| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៦. អនុរុទ្ធសុត្តំ
6. Anuruddhasuttaṃ
២២៦. ឯកំ សមយំ អាយស្មា អនុរុទ្ធោ កោសលេសុ វិហរតិ អញ្ញតរស្មិំ វនសណ្ឌេ។ អថ ខោ អញ្ញតរា តាវតិំសកាយិកា ទេវតា ជាលិនី នាម អាយស្មតោ អនុរុទ្ធស្ស បុរាណទុតិយិកា យេនាយស្មា អនុរុទ្ធោ តេនុបសង្កមិ; ឧបសង្កមិត្វា អាយស្មន្តំ អនុរុទ្ធំ គាថាយ អជ្ឈភាសិ –
226. Ekaṃ samayaṃ āyasmā anuruddho kosalesu viharati aññatarasmiṃ vanasaṇḍe. Atha kho aññatarā tāvatiṃsakāyikā devatā jālinī nāma āyasmato anuruddhassa purāṇadutiyikā yenāyasmā anuruddho tenupasaṅkami; upasaṅkamitvā āyasmantaṃ anuruddhaṃ gāthāya ajjhabhāsi –
‘‘តត្ថ ចិត្តំ បណិធេហិ, យត្ថ តេ វុសិតំ បុរេ;
‘‘Tattha cittaṃ paṇidhehi, yattha te vusitaṃ pure;
តាវតិំសេសុ ទេវេសុ, សព្ពកាមសមិទ្ធិសុ;
Tāvatiṃsesu devesu, sabbakāmasamiddhisu;
បុរក្ខតោ បរិវុតោ, ទេវកញ្ញាហិ សោភសី’’តិ។
Purakkhato parivuto, devakaññāhi sobhasī’’ti.
‘‘ទុគ្គតា ទេវកញ្ញាយោ, សក្កាយស្មិំ បតិដ្ឋិតា;
‘‘Duggatā devakaññāyo, sakkāyasmiṃ patiṭṭhitā;
តេ ចាបិ ទុគ្គតា សត្តា, ទេវកញ្ញាហិ បត្ថិតា’’តិ។
Te cāpi duggatā sattā, devakaññāhi patthitā’’ti.
‘‘ន តេ សុខំ បជានន្តិ, យេ ន បស្សន្តិ នន្ទនំ;
‘‘Na te sukhaṃ pajānanti, ye na passanti nandanaṃ;
អាវាសំ នរទេវានំ, តិទសានំ យសស្សិន’’ន្តិ។
Āvāsaṃ naradevānaṃ, tidasānaṃ yasassina’’nti.
‘‘ន ត្វំ ពាលេ វិជានាសិ, យថា អរហតំ វចោ;
‘‘Na tvaṃ bāle vijānāsi, yathā arahataṃ vaco;
អនិច្ចា សព្ពសង្ខារា, ឧប្បាទវយធម្មិនោ;
Aniccā sabbasaṅkhārā, uppādavayadhammino;
ឧប្បជ្ជិត្វា និរុជ្ឈន្តិ, តេសំ វូបសមោ សុខោ។
Uppajjitvā nirujjhanti, tesaṃ vūpasamo sukho.
‘‘នត្ថិ ទានិ បុនាវាសោ, ទេវកាយស្មិ ជាលិនិ;
‘‘Natthi dāni punāvāso, devakāyasmi jālini;
វិក្ខីណោ ជាតិសំសារោ, នត្ថិ ទានិ បុនព្ភវោ’’តិ។
Vikkhīṇo jātisaṃsāro, natthi dāni punabbhavo’’ti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. អនុរុទ្ធសុត្តវណ្ណនា • 6. Anuruddhasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៦. អនុរុទ្ធសុត្តវណ្ណនា • 6. Anuruddhasuttavaṇṇanā
