| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
১৪. অন্তেৰাসিকৰত্তকথা
14. Antevāsikavattakathā
৩৮১. তেন খো পন সমযেন আচরিযা অন্তেৰাসিকেসু ন সম্মা ৰত্তন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আচরিযা অন্তেৰাসিকেসু ন সম্মা ৰত্তিস্সন্তী’’তি! অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, আচরিযা অন্তেৰাসিকেসু ন সম্মা ৰত্তন্তী’’তি? ‘‘সচ্চং ভগৰা’’তি…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি –
381. Tena kho pana samayena ācariyā antevāsikesu na sammā vattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma ācariyā antevāsikesu na sammā vattissantī’’ti! Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, ācariyā antevāsikesu na sammā vattantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
৩৮২. ‘‘তেন হি, ভিক্খৰে, আচরিযানং অন্তেৰাসিকেসু ৰত্তং পঞ্ঞপেস্সামি যথা আচরিযেহি অন্তেৰাসিকেসু সম্মা ৰত্তিতব্বং। 1 আচরিযেন, ভিক্খৰে, অন্তেৰাসিকম্হি সম্মা ৰত্তিতব্বং। তত্রাযং সম্মাৰত্তনা –
382. ‘‘Tena hi, bhikkhave, ācariyānaṃ antevāsikesu vattaṃ paññapessāmi yathā ācariyehi antevāsikesu sammā vattitabbaṃ. 2 Ācariyena, bhikkhave, antevāsikamhi sammā vattitabbaṃ. Tatrāyaṃ sammāvattanā –
‘‘আচরিযেন, ভিক্খৰে, অন্তেৰাসিকো সঙ্গহেতব্বো অনুগ্গহেতব্বো উদ্দেসেন পরিপুচ্ছায ওৰাদেন অনুসাসনিযা। সচে আচরিযস্স পত্তো হোতি, অন্তেৰাসিকস্স পত্তো ন হোতি, আচরিযেন অন্তেৰাসিকস্স পত্তো দাতব্বো, উস্সুক্কং ৰা কাতব্বং – কিন্তি নু খো অন্তেৰাসিকস্স পত্তো উপ্পজ্জিযেথাতি। সচে আচরিযস্স চীৰরং হোতি, অন্তেৰাসিকস্স চীৰরং ন হোতি, আচরিযেন অন্তেৰাসিকস্স চীৰরং দাতব্বং, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং উপ্পজ্জিযেথাতি। সচে আচরিযস্স পরিক্খারো হোতি, অন্তেৰাসিকস্স পরিক্খারো ন হোতি, আচরিযেন অন্তেৰাসিকস্স পরিক্খারো দাতব্বো, উস্সুক্কং ৰা কাতব্বং – কিন্তি নু খো অন্তেৰাসিকস্স পরিক্খারো উপ্পজ্জিযেথাতি।
‘‘Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā. Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṃ vā kātabbaṃ – kinti nu kho antevāsikassa patto uppajjiyethāti. Sace ācariyassa cīvaraṃ hoti, antevāsikassa cīvaraṃ na hoti, ācariyena antevāsikassa cīvaraṃ dātabbaṃ, ussukkaṃ vā kātabbaṃ – kinti nu kho antevāsikassa cīvaraṃ uppajjiyethāti. Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṃ vā kātabbaṃ – kinti nu kho antevāsikassa parikkhāro uppajjiyethāti.
‘‘সচে অন্তেৰাসিকো গিলানো হোতি, কালস্সেৰ উট্ঠায দন্তকট্ঠং দাতব্বং, মুখোদকং দাতব্বং, আসনং পঞ্ঞপেতব্বং। সচে যাগু হোতি , ভাজনং ধোৰিত্ৰা যাগু উপনামেতব্বা। যাগুং পীতস্স উদকং দত্ৰা ভাজনং পটিগ্গহেত্ৰা নীচং কত্ৰা সাধুকং অপ্পটিঘংসন্তেন ধোৰিত্ৰা পটিসামেতব্বং । অন্তেৰাসিকম্হি ৰুট্ঠিতে আসনং উদ্ধরিতব্বং। সচে সো দেসো উক্লাপো হোতি, সো দেসো সম্মজ্জিতব্বো।
‘‘Sace antevāsiko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti , bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ . Antevāsikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘সচে অন্তেৰাসিকো গামং পৰিসিতুকামো হোতি, নিৰাসনং দাতব্বং, পটিনিৰাসনং পটিগ্গহেতব্বং, কাযবন্ধনং দাতব্বং, সগুণং কত্ৰা সঙ্ঘাটিযো দাতব্বা, ধোৰিত্ৰা পত্তো সোদকো দাতব্বো।
‘‘Sace antevāsiko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo.
