| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១១. អនុបុព្ពនិរោធសុត្តំ
11. Anupubbanirodhasuttaṃ
៣១. ‘‘នវយិមេ, ភិក្ខវេ, អនុបុព្ពនិរោធា។ កតមេ នវ? បឋមំ ឈានំ សមាបន្នស្ស កាមសញ្ញា 1 និរុទ្ធា ហោតិ; ទុតិយំ ឈានំ សមាបន្នស្ស វិតក្កវិចារា និរុទ្ធា ហោន្តិ; តតិយំ ឈានំ សមាបន្នស្ស បីតិ និរុទ្ធា ហោតិ; ចតុត្ថំ ឈានំ សមាបន្នស្ស អស្សាសបស្សាសា និរុទ្ធា ហោន្តិ; អាកាសានញ្ចាយតនំ សមាបន្នស្ស រូបសញ្ញា និរុទ្ធា ហោតិ; វិញ្ញាណញ្ចាយតនំ សមាបន្នស្ស អាកាសានញ្ចាយតនសញ្ញា និរុទ្ធា ហោតិ; អាកិញ្ចញ្ញាយតនំ សមាបន្នស្ស វិញ្ញាណញ្ចាយតនសញ្ញា និរុទ្ធា ហោតិ ; នេវសញ្ញានាសញ្ញាយតនំ សមាបន្នស្ស អាកិញ្ចញ្ញាយតនសញ្ញា និរុទ្ធា ហោតិ; សញ្ញាវេទយិតនិរោធំ សមាបន្នស្ស សញ្ញា ច វេទនា ច និរុទ្ធា ហោន្តិ។ ឥមេ ខោ, ភិក្ខវេ, នវ អនុបុព្ពនិរោធា’’តិ 2។ ឯកាទសមំ។
31. ‘‘Navayime, bhikkhave, anupubbanirodhā. Katame nava? Paṭhamaṃ jhānaṃ samāpannassa kāmasaññā 3 niruddhā hoti; dutiyaṃ jhānaṃ samāpannassa vitakkavicārā niruddhā honti; tatiyaṃ jhānaṃ samāpannassa pīti niruddhā hoti; catutthaṃ jhānaṃ samāpannassa assāsapassāsā niruddhā honti; ākāsānañcāyatanaṃ samāpannassa rūpasaññā niruddhā hoti; viññāṇañcāyatanaṃ samāpannassa ākāsānañcāyatanasaññā niruddhā hoti; ākiñcaññāyatanaṃ samāpannassa viññāṇañcāyatanasaññā niruddhā hoti ; nevasaññānāsaññāyatanaṃ samāpannassa ākiñcaññāyatanasaññā niruddhā hoti; saññāvedayitanirodhaṃ samāpannassa saññā ca vedanā ca niruddhā honti. Ime kho, bhikkhave, nava anupubbanirodhā’’ti 4. Ekādasamaṃ.
សត្តាវាសវគ្គោ តតិយោ។
Sattāvāsavaggo tatiyo.
តស្សុទ្ទានំ –
Tassuddānaṃ –
តិឋានំ ខឡុង្កោ តណ្ហា, សត្តបញ្ញា សិលាយុបោ;
Tiṭhānaṃ khaḷuṅko taṇhā, sattapaññā silāyupo;
ទ្វេ វេរា ទ្វេ អាឃាតានិ, អនុបុព្ពនិរោធេន ចាតិ។
Dve verā dve āghātāni, anupubbanirodhena cāti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០-១១. អាឃាតបដិវិនយសុត្តាទិវណ្ណនា • 10-11. Āghātapaṭivinayasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១១. អនុបុព្ពនិរោធសុត្តវណ្ណនា • 11. Anupubbanirodhasuttavaṇṇanā
