| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. အနုဂ္ဂဟိတသုတ္တဝဏ္ဏနာ
5. Anuggahitasuttavaṇṇanā
၂၅. ပဉ္စမေ သမ္မာဒိဋ္ဌီတိ ဝိပသ္သနာသမ္မာဒိဋ္ဌိ။ စေတောဝိမုတ္တိဖလာတိအာဒီသု စေတောဝိမုတ္တီတိ မဂ္ဂဖလသမာဓိ။ ပညာဝိမုတ္တီတိ ဖလဉာဏံ။ သီလာနုဂ္ဂဟိတာတိ သီလေန အနုဂ္ဂဟိတာ အနုရက္ခိတာ။ သုတာနုဂ္ဂဟိတာတိ ဗာဟုသစ္စေန အနုဂ္ဂဟိတာ။ သာကစ္ဆာနုဂ္ဂဟိတာတိ ဓမ္မသာကစ္ဆာယ အနုဂ္ဂဟိတာ။ သမထာနုဂ္ဂဟိတာတိ စိတ္တေကဂ္ဂတာယ အနုဂ္ဂဟိတာ။
25. Pañcame sammādiṭṭhīti vipassanāsammādiṭṭhi. Cetovimuttiphalātiādīsu cetovimuttīti maggaphalasamādhi. Paññāvimuttīti phalañāṇaṃ. Sīlānuggahitāti sīlena anuggahitā anurakkhitā. Sutānuggahitāti bāhusaccena anuggahitā. Sākacchānuggahitāti dhammasākacchāya anuggahitā. Samathānuggahitāti cittekaggatāya anuggahitā.
ဣမသ္သ ပနတ္ထသ္သ အာဝိဘာဝတ္ထံ မဓုရမ္ဗဗီဇံ ရောပေတ္ဝာ သမန္တာ မရိယာဒံ ဗန္ဓိတ္ဝာ ကာလာနုကာလံ ဥဒကံ အာသိဉ္စိတ္ဝာ ကာလာနုကာလံ မူလာနိ သောဓေတ္ဝာ ကာလာနုကာလံ ပတိတပာဏကေ ဟာရေတ္ဝာ ကာလာနုကာလံ မက္ကဋဇာလံ လုဉ္စိတ္ဝာ အမ္ဗံ ပဋိဇဂ္ဂန္တော ပုရိသော ဒသ္သေတဗ္ဗော။ တသ္သ ဟိ ပုရိသသ္သ မဓုရမ္ဗဗီဇရောပနံ ဝိယ ဝိပသ္သနာသမ္မာဒိဋ္ဌိ ဒဋ္ဌဗ္ဗာ, မရိယာဒဗန္ဓနံ ဝိယ သီလေန အနုဂ္ဂဏ္ဟနံ, ဥဒကာသေစနံ ဝိယ သုတေန အနုဂ္ဂဏ္ဟနံ, မူလပရိသောဓနံ ဝိယ သာကစ္ဆာယ အနုဂ္ဂဏ္ဟနံ, ပာဏကဟရဏံ ဝိယ ဈာနဝိပသ္သနာပာရိပန္ထိကသောဓနဝသေန သမထာနုဂ္ဂဏ္ဟနံ, မက္ကဋဇာလလုဉ္စနံ ဝိယ ဗလဝဝိပသ္သနာနုဂ္ဂဏ္ဟနံ, ဧဝံ အနုဂ္ဂဟိတသ္သ ရုက္ခသ္သ ခိပ္ပမေဝ ဝဍ္ဎိတ္ဝာ ဖလပ္ပဒာနံ ဝိယ ဣမေဟိ သီလာဒီဟိ အနုဂ္ဂဟိတာယ မူလသမ္မာဒိဋ္ဌိယာ ခိပ္ပမေဝ မဂ္ဂဝသေန ဝဍ္ဎိတ္ဝာ စေတောဝိမုတ္တိပညာဝိမုတ္တိဖလပ္ပဒာနံ ဝေဒိတဗ္ဗံ။
Imassa panatthassa āvibhāvatthaṃ madhurambabījaṃ ropetvā samantā mariyādaṃ bandhitvā kālānukālaṃ udakaṃ āsiñcitvā kālānukālaṃ mūlāni sodhetvā kālānukālaṃ patitapāṇake hāretvā kālānukālaṃ makkaṭajālaṃ luñcitvā ambaṃ paṭijagganto puriso dassetabbo. Tassa hi purisassa madhurambabījaropanaṃ viya vipassanāsammādiṭṭhi daṭṭhabbā, mariyādabandhanaṃ viya sīlena anuggaṇhanaṃ, udakāsecanaṃ viya sutena anuggaṇhanaṃ, mūlaparisodhanaṃ viya sākacchāya anuggaṇhanaṃ, pāṇakaharaṇaṃ viya jhānavipassanāpāripanthikasodhanavasena samathānuggaṇhanaṃ, makkaṭajālaluñcanaṃ viya balavavipassanānuggaṇhanaṃ, evaṃ anuggahitassa rukkhassa khippameva vaḍḍhitvā phalappadānaṃ viya imehi sīlādīhi anuggahitāya mūlasammādiṭṭhiyā khippameva maggavasena vaḍḍhitvā cetovimuttipaññāvimuttiphalappadānaṃ veditabbaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. အနုဂ္ဂဟိတသုတ္တံ • 5. Anuggahitasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅. အနုဂ္ဂဟိတသုတ္တဝဏ္ဏနာ • 5. Anuggahitasuttavaṇṇanā