‘‘এত্তাৰতা নিৰত্তিস্সতীতি আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৰা পত্তচীৰরং পটিগ্গহেতব্বং, পটিনিৰাসনং দাতব্বং, নিৰাসনং পটিগ্গহেতব্বং। সচে চীৰরং সিন্নং হোতি, মুহুত্তং উণ্হে ওতাপেতব্বং, ন চ উণ্হে চীৰরং নিদহিতব্বং। চীৰরং সঙ্ঘরিতব্বং। চীৰরং সঙ্ঘরন্তেন চতুরঙ্গুলং কণ্ণং উস্সারেত্ৰা চীৰরং সঙ্ঘরিতব্বং – মা মজ্ঝে ভঙ্গো অহোসীতি। ওভোগে কাযবন্ধনং কাতব্বং।
‘‘Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘সচে পিণ্ডপাতো হোতি, অন্তেৰাসিকো চ ভুঞ্জিতুকামো হোতি, উদকং দত্ৰা পিণ্ডপাতো উপনামেতব্বো। অন্তেৰাসিকো পানীযেন পুচ্ছিতব্বো। ভুত্তাৰিস্স উদকং দত্ৰা পত্তং পটিগ্গহেত্ৰা নীচং কত্ৰা সাধুকং অপ্পটিঘংসন্তেন ধোৰিত্ৰা ৰোদকং কত্ৰা মুহুত্তং উণ্হে ওতাপেতব্বো, ন চ উণ্হে পত্তো নিদহিতব্বো। পত্তচীৰরং নিক্খিপিতব্বং। পত্তং নিক্খিপন্তেন…পে॰… চীৰরং নিক্খিপন্তেন…পে॰… পারতো অন্তং ওরতো ভোগং কত্ৰা চীৰরং নিক্খিপিতব্বং। অন্তেৰাসিকম্হি উট্ঠিতে আসনং উদ্ধরিতব্বং, পাদোদকং পাদপীঠং পাদকথলিকং পটিসামেতব্বং। সচে সো দেসো উক্লাপো হোতি, সো দেসো সম্মজ্জিতব্বো।
‘‘Sace piṇḍapāto hoti, antevāsiko ca bhuñjitukāmo hoti, udakaṃ datvā piṇḍapāto upanāmetabbo. Antevāsiko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena…pe… cīvaraṃ nikkhipantena…pe… pārato antaṃ orato bhogaṃ katvā cīvaraṃ nikkhipitabbaṃ. Antevāsikamhi uṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
‘‘সচে অন্তেৰাসিকো নহাযিতুকামো হোতি, নহানং পটিযাদেতব্বং। সচে সীতেন অত্থো হোতি, সীতং পটিযাদেতব্বং। সচে উণ্হেন অত্থো হোতি, উণ্হং পটিযাদেতব্বং।
‘‘Sace antevāsiko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘সচে অন্তেৰাসিকো জন্তাঘরং পৰিসিতুকামো হোতি, চুণ্ণং সন্নেতব্বং, মত্তিকা তেমেতব্বা, জন্তাঘরপীঠং আদায 3 গন্ত্ৰা জন্তাঘরপীঠং দত্ৰা চীৰরং পটিগ্গহেত্ৰা একমন্তং নিক্খিপিতব্বং, চুণ্ণং দাতব্বং, মত্তিকা দাতব্বা। সচে উস্সহতি জন্তাঘরং পৰিসিতব্বং। জন্তাঘরং পৰিসন্তেন মত্তিকায মুখং মক্খেত্ৰা পুরতো চ পচ্ছতো চ পটিচ্ছাদেত্ৰা জন্তাঘরং পৰিসিতব্বং। ন থেরে ভিক্খূ অনুপখজ্জ নিসীদিতব্বং। ন নৰা ভিক্খূ আসনেন পটিবাহিতব্বা । জন্তাঘরে অন্তেৰাসিকস্স পরিকম্মং কাতব্বং। জন্তাঘরা নিক্খমন্তেন জন্তাঘরপীঠং আদায পুরতো চ পচ্ছতো চ পটিচ্ছাদেত্ৰা জন্তাঘরা নিক্খমিতব্বং।
‘‘Sace antevāsiko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya 4 gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā . Jantāghare antevāsikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘উদকেপি অন্তেৰাসিকস্স পরিকম্মং কাতব্বং। নহাতেন পঠমতরং উত্তরিত্ৰা অত্তনো গত্তং ৰোদকং কত্ৰা নিৰাসেত্ৰা অন্তেৰাসিকস্স গত্ততো উদকং পমজ্জিতব্বং, নিৰাসনং দাতব্বং, সঙ্ঘাটি দাতব্বা, জন্তাঘরপীঠং আদায পঠমতরং আগন্ত্ৰা আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, অন্তেৰাসিকো পানীযেন পুচ্ছিতব্বো।
‘‘Udakepi antevāsikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā antevāsikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, antevāsiko pānīyena pucchitabbo.
‘‘যস্মিং ৰিহারে অন্তেৰাসিকো ৰিহরতি, সচে সো ৰিহারো উক্লাপো হোতি, সচে উস্সহতি, সোধেতব্বো। ৰিহারং সোধেন্তেন পঠমং পত্তচীৰরং নীহরিত্ৰা একমন্তং নিক্খিপিতব্বং…পে॰… আচমনকুম্ভিযা উদকং ন হোতি, আচমনকুম্ভিযা উদকং আসিঞ্চিতব্বং।
‘‘Yasmiṃ vihāre antevāsiko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe… ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘সচে অন্তেৰাসিকস্স অনভিরতি উপ্পন্না হোতি, আচরিযেন ৰূপকাসেতব্বো, ৰূপকাসাপেতব্বো, ধম্মকথা ৰাস্স কাতব্বা। সচে অন্তেৰাসিকস্স কুক্কুচ্চং উপ্পন্নং হোতি, আচরিযেন ৰিনোদেতব্বং, ৰিনোদাপেতব্বং, ধম্মকথা ৰাস্স কাতব্বা। সচে অন্তেৰাসিকস্স দিট্ঠিগতং উপ্পন্নং হোতি, আচরিযেন ৰিৰেচেতব্বং, ৰিৰেচাপেতব্বং, ধম্মকথা ৰাস্স কাতব্বা। সচে অন্তেৰাসিকো গরুধম্মং অজ্ঝাপন্নো হোতি, পরিৰাসারহো, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকস্স পরিৰাসং দদেয্যাতি। সচে অন্তেৰাসিকো মূলাযপটিকস্সনারহো হোতি, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকং মূলায পটিকস্সেয্যাতি। সচে অন্তেৰাসিকো মানত্তারহো হোতি, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকস্স মানত্তং দদেয্যাতি। সচে অন্তেৰাসিকো অব্ভানারহো হোতি, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকং অব্ভেয্যাতি। সচে সঙ্ঘো অন্তেৰাসিকস্স কম্মং কত্তুকামো হোতি, তজ্জনীযং ৰা নিযস্সং ৰা পব্বাজনীযং ৰা পটিসারণীযং ৰা উক্খেপনীযং ৰা, আচরিযেন উস্সুক্কং কাতব্বং – কিন্তি নু খো সঙ্ঘো অন্তেৰাসিকস্স কম্মং ন করেয্য , লহুকায ৰা পরিণামেয্যাতি। কতং ৰা পনস্স হোতি, সঙ্ঘেন কম্মং, তজ্জনীযং ৰা নিযস্সং ৰা পব্বাজনীযং ৰা পটিসারণীযং ৰা উক্খেপনীযং ৰা, আচরিযেন উস্সুক্কং কাতব্বং – কিন্তি নু খো অন্তেৰাসিকো সম্মা ৰত্তেয্য, লোমং পাতেয্য, নেত্থারং ৰত্তেয্য, সঙ্ঘো তং কম্মং পটিপ্পস্সম্ভেয্যাতি।
