhito agārayho;
จิตฺตสฺส จ สณฺฐปนํ, เอตํ สมณสฺส ปติรูปํฯ
Cittassa ca saṇṭhapanaṃ, etaṃ samaṇassa patirūpaṃ.
๕๙๑.
591.
‘‘จาริตฺตํ อถ วาริตฺตํ, อิริยาปถิยํ ปสาทนิยํ;
‘‘Cārittaṃ atha vārittaṃ, iriyāpathiyaṃ pasādaniyaṃ;
อธิจิเตฺต จ อาโยโค, เอตํ สมณสฺส ปติรูปํฯ
Adhicitte ca āyogo, etaṃ samaṇassa patirūpaṃ.
๕๙๒.
592.
‘‘อารญฺญกานิ เสนาสนานิ, ปนฺตานิ อปฺปสทฺทานิ;
‘‘Āraññakāni senāsanāni, pantāni appasaddāni;
ภชิตพฺพานิ มุนินา, เอตํ สมณสฺส ปติรูปํฯ
Bhajitabbāni muninā, etaṃ samaṇassa patirūpaṃ.
๕๙๓.
593.
‘‘สีลญฺจ พาหุสจฺจญฺจ, ธมฺมานํ ปวิจโย ยถาภูตํ;
‘‘Sīlañca bāhusaccañca, dhammānaṃ pavicayo yathābhūtaṃ;
สจฺจานํ อภิสมโย, เอตํ สมณสฺส ปติรูปํฯ
Saccānaṃ abhisamayo, etaṃ samaṇassa patirūpaṃ.
๕๙๔.
594.
‘‘ภาเวยฺย จ อนิจฺจนฺติ, อนตฺตสญฺญํ อสุภสญฺญญฺจ;
‘‘Bhāveyya ca aniccanti, anattasaññaṃ asubhasaññañca;
โลกมฺหิ จ อนภิรติํ, เอตํ สมณสฺส ปติรูปํฯ
Lokamhi ca anabhiratiṃ, etaṃ samaṇassa patirūpaṃ.
๕๙๕.
595.
‘‘ภาเวยฺย จ โพชฺฌเงฺค, อิทฺธิปาทานิ อินฺทฺริยานิ พลานิ;
‘‘Bhāveyya ca bojjhaṅge, iddhipādāni indriyāni balāni;
อฎฺฐงฺคมคฺคมริยํ, เอตํ สมณสฺส ปติรูปํฯ
Aṭṭhaṅgamaggamariyaṃ, etaṃ samaṇassa patirūpaṃ.
๕๙๖.
596.
‘‘ตณฺหํ ปชเหยฺย มุนิ, สมูลเก อาสเว ปทาเลยฺย;
‘‘Taṇhaṃ pajaheyya muni, samūlake āsave padāleyya;
วิหเรยฺย วิปฺปมุโตฺต, เอตํ สมณสฺส ปติรูป’’นฺติฯ
Vihareyya vippamutto, etaṃ samaṇassa patirūpa’’nti.
… โคตโม เถโร…ฯ
… Gotamo thero….
ทสกนิปาโต นิฎฺฐิโตฯ
Dasakanipāto niṭṭhito.
ตตฺรุทฺทานํ –
Tatruddānaṃ –
กาฬุทายี จ โส เถโร, เอกวิหารี จ กปฺปิโน;
Kāḷudāyī ca so thero, ekavihārī ca kappino;
จูฬปนฺถโก กโปฺป จ, อุปเสโน จ โคตโม;
Cūḷapanthako kappo ca, upaseno ca gotamo;
สตฺติเม ทสเก เถรา, คาถาโย เจตฺถ สตฺตตีติฯ
Sattime dasake therā, gāthāyo cettha sattatīti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรคาถา-อฎฺฐกถา • Theragāthā-aṭṭhakathā / ๗. (อปร)-โคตมเตฺถรคาถาวณฺณนา • 7. (Apara)-gotamattheragāthāvaṇṇanā
