| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. অনুরুদ্ধসুত্তং
6. Anuruddhasuttaṃ
২২৬. একং সমযং আযস্মা অনুরুদ্ধো কোসলেসু ৰিহরতি অঞ্ঞতরস্মিং ৰনসণ্ডে। অথ খো অঞ্ঞতরা তাৰতিংসকাযিকা দেৰতা জালিনী নাম আযস্মতো অনুরুদ্ধস্স পুরাণদুতিযিকা যেনাযস্মা অনুরুদ্ধো তেনুপসঙ্কমি; উপসঙ্কমিত্ৰা আযস্মন্তং অনুরুদ্ধং গাথায অজ্ঝভাসি –
226. Ekaṃ samayaṃ āyasmā anuruddho kosalesu viharati aññatarasmiṃ vanasaṇḍe. Atha kho aññatarā tāvatiṃsakāyikā devatā jālinī nāma āyasmato anuruddhassa purāṇadutiyikā yenāyasmā anuruddho tenupasaṅkami; upasaṅkamitvā āyasmantaṃ anuruddhaṃ gāthāya ajjhabhāsi –
‘‘তত্থ চিত্তং পণিধেহি, যত্থ তে ৰুসিতং পুরে।
‘‘Tattha cittaṃ paṇidhehi, yattha te vusitaṃ pure;
তাৰতিংসেসু দেৰেসু, সব্বকামসমিদ্ধিসু।
Tāvatiṃsesu devesu, sabbakāmasamiddhisu;
পুরক্খতো পরিৰুতো, দেৰকঞ্ঞাহি সোভসী’’তি॥
Purakkhato parivuto, devakaññāhi sobhasī’’ti.
‘‘দুগ্গতা দেৰকঞ্ঞাযো, সক্কাযস্মিং পতিট্ঠিতা।
‘‘Duggatā devakaññāyo, sakkāyasmiṃ patiṭṭhitā;
তে চাপি দুগ্গতা সত্তা, দেৰকঞ্ঞাহি পত্থিতা’’তি॥
Te cāpi duggatā sattā, devakaññāhi patthitā’’ti.
‘‘ন তে সুখং পজানন্তি, যে ন পস্সন্তি নন্দনং।
‘‘Na te sukhaṃ pajānanti, ye na passanti nandanaṃ;
আৰাসং নরদেৰানং, তিদসানং যসস্সিন’’ন্তি॥
Āvāsaṃ naradevānaṃ, tidasānaṃ yasassina’’nti.
‘‘ন ত্ৰং বালে ৰিজানাসি, যথা অরহতং ৰচো।
‘‘Na tvaṃ bāle vijānāsi, yathā arahataṃ vaco;
অনিচ্চা সব্বসঙ্খারা, উপ্পাদৰযধম্মিনো।
Aniccā sabbasaṅkhārā, uppādavayadhammino;
উপ্পজ্জিত্ৰা নিরুজ্ঝন্তি, তেসং ৰূপসমো সুখো॥
Uppajjitvā nirujjhanti, tesaṃ vūpasamo sukho.
‘‘নত্থি দানি পুনাৰাসো, দেৰকাযস্মি জালিনি।
‘‘Natthi dāni punāvāso, devakāyasmi jālini;
ৰিক্খীণো জাতিসংসারো, নত্থি দানি পুনব্ভৰো’’তি॥
Vikkhīṇo jātisaṃsāro, natthi dāni punabbhavo’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. অনুরুদ্ধসুত্তৰণ্ণনা • 6. Anuruddhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. অনুরুদ্ধসুত্তৰণ্ণনা • 6. Anuruddhasuttavaṇṇanā