‘‘Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā. Sace antevāsikassa kukkuccaṃ uppannaṃ hoti, ācariyena vinodetabbaṃ, vinodāpetabbaṃ, dhammakathā vāssa kātabbā. Sace antevāsikassa diṭṭhigataṃ uppannaṃ hoti, ācariyena vivecetabbaṃ, vivecāpetabbaṃ, dhammakathā vāssa kātabbā. Sace antevāsiko garudhammaṃ ajjhāpanno hoti, parivāsāraho, ācariyena ussukkaṃ kātabbaṃ – kinti nu kho saṅgho antevāsikassa parivāsaṃ dadeyyāti. Sace antevāsiko mūlāyapaṭikassanāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ mūlāya paṭikasseyyāti. Sace antevāsiko mānattāraho hoti, ācariyena ussukkaṃ kātabbaṃ – kinti nu kho saṅgho antevāsikassa mānattaṃ dadeyyāti. Sace antevāsiko abbhānāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ abbheyyāti. Sace saṅgho antevāsikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho saṅgho antevāsikassa kammaṃ na kareyya , lahukāya vā pariṇāmeyyāti. Kataṃ vā panassa hoti, saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho antevāsiko sammā vatteyya, lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘সচে অন্তেৰাসিকস্স চীৰরং ধোৰিতব্বং হোতি, আচরিযেন আচিক্খিতব্বং – এৰং ধোৰেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং ধোৰিযেথাতি। সচে অন্তেৰাসিকস্স চীৰরং কাতব্বং হোতি, আচরিযেন আচিক্খিতব্বং – এৰং করেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং করিযেথাতি। সচে অন্তেৰাসিকস্স রজনং পচিতব্বং হোতি, আচরিযেন আচিক্খিতব্বং – এৰং পচেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স রজনং পচিযেথাতি। সচে অন্তেৰাসিকস্স চীৰরং রজিতব্বং হোতি, আচরিযেন আচিক্খিতব্বং – এৰং রজেয্যাসীতি, উস্সুক্কং ৰা কাতব্বং – কিন্তি নু খো অন্তেৰাসিকস্স চীৰরং রজিযেথাতি। চীৰরং রজন্তেন সাধুকং সম্পরিৰত্তকং সম্পরিৰত্তকং রজিতব্বং। ন চ অচ্ছিন্নে থেৰে পক্কমিতব্বং। সচে অন্তেৰাসিকো গিলানো হোতি, যাৰজীৰং উপট্ঠাতব্বো, ৰুট্ঠানমস্স আগমেতব্বং। ইদং খো, ভিক্খৰে, আচরিযানং অন্তেৰাসিকেসু ৰত্তং যথা আচরিযেহি অন্তেৰাসিকেসু সম্মা ৰত্তিতব্ব’’ন্তি।
‘‘Sace antevāsikassa cīvaraṃ dhovitabbaṃ hoti, ācariyena ācikkhitabbaṃ – evaṃ dhoveyyāsīti, ussukkaṃ vā kātabbaṃ – kinti nu kho antevāsikassa cīvaraṃ dhoviyethāti. Sace antevāsikassa cīvaraṃ kātabbaṃ hoti, ācariyena ācikkhitabbaṃ – evaṃ kareyyāsīti, ussukkaṃ vā kātabbaṃ – kinti nu kho antevāsikassa cīvaraṃ kariyethāti. Sace antevāsikassa rajanaṃ pacitabbaṃ hoti, ācariyena ācikkhitabbaṃ – evaṃ paceyyāsīti, ussukkaṃ vā kātabbaṃ – kinti nu kho antevāsikassa rajanaṃ paciyethāti. Sace antevāsikassa cīvaraṃ rajitabbaṃ hoti, ācariyena ācikkhitabbaṃ – evaṃ rajeyyāsīti, ussukkaṃ vā kātabbaṃ – kinti nu kho antevāsikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ. Na ca acchinne theve pakkamitabbaṃ. Sace antevāsiko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave, ācariyānaṃ antevāsikesu vattaṃ yathā ācariyehi antevāsikesu sammā vattitabba’’nti.
ৰত্তক্খন্ধকো অট্ঠমো।
Vattakkhandhako aṭṭhamo.
ইমম্হি খন্ধকে ৰত্থূ একূনৰীসতি, ৰত্তা চুদ্দস।
Imamhi khandhake vatthū ekūnavīsati, vattā cuddasa.
তস্সুদ্দানং –
Tassuddānaṃ –
সউপাহনা ছত্তা চ, ওগুণ্ঠি সীসং পানীযং।
Saupāhanā chattā ca, oguṇṭhi sīsaṃ pānīyaṃ;
নাভিৰাদে ন পুচ্ছন্তি, অহি উজ্ঝন্তি পেসলা॥
Nābhivāde na pucchanti, ahi ujjhanti pesalā.
ওমুঞ্চি ছত্তং খন্ধে চ, অতরঞ্চ পটিক্কমং।
Omuñci chattaṃ khandhe ca, atarañca paṭikkamaṃ;
পত্তচীৰরং নিক্খিপা, পতিরূপঞ্চ পুচ্ছিতা॥
Pattacīvaraṃ nikkhipā, patirūpañca pucchitā.
