| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๖. อนุรุทฺธสุตฺตํ
6. Anuruddhasuttaṃ
๒๒๖. เอกํ สมยํ อายสฺมา อนุรุโทฺธ โกสเลสุ วิหรติ อญฺญตรสฺมิํ วนสเณฺฑฯ อถ โข อญฺญตรา ตาวติํสกายิกา เทวตา ชาลินี นาม อายสฺมโต อนุรุทฺธสฺส ปุราณทุติยิกา เยนายสฺมา อนุรุโทฺธ เตนุปสงฺกมิ; อุปสงฺกมิตฺวา อายสฺมนฺตํ อนุรุทฺธํ คาถาย อชฺฌภาสิ –
226. Ekaṃ samayaṃ āyasmā anuruddho kosalesu viharati aññatarasmiṃ vanasaṇḍe. Atha kho aññatarā tāvatiṃsakāyikā devatā jālinī nāma āyasmato anuruddhassa purāṇadutiyikā yenāyasmā anuruddho tenupasaṅkami; upasaṅkamitvā āyasmantaṃ anuruddhaṃ gāthāya ajjhabhāsi –
‘‘ตตฺถ จิตฺตํ ปณิเธหิ, ยตฺถ เต วุสิตํ ปุเร;
‘‘Tattha cittaṃ paṇidhehi, yattha te vusitaṃ pure;
ตาวติํเสสุ เทเวสุ, สพฺพกามสมิทฺธิสุ;
Tāvatiṃsesu devesu, sabbakāmasamiddhisu;
ปุรกฺขโต ปริวุโต, เทวกญฺญาหิ โสภสี’’ติฯ
Purakkhato parivuto, devakaññāhi sobhasī’’ti.
‘‘ทุคฺคตา เทวกญฺญาโย, สกฺกายสฺมิํ ปติฎฺฐิตา;
‘‘Duggatā devakaññāyo, sakkāyasmiṃ patiṭṭhitā;
เต จาปิ ทุคฺคตา สตฺตา, เทวกญฺญาหิ ปตฺถิตา’’ติฯ
Te cāpi duggatā sattā, devakaññāhi patthitā’’ti.
‘‘น เต สุขํ ปชานนฺติ, เย น ปสฺสนฺติ นนฺทนํ;
‘‘Na te sukhaṃ pajānanti, ye na passanti nandanaṃ;
อาวาสํ นรเทวานํ, ติทสานํ ยสสฺสิน’’นฺติฯ
Āvāsaṃ naradevānaṃ, tidasānaṃ yasassina’’nti.
‘‘น ตฺวํ พาเล วิชานาสิ, ยถา อรหตํ วโจ;
‘‘Na tvaṃ bāle vijānāsi, yathā arahataṃ vaco;
อนิจฺจา สพฺพสงฺขารา, อุปฺปาทวยธมฺมิโน;
Aniccā sabbasaṅkhārā, uppādavayadhammino;
อุปฺปชฺชิตฺวา นิรุชฺฌนฺติ, เตสํ วูปสโม สุโขฯ
Uppajjitvā nirujjhanti, tesaṃ vūpasamo sukho.
‘‘นตฺถิ ทานิ ปุนาวาโส, เทวกายสฺมิ ชาลินิ;
‘‘Natthi dāni punāvāso, devakāyasmi jālini;
วิกฺขีโณ ชาติสํสาโร, นตฺถิ ทานิ ปุนพฺภโว’’ติฯ
Vikkhīṇo jātisaṃsāro, natthi dāni punabbhavo’’ti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๖. อนุรุทฺธสุตฺตวณฺณนา • 6. Anuruddhasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๖. อนุรุทฺธสุตฺตวณฺณนา • 6. Anuruddhasuttavaṇṇanā
