| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
អនុសាសនីកថាវណ្ណនា
Anusāsanīkathāvaṇṇanā
បរាជិតកិលេសេនាតិ សន្តានេ បុន អនុប្បត្តិធម្មតាបាទនេន ចតូហិ មគ្គញាណេហិ សហ វាសនាយ សមុច្ឆិន្នសព្ពកិលេសេន។ ឥធាតិ ឥមស្មិំ សាសនេ។ តេន សិក្ខាបទេន សមំ អញ្ញំ អនេកនយវោកិណ្ណំ គម្ភីរត្ថវិនិច្ឆយំ កិញ្ចិ សិក្ខាបទំ ន វិជ្ជតីតិ យោជេតព្ពំ។ អត្ថោ ច វិនិច្ឆយោ ច អត្ថវិនិច្ឆយា, គម្ភីរា អត្ថវិនិច្ឆយា អស្សាតិ គម្ភីរត្ថវិនិច្ឆយំ។ វត្ថុម្ហិ ឱតិណ្ណេតិ ចោទនាវត្ថុម្ហិ សង្ឃមជ្ឈំ ឱតិណ្ណេ, ឯកេន ឯកស្មិំ ចោទិតេ, សយមេវ វា អាគន្ត្វា អត្តនោ កតវីតិក្កមេ អារោចិតេតិ វុត្តំ ហោតិ។ ឯត្ថាតិ ឱតិណ្ណេ វត្ថុម្ហិ។
Parājitakilesenāti santāne puna anuppattidhammatāpādanena catūhi maggañāṇehi saha vāsanāya samucchinnasabbakilesena. Idhāti imasmiṃ sāsane. Tena sikkhāpadena samaṃ aññaṃ anekanayavokiṇṇaṃ gambhīratthavinicchayaṃ kiñci sikkhāpadaṃ na vijjatīti yojetabbaṃ. Attho ca vinicchayo ca atthavinicchayā, gambhīrā atthavinicchayā assāti gambhīratthavinicchayaṃ. Vatthumhi otiṇṇeti codanāvatthumhi saṅghamajjhaṃ otiṇṇe, ekena ekasmiṃ codite, sayameva vā āgantvā attano katavītikkame ārociteti vuttaṃ hoti. Etthāti otiṇṇe vatthumhi.
វិនិច្ឆយំ ករោន្តេន សហសា ‘‘បារាជិក’’ន្តិ អវត្វា យំ កត្តព្ពំ, តំ ទស្សេតុំ ‘‘បាឡិ’’ន្តិអាទិមាហ។ វិនិច្ឆយោតិ បារាជិកាបត្តិវិនិច្ឆយោ។ អវត្វាវាតិ ‘‘ត្វំ បារាជិកំ អាបន្នោ’’តិ អវត្វាវ។ កប្បិយេបិ ច វត្ថុស្មិន្តិ អវត្វាបិ គណ្ហិតុំ កប្បិយេ មាតុបិតុសន្តកេបិ វត្ថុស្មិំ។ លហុវត្តិនោតិ ថេយ្យចិត្តុប្បាទេន លហុបរិវត្តិនោ។ អាសីវិសន្តិ សីឃមេវ សកលសរីរេ ផរណសមត្ថវិសំ។
Vinicchayaṃ karontena sahasā ‘‘pārājika’’nti avatvā yaṃ kattabbaṃ, taṃ dassetuṃ ‘‘pāḷi’’ntiādimāha. Vinicchayoti pārājikāpattivinicchayo. Avatvāvāti ‘‘tvaṃ pārājikaṃ āpanno’’ti avatvāva. Kappiyepi ca vatthusminti avatvāpi gaṇhituṃ kappiye mātupitusantakepi vatthusmiṃ. Lahuvattinoti theyyacittuppādena lahuparivattino. Āsīvisanti sīghameva sakalasarīre pharaṇasamatthavisaṃ.
អនុសាសនីកថាវណ្ណនា និដ្ឋិតា។
Anusāsanīkathāvaṇṇanā niṭṭhitā.
បារាជិកកណ្ឌដ្ឋកថាយ បឋមភាគវណ្ណនា សមត្តា។
Pārājikakaṇḍaṭṭhakathāya paṭhamabhāgavaṇṇanā samattā.