আসিঞ্চেয্য ধোৰিতেন, সুক্খেনল্লেনুপাহনা।
Āsiñceyya dhovitena, sukkhenallenupāhanā;
ৰুড্ঢো নৰকো পুচ্ছেয্য, অজ্ঝাৰুট্ঠঞ্চ গোচরা॥
Vuḍḍho navako puccheyya, ajjhāvuṭṭhañca gocarā.
সেক্খা ৰচ্চা পানী পরি, কত্তরং কতিকং ততো।
Sekkhā vaccā pānī pari, kattaraṃ katikaṃ tato;
কালং মুহুত্তং উক্লাপো, ভূমত্থরণং নীহরে॥
Kālaṃ muhuttaṃ uklāpo, bhūmattharaṇaṃ nīhare.
পটিপাদো ভিসিবিব্বো, মঞ্চপীঠঞ্চ মল্লকং।
Paṭipādo bhisibibbo, mañcapīṭhañca mallakaṃ;
অপস্সেনুল্লোককণ্ণা, গেরুকা কাল় অকতা॥
Apassenullokakaṇṇā, gerukā kāḷa akatā.
সঙ্কারঞ্চ ভূমত্থরণং, পটিপাদকং মঞ্চপীঠং।
Saṅkārañca bhūmattharaṇaṃ, paṭipādakaṃ mañcapīṭhaṃ;
ভিসি নিসীদনম্পি, মল্লকং অপস্সেন চ॥
Bhisi nisīdanampi, mallakaṃ apassena ca.
পত্তচীৰরং ভূমি চ, পারন্তং ওরতো ভোগং।
Pattacīvaraṃ bhūmi ca, pārantaṃ orato bhogaṃ;
পুরত্থিমা পচ্ছিমা চ, উত্তরা অথ দক্খিণা॥
Puratthimā pacchimā ca, uttarā atha dakkhiṇā.
সীতুণ্হে চ দিৰারত্তিং, পরিৰেণঞ্চ কোট্ঠকো।
Sītuṇhe ca divārattiṃ, pariveṇañca koṭṭhako;
উপট্ঠানগ্গি সালা চ, ৰত্তং ৰচ্চকুটীসু চ॥
Upaṭṭhānaggi sālā ca, vattaṃ vaccakuṭīsu ca.
পানী পরিভোজনিযা, কুম্ভি আচমনেসু চ।
Pānī paribhojaniyā, kumbhi ācamanesu ca;
নেৰাসনং ন উদকং, ন পচ্চু ন চ পানিযং।
Nevāsanaṃ na udakaṃ, na paccu na ca pāniyaṃ;
নাভিৰাদে নপঞ্ঞপে, উজ্ঝাযন্তি চ পেসলা॥
Nābhivāde napaññape, ujjhāyanti ca pesalā.
ৰুড্ঢাসনঞ্চ উদকং, পচ্চুগ্গন্ত্ৰা চ পানিযং।
Vuḍḍhāsanañca udakaṃ, paccuggantvā ca pāniyaṃ;
উপাহনে একমন্তং, অভিৰাদে চ পঞ্ঞপে॥
Upāhane ekamantaṃ, abhivāde ca paññape.
ৰুত্থং গোচরসেক্খো চ, ঠানং পানিযভোজনং।
Vutthaṃ gocarasekkho ca, ṭhānaṃ pāniyabhojanaṃ;
কত্তরং কতিকং কালং, নৰকস্স নিসিন্নকে॥
Kattaraṃ katikaṃ kālaṃ, navakassa nisinnake.
অভিৰাদযে আচিক্খে, যথা হেট্ঠা তথা নযে।
Abhivādaye ācikkhe, yathā heṭṭhā tathā naye;
নিদ্দিট্ঠং সত্থৰাহেন ৰত্তং আৰাসিকেহিমে॥
Niddiṭṭhaṃ satthavāhena vattaṃ āvāsikehime.
গমিকা দারুমত্তি চ, ৰিৰরিত্ৰা ন পুচ্ছিয।
Gamikā dārumatti ca, vivaritvā na pucchiya;
নস্সন্তি চ অগুত্তঞ্চ, উজ্ঝাযন্তি চ পেসলা॥
Nassanti ca aguttañca, ujjhāyanti ca pesalā.
পটিসামেত্ৰা থকেত্ৰা, আপুচ্ছিত্ৰাৰ পক্কমে।
Paṭisāmetvā thaketvā, āpucchitvāva pakkame;
ভিক্খু ৰা সামণেরো ৰা, আরামিকো উপাসকো॥
Bhikkhu vā sāmaṇero vā, ārāmiko upāsako.
পাসাণকেসু চ পুঞ্জং, পটিসামে থকেয্য চ।
Pāsāṇakesu ca puñjaṃ, paṭisāme thakeyya ca;
সচে উস্সহতি উস্সুক্কং, অনোৰস্সে তথেৰ চ॥
Sace ussahati ussukkaṃ, anovasse tatheva ca.
সব্বো ওৰস্সতি গামং, অজ্ঝোকাসে তথেৰ চ।
Sabbo ovassati gāmaṃ, ajjhokāse tatheva ca;
অপ্পেৰঙ্গানি সেসেয্যুং, ৰত্তং গমিকভিক্খুনা॥
Appevaṅgāni seseyyuṃ, vattaṃ gamikabhikkhunā.
নানুমোদন্তি থেরেন, ওহায চতুপঞ্চহি।
Nānumodanti therena, ohāya catupañcahi;
ৰচ্চিতো মুচ্ছিতো আসি, ৰত্তানুমোদনেসুমে॥
Vaccito mucchito āsi, vattānumodanesume.
ছব্বগ্গিযা দুন্নিৰত্থা, অথোপি চ দুপ্পারুতা।
Chabbaggiyā dunnivatthā, athopi ca duppārutā;
অনাকপ্পা চ ৰোক্কম্ম, থেরে অনুপখজ্জনে॥
Anākappā ca vokkamma, there anupakhajjane.
নৰে ভিক্খূ চ সঙ্ঘাটি, উজ্ঝাযন্তি চ পেসলা।
Nave bhikkhū ca saṅghāṭi, ujjhāyanti ca pesalā;
তিমণ্ডলং নিৰাসেত্ৰা, কাযসগুণগণ্ঠিকা॥
Timaṇḍalaṃ nivāsetvā, kāyasaguṇagaṇṭhikā.
ন ৰোক্কম্ম পটিচ্ছন্নং, সুসংৰুতোক্খিত্তচক্খু।
Na vokkamma paṭicchannaṃ, susaṃvutokkhittacakkhu;
উক্খিত্তোজ্জগ্ঘিকাসদ্দো, তযো চেৰ পচালনা॥
Ukkhittojjagghikāsaddo, tayo ceva pacālanā.
খম্ভোগুণ্ঠিউক্কুটিকা, পটিচ্ছন্নং সুসংৰুতো।
Khambhoguṇṭhiukkuṭikā, paṭicchannaṃ susaṃvuto;
ওক্খিত্তুক্খিত্তউজ্জগ্ঘি, অপ্পসদ্দো তযো চলা॥
Okkhittukkhittaujjagghi, appasaddo tayo calā.
খম্ভোগুণ্ঠিপল্লত্থি চ, অনুপখজ্জ নাসনে।
Khambhoguṇṭhipallatthi ca, anupakhajja nāsane;
ওত্থরিত্ৰান উদকে, নীচং কত্ৰান সিঞ্চিযা॥
Ottharitvāna udake, nīcaṃ katvāna siñciyā.
পটি সামন্তা সঙ্ঘাটি, ওদনে চ পটিগ্গহে।
Paṭi sāmantā saṅghāṭi, odane ca paṭiggahe;
সূপং উত্তরিভঙ্গেন, সব্বেসং সমতিত্থি চ॥
Sūpaṃ uttaribhaṅgena, sabbesaṃ samatitthi ca.
সক্কচ্চং পত্তসঞ্ঞী চ, সপদানঞ্চ সূপকং।
Sakkaccaṃ pattasaññī ca, sapadānañca sūpakaṃ;
ন থূপতো পটিচ্ছাদে, ৰিঞ্ঞত্তুজ্ঝানসঞ্ঞিনা॥
Na thūpato paṭicchāde, viññattujjhānasaññinā.
মহন্তমণ্ডলদ্ৰারং, সব্বহত্থো ন ব্যাহরে।
Mahantamaṇḍaladvāraṃ, sabbahattho na byāhare;
উক্খেপো ছেদনাগণ্ড, ধুনং সিত্থাৰকারকং॥
Ukkhepo chedanāgaṇḍa, dhunaṃ sitthāvakārakaṃ.
জিৰ্হানিচ্ছারকঞ্চেৰ, চপুচপু সুরুসুরু।
Jivhānicchārakañceva, capucapu surusuru;
হত্থপত্তোট্ঠনিল্লেহং, সামিসেন পটিগ্গহে॥
Hatthapattoṭṭhanillehaṃ, sāmisena paṭiggahe.
যাৰ ন সব্বে উদকে, নীচং কত্ৰান সিঞ্চিযং।
Yāva na sabbe udake, nīcaṃ katvāna siñciyaṃ;
পটি সামন্তা সঙ্ঘাটি, নীচং কত্ৰা ছমায চ॥
Paṭi sāmantā saṅghāṭi, nīcaṃ katvā chamāya ca.
সসিত্থকং নিৰত্তন্তে, সুপ্পটিচ্ছন্নমুক্কুটি।
Sasitthakaṃ nivattante, suppaṭicchannamukkuṭi;
ধম্মরাজেন পঞ্ঞত্তং, ইদং ভত্তগ্গৰত্তনং॥
Dhammarājena paññattaṃ, idaṃ bhattaggavattanaṃ.
দুন্নিৰত্থা অনাকপ্পা, অসল্লেক্খেত্ৰা চ সহসা।
Dunnivatthā anākappā, asallekkhetvā ca sahasā;
দূরে অচ্চ চিরং লহুং, তথেৰ পিণ্ডচারিকো॥
Dūre acca ciraṃ lahuṃ, tatheva piṇḍacāriko.
পটিচ্ছন্নোৰ গচ্ছেয্য, সুংসৰুতোক্খিত্তচক্খু।
Paṭicchannova gaccheyya, suṃsavutokkhittacakkhu;
উক্খিত্তোজ্জগ্ঘিকাসদ্দো, তযো চেৰ পচালনা॥
Ukkhittojjagghikāsaddo, tayo ceva pacālanā.
খম্ভোগুণ্ঠিউক্কুটিকা, সল্লক্খেত্ৰা চ সহসা।
Khambhoguṇṭhiukkuṭikā, sallakkhetvā ca sahasā;
দূরে অচ্চ চিরং লহুং, আসনকং কটচ্ছুকা॥
Dūre acca ciraṃ lahuṃ, āsanakaṃ kaṭacchukā.
ভাজনং ৰা ঠপেতি চ, উচ্চারেত্ৰা পণামেত্ৰা।
Bhājanaṃ vā ṭhapeti ca, uccāretvā paṇāmetvā;
পটিগ্গহে ন উল্লোকে, সূপেসুপি তথেৰ তং॥
Paṭiggahe na ulloke, sūpesupi tatheva taṃ.
ভিক্খু সঙ্ঘাটিযা ছাদে, পটিচ্ছন্নেৰ গচ্ছিযং।
Bhikkhu saṅghāṭiyā chāde, paṭicchanneva gacchiyaṃ;
সংৰুতোক্খিত্তচক্খু চ, উক্খিত্তোজ্জগ্ঘিকায চ।
Saṃvutokkhittacakkhu ca, ukkhittojjagghikāya ca;
অপ্পসদ্দো তযো চালা, খম্ভোগুণ্ঠিকউক্কুটি॥
Appasaddo tayo cālā, khambhoguṇṭhikaukkuṭi.
পঠমাসনৰক্কার , পানিযং পরিভোজনী।
Paṭhamāsanavakkāra , pāniyaṃ paribhojanī;
পচ্ছাকঙ্খতি ভুঞ্জেয্য, ওপিলাপেয্য উদ্ধরে॥
Pacchākaṅkhati bhuñjeyya, opilāpeyya uddhare.
পটিসামেয্য সম্মজ্জে, রিত্তং তুচ্ছং উপট্ঠপে।
Paṭisāmeyya sammajje, rittaṃ tucchaṃ upaṭṭhape;
হত্থৰিকারে ভিন্দেয্য, ৰত্তিদং পিণ্ডচারিকে॥
Hatthavikāre bhindeyya, vattidaṃ piṇḍacārike.
পানী পরি অগ্গিরণি, নক্খত্তদিসচোরা চ।
Pānī pari aggiraṇi, nakkhattadisacorā ca;
সব্বং নত্থীতি কোট্টেত্ৰা, পত্তংসে চীৰরং ততো॥
Sabbaṃ natthīti koṭṭetvā, pattaṃse cīvaraṃ tato.
ইদানি অংসে লগ্গেত্ৰা, তিমণ্ডলং পরিমণ্ডলং।
Idāni aṃse laggetvā, timaṇḍalaṃ parimaṇḍalaṃ;
যথা পিণ্ডচারিৰত্তং, নযে আরঞ্ঞকেসুপি॥
Yathā piṇḍacārivattaṃ, naye āraññakesupi.
পত্তংসে চীৰরং সীসে, আরোহিত্ৰা চ পানিযং।
Pattaṃse cīvaraṃ sīse, ārohitvā ca pāniyaṃ;
পরিভোজনিযং অগ্গি, অরণী চাপি কত্তরং॥
Paribhojaniyaṃ aggi, araṇī cāpi kattaraṃ.
নক্খত্তং সপ্পদেসং ৰা, দিসাপি কুসলো ভৰে।
Nakkhattaṃ sappadesaṃ vā, disāpi kusalo bhave;
সত্তুত্তমেন পঞ্ঞত্তং, ৰত্তং আরঞ্ঞকেসুমে॥
Sattuttamena paññattaṃ, vattaṃ āraññakesume.
অজ্ঝোকাসে ওকিরিংসু, উজ্ঝাযন্তি চ পেসলা।
Ajjhokāse okiriṃsu, ujjhāyanti ca pesalā;
সচে ৰিহারো উক্লাপো, পঠমং পত্তচীৰরং॥
Sace vihāro uklāpo, paṭhamaṃ pattacīvaraṃ.
ভিসিবিব্বোহনং মঞ্চং, পীঠঞ্চ খেল়মল্লকং।
Bhisibibbohanaṃ mañcaṃ, pīṭhañca kheḷamallakaṃ;
অপস্সেনুল্লোককণ্ণা, গেরুকা কাল় অকতা॥
Apassenullokakaṇṇā, gerukā kāḷa akatā.
সঙ্কারং ভিক্খুসামন্তা, সেনাৰিহারপানিযং।
Saṅkāraṃ bhikkhusāmantā, senāvihārapāniyaṃ;
পরিভোজনসামন্তা, পটিৰাতে চ অঙ্গণে॥
Paribhojanasāmantā, paṭivāte ca aṅgaṇe.
অধোৰাতে অত্থরণং, পটিপাদকমঞ্চো চ।
Adhovāte attharaṇaṃ, paṭipādakamañco ca;
পীঠং ভিসি নিসীদনং, মল্লকং অপস্সেন চ॥
Pīṭhaṃ bhisi nisīdanaṃ, mallakaṃ apassena ca.
পত্তচীৰরং ভূমি চ, পারন্তং ওরতো ভোগং।
Pattacīvaraṃ bhūmi ca, pārantaṃ orato bhogaṃ;
পুরত্থিমা চ পচ্ছিমা, উত্তরা অথ দক্খিণা॥
Puratthimā ca pacchimā, uttarā atha dakkhiṇā.
সীতুণ্হে চ দিৰা রত্তিং, পরিৰেণঞ্চ কোট্ঠকো।
Sītuṇhe ca divā rattiṃ, pariveṇañca koṭṭhako;
উপট্ঠানগ্গিসালা চ, ৰচ্চকুটী চ পানিযং॥
Upaṭṭhānaggisālā ca, vaccakuṭī ca pāniyaṃ.
আচমনকুম্ভি ৰুড্ঢে চ, উদ্দেসপুচ্ছনা সজ্ঝা।
Ācamanakumbhi vuḍḍhe ca, uddesapucchanā sajjhā;
ধম্মো পদীপং ৰিজ্ঝাপে, ন ৰিৰরে নপি থকে॥
Dhammo padīpaṃ vijjhāpe, na vivare napi thake.
যেন ৰুড্ঢো পরিৰত্তি, কণ্ণেনপি ন ঘট্টযে।
Yena vuḍḍho parivatti, kaṇṇenapi na ghaṭṭaye;
পঞ্ঞপেসি মহাৰীরো, ৰত্তং সেনাসনেসু তং॥
Paññapesi mahāvīro, vattaṃ senāsanesu taṃ.
নিৰারিযমানা দ্ৰারং, মুচ্ছিতুজ্ঝন্তি পেসলা।
Nivāriyamānā dvāraṃ, mucchitujjhanti pesalā;
ছারিকং ছড্ডযে জন্তা, পরিভণ্ডং তথেৰ চ॥
Chārikaṃ chaḍḍaye jantā, paribhaṇḍaṃ tatheva ca.
পরিৰেণং কোট্ঠকো সালা, চুণ্ণমত্তিকদোণিকা।
Pariveṇaṃ koṭṭhako sālā, cuṇṇamattikadoṇikā;
মুখং পুরতো ন থেরে, ন নৰে উস্সহতি সচে॥
Mukhaṃ purato na there, na nave ussahati sace.
পুরতো উপরিমগ্গো, চিক্খল্লং মত্তি পীঠকং।
Purato uparimaggo, cikkhallaṃ matti pīṭhakaṃ;
ৰিজ্ঝাপেত্ৰা থকেত্ৰা চ, ৰত্তং জন্তাঘরেসুমে॥
Vijjhāpetvā thaketvā ca, vattaṃ jantāgharesume.
নাচমেতি যথাৰুড্ঢং, পটিপাটি চ সহসা।
Nācameti yathāvuḍḍhaṃ, paṭipāṭi ca sahasā;
উব্ভজি নিত্থুনো কট্ঠং, ৰচ্চং পস্সাৰ খেল়কং॥
Ubbhaji nitthuno kaṭṭhaṃ, vaccaṃ passāva kheḷakaṃ.
ফরুসা কূপ সহসা, উব্ভজি চপু সেসেন।
Pharusā kūpa sahasā, ubbhaji capu sesena;
বহি অন্তো চ উক্কাসে, রজ্জু অতরমানঞ্চ॥
Bahi anto ca ukkāse, rajju ataramānañca.
সহসা উব্ভজি ঠিতে, নিত্থুনে কট্ঠ ৰচ্চঞ্চ।
Sahasā ubbhaji ṭhite, nitthune kaṭṭha vaccañca;
পস্সাৰ খেল় ফরুসা, কূপঞ্চ ৰচ্চপাদুকে॥
Passāva kheḷa pharusā, kūpañca vaccapāduke.
নাতিসহসা উব্ভজি, পাদুকায চপুচপু।
Nātisahasā ubbhaji, pādukāya capucapu;
ন সেসযে পটিচ্ছাদে, উহতপিধরেন চ॥
Na sesaye paṭicchāde, uhatapidharena ca.
ৰচ্চকুটী পরিভণ্ডং, পরিৰেণঞ্চ কোট্ঠকো।
Vaccakuṭī paribhaṇḍaṃ, pariveṇañca koṭṭhako;
আচমনে চ উদকং, ৰত্তং ৰচ্চকুটীসুমে॥
Ācamane ca udakaṃ, vattaṃ vaccakuṭīsume.
উপাহনা দন্তকট্ঠং, মুখোদকঞ্চ আসনং।
Upāhanā dantakaṭṭhaṃ, mukhodakañca āsanaṃ;
যাগু উদকং ধোৰিত্ৰা, উদ্ধারুক্লাপ গাম চ॥
Yāgu udakaṃ dhovitvā, uddhāruklāpa gāma ca.
নিৰাসনা কাযবন্ধা, সগুণং পত্তসোদকং।
Nivāsanā kāyabandhā, saguṇaṃ pattasodakaṃ;
পচ্ছা তিমণ্ডলো চেৰ, পরিমণ্ডল বন্ধনং॥
Pacchā timaṇḍalo ceva, parimaṇḍala bandhanaṃ.
সগুণং ধোৰিত্ৰা পচ্ছা, নাতিদূরে পটিগ্গহে।
Saguṇaṃ dhovitvā pacchā, nātidūre paṭiggahe;
ভণমানস্স আপত্তি, পঠমাগন্ত্ৰান আসনং॥
Bhaṇamānassa āpatti, paṭhamāgantvāna āsanaṃ.
উদকং পীঠকথলি, পচ্চুগ্গন্ত্ৰা নিৰাসনং।
Udakaṃ pīṭhakathali, paccuggantvā nivāsanaṃ;
ওতাপে নিদহি ভঙ্গো, ওভোগে ভুঞ্জিতু নমে॥
Otāpe nidahi bhaṅgo, obhoge bhuñjitu name.
পানীযং উদকং নীচং, মুহুত্তং ন চ নিদহে।
Pānīyaṃ udakaṃ nīcaṃ, muhuttaṃ na ca nidahe;
পত্তচীৰরং ভূমি চ, পারন্তং ওরতো ভোগং॥
Pattacīvaraṃ bhūmi ca, pārantaṃ orato bhogaṃ.
উদ্ধরে পটিসামে চ, উক্লাপো চ নহাযিতুং।
Uddhare paṭisāme ca, uklāpo ca nahāyituṃ;
সীতং উণ্হং জন্তাঘরং, চুণ্ণং মত্তিক পিট্ঠিতো॥
Sītaṃ uṇhaṃ jantāgharaṃ, cuṇṇaṃ mattika piṭṭhito.
পীঠঞ্চ চীৰরং চুণ্ণং, মত্তিকুস্সহতি মুখং।
Pīṭhañca cīvaraṃ cuṇṇaṃ, mattikussahati mukhaṃ;
পুরতো থেরে নৰে চ, পরিকম্মঞ্চ নিক্খমে॥
Purato there nave ca, parikammañca nikkhame.
পুরতো উদকে ন্হাতে, নিৰাসেত্ৰা উপজ্ঝাযং।
Purato udake nhāte, nivāsetvā upajjhāyaṃ;
নিৰাসনঞ্চ সঙ্ঘাটি, পীঠকং আসনেন চ॥
Nivāsanañca saṅghāṭi, pīṭhakaṃ āsanena ca.
পাদো পীঠং কথলিঞ্চ, পানীযুদ্দেসপুচ্ছনা।
Pādo pīṭhaṃ kathaliñca, pānīyuddesapucchanā;
উক্লাপং সুসোধেয্য, পঠমং পত্তচীৰরং॥
Uklāpaṃ susodheyya, paṭhamaṃ pattacīvaraṃ.
নিসীদনপচ্চত্থরণং, ভিসি বিব্বোহনানি চ।
Nisīdanapaccattharaṇaṃ, bhisi bibbohanāni ca;
মঞ্চো পীঠং পটিপাদং, মল্লকং অপস্সেন চ॥
Mañco pīṭhaṃ paṭipādaṃ, mallakaṃ apassena ca.
ভূম সন্তান আলোক, গেরুকা কাল় অকতা।
Bhūma santāna āloka, gerukā kāḷa akatā;
ভূমত্থরপটিপাদা, মঞ্চো পীঠং বিব্বোহনং॥
Bhūmattharapaṭipādā, mañco pīṭhaṃ bibbohanaṃ.
নিসীদত্থরণং খেল়, অপস্সে পত্তচীৰরং।
Nisīdattharaṇaṃ kheḷa, apasse pattacīvaraṃ;
পুরত্থিমা পচ্ছিমা চ, উত্তরা অথ দক্খিণা॥
Puratthimā pacchimā ca, uttarā atha dakkhiṇā.
সীতুণ্হঞ্চ দিৰা রত্তিং, পরিৰেণঞ্চ কোট্ঠকো।
Sītuṇhañca divā rattiṃ, pariveṇañca koṭṭhako;
উপট্ঠানগ্গিসালা চ, ৰচ্চপানিযভোজনী॥
Upaṭṭhānaggisālā ca, vaccapāniyabhojanī.
আচমং অনভিরতি, কুক্কুচ্চং দিট্ঠি চ গরু।
Ācamaṃ anabhirati, kukkuccaṃ diṭṭhi ca garu;
মূলমানত্তঅব্ভানং, তজ্জনীযং নিযস্সকং॥
Mūlamānattaabbhānaṃ, tajjanīyaṃ niyassakaṃ.
পব্বাজ পটিসারণী, উক্খেপঞ্চ কতং যদি।
Pabbāja paṭisāraṇī, ukkhepañca kataṃ yadi;
ধোৰে কাতব্বং রজঞ্চ, রজে সম্পরিৰত্তকং॥
Dhove kātabbaṃ rajañca, raje samparivattakaṃ.
পত্তঞ্চ চীৰরঞ্চাপি, পরিক্খারঞ্চ ছেদনং।
Pattañca cīvarañcāpi, parikkhārañca chedanaṃ;
পরিকম্মং ৰেয্যাৰচ্চং, পচ্ছা পিণ্ডং পৰিসনং॥
Parikammaṃ veyyāvaccaṃ, pacchā piṇḍaṃ pavisanaṃ.
ন সুসানং দিসা চেৰ, যাৰজীৰং উপট্ঠহে।
Na susānaṃ disā ceva, yāvajīvaṃ upaṭṭhahe;
সদ্ধিৰিহারিকেনেতং, ৰত্তুপজ্ঝাযকেসুমে॥
Saddhivihārikenetaṃ, vattupajjhāyakesume.
ওৰাদসাসনুদ্দেসা, পুচ্ছা পত্তঞ্চ চীৰরং।
Ovādasāsanuddesā, pucchā pattañca cīvaraṃ;
পরিক্খারো গিলানো চ, ন পচ্ছাসমণো ভৰে॥
Parikkhāro gilāno ca, na pacchāsamaṇo bhave.
উপজ্ঝাযেসু যে ৰত্তা, এৰং আচরিযেসুপি।
Upajjhāyesu ye vattā, evaṃ ācariyesupi;
সদ্ধিৰিহারিকে ৰত্তা, তথেৰ অন্তেৰাসিকে॥
Saddhivihārike vattā, tatheva antevāsike.
আগন্তুকেসু যে ৰত্তা, পুন আৰাসিকেসু চ।
Āgantukesu ye vattā, puna āvāsikesu ca;
গমিকানুমোদনিকা, ভত্তগ্গে পিণ্ডচারিকে॥
Gamikānumodanikā, bhattagge piṇḍacārike.
আরঞ্ঞকেসু যং ৰত্তং, যঞ্চ সেনাসনেসুপি।
Āraññakesu yaṃ vattaṃ, yañca senāsanesupi;
জন্তাঘরে ৰচ্চকুটী, উপজ্ঝা সদ্ধিৰিহারিকে॥
Jantāghare vaccakuṭī, upajjhā saddhivihārike.
আচরিযেসু যং ৰত্তং, তথেৰ অন্তেৰাসিকে।
Ācariyesu yaṃ vattaṃ, tatheva antevāsike;
একূনৰীসতি ৰত্থূ, ৰত্তা চুদ্দস খন্ধকে॥
Ekūnavīsati vatthū, vattā cuddasa khandhake.
ৰত্তং অপরিপূরেন্তো, ন সীলং পরিপূরতি।
Vattaṃ aparipūrento, na sīlaṃ paripūrati;
অসুদ্ধসীলো দুপ্পঞ্ঞো, চিত্তেকগ্গং ন ৰিন্দতি॥
Asuddhasīlo duppañño, cittekaggaṃ na vindati.
ৰিক্খিত্তচিত্তোনেকগ্গো, সম্মা ধম্মং ন পস্সতি।
Vikkhittacittonekaggo, sammā dhammaṃ na passati;
অপস্সমানো সদ্ধম্মং, দুক্খা ন পরিমুচ্চতি॥
Apassamāno saddhammaṃ, dukkhā na parimuccati.
যং ৰত্তং পরিপূরেন্তো, সীলম্পি পরিপূরতি।
Yaṃ vattaṃ paripūrento, sīlampi paripūrati;
ৰিসুদ্ধসীলো সপ্পঞ্ঞো, চিত্তেকগ্গম্পি ৰিন্দতি॥
Visuddhasīlo sappañño, cittekaggampi vindati.
অৰিক্খিত্তচিত্তো একগ্গো, সম্মা ধম্মং ৰিপস্সতি।
Avikkhittacitto ekaggo, sammā dhammaṃ vipassati;
সম্পস্সমানো সদ্ধম্মং, দুক্খা সো পরিমুচ্চতি॥
Sampassamāno saddhammaṃ, dukkhā so parimuccati.
তস্মা হি ৰত্তং পূরেয্য, জিনপুত্তো ৰিচক্খণো।
Tasmā hi vattaṃ pūreyya, jinaputto vicakkhaṇo;
ওৰাদং বুদ্ধসেট্ঠস্স, ততো নিব্বানমেহিতীতি॥
Ovādaṃ buddhaseṭṭhassa, tato nibbānamehitīti.
ৰত্তক্খন্ধকং নিট্ঠিতং।
Vattakkhandhakaṃ niṭṭhitaṃ.
Footnotes:
